Jɔ̌n 6

Yesò jɨ̌ bòt bètɔsì batà̧â̧

(Mat 14:13-21; Mk 6:30-44; Lk 9:10-17)

1Àfɨ̀Ꞌ a tsè, Yesò tù̧u̧ èlemè Galìlî (èlemè Tìbelìàs) nga aguŋ. 2TaꞋà, ènɔ̧̂ bòt a me kùŋe atò nkàà tèwuute ènəê kà ye fɨ̀Ꞌ tu bɔ ye tà ghɨ̀ mbəâ bòt àghɔ̧ la. 3Yesò tseke tè nkɔꞋ nga a ègwet èbȩ ntsèke a si bɔ̂ bɔkatè bi. 4Bɔɔ ngɨa ale àfɨꞋa èpǎ̧ Màntsea a ègwet wu Bèjuê àa njɨ̀a la a tsiꞋa nkùꞋà.

5Mbɨ̀Ꞌɨ̀ Yesò lɔ̀kè àghɨ a zi ndzè ènɔ̧̂ bòt bu nkuŋà vi la, tà biite a Filìb nê, “Bà wu anè enɨ èghɨjɨ nè ŋà eyu̧u̧ tê ejɨɨ bòt baa?” 6Tàà mbììte a Filìb ale, ngua nkɨ enyɔ̀Ꞌte atò eye, nkàà nê tà li nko ndɨ yèa ghɨ̀ la.

7Filìb bɨ̀ɨ̀lè nê “Bɔ màà nɨ̀ wuê bèdìnalì ènkɨ̀ yebe ko betsiꞋa bɔ̀ ka yu̧u̧ èghɨjɨ tè wòt ègème jɨ badzìꞋ.”

8Andùlù wakatè tò kǒ è wù wanyɨ Simùn Pità la, shu abua Yesò nê, 9“Waã kǒ naa àdzìꞋ yaa, nè tètaãaãte bled balì #6:9 Bled balì li ngu bled bòt mbuŋ. tetà̧â̧, nè basə babe. Ka betsiꞋa be ghɨ̀ ghǎ ane bòt baa bàgème à?”

10Yesò shu abua bɔkatè bi nê, “Bɨ̀ ghɨa bòt bu è tseke a si.” ÈfəêꞋ e li ntaꞋa wu abot, ale bòt bu e tseke a ègwet tè me ghǎ mbɔ̀ŋè mbâ̧tsə bètɔsì batà̧â̧. 11Yesò nɨ̀ tètaãaãte bled tu, ŋà mènkɔ̀ke abua Mbɔ̧ɔ̧mà, mbɔ̂ ngàbtè abua bòt bu bɔ tseke a si la. Tà ghɨ̀ ale, mè nɨ basə bu ngɨ̀ wuê a èlɨ mbɔŋ, tè wòt ègème jɨ mbɨ̀Ꞌɨ̀ ye kɔ̀ŋke la.

12ÀfɨꞋa bɔ jɨ tê ndzet la, Yesò shu abua bɔkatè bi nê “Bɨ̀ fete tèpȩte te bəèꞋ la mbɨ̀Ꞌɨ̀ ka àghɨa ko a bi.” 13Ale, bɔ fete tèpȩte bled tu te bəèꞋəè ane tètaã tu tetà̧â̧ bòt bu e jɨ la, te lu̧ bankì ntsɔ̀b babe.

14ÀfɨꞋa bòt e ye ngɨŋa ànəê yaa Yesò ghɨ̀ la, bɔ nê, “Eyaa lâ ngu ndàꞋàtɔŋ Mbɔ̧ɔ̧mà wu tà li mbɔ̌ ndɨ tàa kɨꞋa sitsǎꞋ la.” 15Yesò ye nê bɔɔ̀ nkɨ ebaãaã avi ane ètɨ̧̂ è ghɨ̀ àvi ane fɔ̧̀, tà mè sa abot ngwènè a ègwet èbȩ zìa ndziꞋne.

Yesò ghȩ̀ȩ̀nè a ègwet mèleb

(Mat 14:22-33; Mk 6:45-52)

16È tseke tè ngu a nyèmtèsi, bɔkatè Yesò e chu ngà a èbem èlemè wu, 17nyi a èbem ànkànuꞋ, me ghǎ a Kàpenàwuêm agua ko zìa. Ndzèm fen, kà Yesò zìꞋì nkɨ̀Ꞌɨ̂ te kwene ane yɔb. 18TaꞋà àfeme ako a bùꞋ me tsè tê ndɔ̀kà èfu èdzî. 19Mbɨ̀Ꞌɨ̀ bɔ gha a èbem mèleb mbɔŋe ane bèmȩl bakwì la, bɔ yea Yesò ngȩ̀ȩ̀na a ègwet *èdzî nkùŋà àwɔb nkɨ̀Ꞌa a ngèt ànkànuꞋ yu la, ale kèbɔɔ ke baãaã wɔb. 20Yesò shu abua yɔb nê, “Wu mmɔ̌, bɨ̀ ka mbɔ̀a.” 21Bɔ ghɨ̀ ale, me kɨ enɨ atò ezǐ a èbem ànkànuꞋ yu, ka a kɨꞋɨ̀ tè ndzə aguŋ, àdziꞋa bɔ ghà la.

Bòt bu e me kɨ a Yesò

22ÈtsəꞋ e tsi ènɔ̧̂ bòt bu aà teꞋa agua èlemè àko zia la, e me kɨ a Yesò. Bɔ li nko nê ànkànuꞋ a lɔ̀Ꞌ ngu abot wuê yeamɔꞋ mè nko nê Yesò nàà kàꞋà gha a èbèm bɔ̂ bɔkatè bi, nê bɔkatè tò aà ghà bɔ̀ɔ bɔ̀ɔ̀ba. 23Bɔ bele abot, ènkànuꞋ ko e bê ndɔꞋɔ àbâ àlaꞋ a Tìbelìàs, nkɨ̀Ꞌɨ̂ a ngèt adzìꞋ yu bɔɔ̀ jɨ̀a bled wu Yesò nàà ŋà mènkɔ̀ŋke adù̧ la. 24ÀfɨꞋa ènɔ̧̂ bòt bu e ye nê Yesò kò bɔkatè tò leꞋ e te ntsě abot la, bɔ nyi a èbem ènkànuꞋ mbɔŋ nga a Kàpenàwuêm e me kɨa Yesò.

Yesò wu èghɨjɨ mèmpème

25Bɔ gha agua èlemè àko zia ale ndze atò, mbììte atò nê “Labȩ̀, à yaã nkɨ̀Ꞌɨ̂ àdzìꞋ yaa a ka àfɨ̀Ꞌ à?”

26Yesò tsiꞋi bɨ̀ɨ̀le nê “Ane nkûŋ, tsiꞋ è shua wɨ̧ nê, bɨ̀ ka kɨ am nkàà èghɨ bu màa ngɨ̀à bɨ yea mè nkoa nê e wua nyɨ̀Ꞌta mètàŋ Mbɔ̧ɔ̧mà la. Bɨ kɨ am nkàà èghɨjɨ bɨa yaã njɨ̀ te ndzete mbɨ̀Ꞌɨ̀ bɨ kɨa la. 27Bɨ̀ ka ŋà àtsəa yɨ̧ ane èghɨjɨ àa lɔ̀Ꞌɔ elìa la. Ka bɨ̀ ŋa wuê ane èghɨjɨ bu àa ŋǎ mèmpème kàlìà la. Eyaa wu èghɨjɨ bu Waã Wòt nàa ŋa abua yɨ̧ la, nkàà nê wu tòà Tǎt wa Mbɔ̧ɔ̧mà nyɨꞋtè nê tà wu wòt ye laa nê tà me ghɨ àfàꞋ yaa la.”

28Ale, bɔ biite atò nê “Bàa ghɨ̀ na mbɨ̀Ꞌɨ̀ me ghɨ̀ àghɨa Mbɔ̧ɔ̧mà nàa kɨa la à?”

29Yesò bɨ̀ɨ̀lè nê, “Àghɨa Mbɔ̧ɔ̧mà nàa nkɨà nê bɨ̀ me ghɨ la wu nê, bɨ̀ zì mèntɨ̧ɨ̧ mɨ̧ ane wòt wu ye tsàà la.”

30Yesò làꞋ ale bɔ mè mbììte atò nê “Àa ghɨ̌ ka ànəa kà ye fɨ̀Ꞌ enɨ nyɨꞋte mètàŋ Mbɔ̧ɔ̧mà mbɨ̀Ꞌɨ̀ bɔɔ ye ebɨ̧ɨ̧ne èngǎ̧ wè à? 31Mè nê, tà ko na bètǎt nyaꞋ bɔb e li njɨ̀ èghɨjɨ bu bɔ̀ɔ ntɔ nê manà bɔ̂ Musì ba e li nkwene adù̧ àbâ àlaꞋ àyuube, mbɨ̀Ꞌɨ̀ bɔ shɨ a èbem àkatè a Mbɔ̧ɔ̧mà la nê, ‘Tà li ŋà wɔb èghɨjɨ e dzə a ègwet la bɔ jɨ.’ ”

32Yesò shu abua yɔb nê “Ane nkûŋ, tsiꞋ è shua wɨ̧ nê, èghɨjɨ bu e li nchu a ègwet la e li è ka dzə abua Musì. È li ndzə abua Tǎt am Mbɔ̧ɔ̧mà wu tàa ŋǎ wɨ̧ ngule èghɨjɨ bu e dzə a ègwet la àfɨ̀Ꞌ yaa la. 33Èghɨjɨ baa Mbɔ̧ɔ̧mà nàa ŋǎ la, wu tòà wu tà chu a ègwet me ŋa mèmpème abua bòt ngɔ̀ŋ la.”

34Tà làꞋ ale bɔ shu abua tò nê “Tê, me ŋa wa èghɨjɨ bàà àfɨ̀Ꞌ àgème.”

35Yesò shu abua yɔb nê, “E ngu èghɨjɨ bu àa ngɨ̀a bòt e bɔ mèmpème la. Wòt tà kɨꞋɨ̀ ndzì èntɨ̧ɨ̧ vi ane yaã la, ndzìtsə tè ka li tsi eku atò a, àtɔŋ tò à ka tsi ndɔ̀Ꞌ àlia nju̧. 36Ka mbɨ̀Ꞌɨ̀ maa lɔ̀Ꞌ shua wɨ̧ la, bɨ ye am ka bɨ̀ ka wua nkɨ ezì mèntɨ̧ɨ̧ mɨ̧ ane yaã. 37Waa waa Tǎt am nàa ŋǎ abua am la naa kɨꞋɨ etsiꞋi wòt am, è nka mèe ngu efəâ wòt kǒ tà kɨꞋɨ abua am la. 38È nka chua a ègwet e ghɨ̀ àghɨa èntɨ̧ɨ̧ am àa nkɨà la; e nkɨ̀Ꞌa e ghɨ̀ àghɨa wòt tà tsàà am la nàa nkɨà la. 39Eyaa wu àghɨa tòà wu tà tsàà am la nàa nkɨà la, nê è nka sàŋ wòt kǒ ane bòt bu yê ŋa abua am la è nyɔ̂, nê è ndi ngɨ̀ wuê ndɨ bɔ̀ɔ yu̧u̧me àlia ngɔ̀ŋ nàa lìà la. 40Àghɨa Tǎt am nàa nkɨà la wu nê, wòt ègème tà ye Waã vi ndzì èntɨ̧ɨ̧ vi ane tò la, naa li ebɔ mèmpème kàlìà, e mè ngu e ghɨ̌ ŋut naa yu̧u̧me àlia ngɔ̀ŋ nàa lìà la.”

41Bèjuê e bùꞋ me lèmte atò nkàà nê tà li nê ye wu bled wu è chu a ègwet la. 42Bɔ nê “Tè eyaa chɨɨme ntsě Yesò waã Jòsêb wu baa ko a tǎt tò bɔ̂ nyɨ̌ tò la à? Tà ghɨ̀ na ka ntsiꞋa shua nê ye chua nè ègwet à?”

43Yesò bɨ̀ɨ̀lè nê “Bɨ̀ ka tsi ndèmtè a kètsìà wɨ̧. 44BetsiꞋa wòt kà kɨꞋɨ abua am kà wu we Tǎt am wu tà tsàà am la tà ghɨ tà kɨꞋɨ la, e mbɔ̂ ngu eyu̧u̧me a ŋut àlia ngɔ̀ŋ nàa lìà la. 45Bɔ shɨ a èbem àkata bèndàꞋàtɔŋ nê ‘Wòt tàa li me nyɨꞋte bòt la wu Mbɔ̧ɔ̧mà’. È wu ale, wòt ègème tà ŋa àtû̧ azi abua Mbɔ̧ɔ̧mà ndzə ànəa èngǎ̧ tò e shua la, naa kɨꞋɨ abua am. 46Àyaa a ntsea shua nê, wòt kǒ nàà və tà li me ye a Mbɔ̧ɔ̧mà la. Wu ndàꞋà wòt wu tà dzə abua Mbɔ̧ɔ̧mà la ka tà li me ye atò la. 47Ane nkûŋ, tsiꞋ è shua wɨ̧ nê wòt tà zǐ èntɨ̧ɨ̧ vi ane yaã la ebɔ mèmpème kàlìà. 48E ngu èghɨjɨ bu àa ŋǎ mèmpème la. 49Bètǎt nyaꞋ bɨ̧ e li mbàtê njɨ̀ èghɨjɨ bu bɔ̀ɔ ntɔ nê manà la àbâ àlaꞋ àyuube mbɔ̂ mè mpfəèꞋte wuê pfəèꞋtê, 50ka èghɨjɨ bu e dzə a ègwet la wu è bu wòt jɨa tà kà tsi mpfə la. 51E ngu èghɨjɨ bu àa ŋǎ mèmpème e chu a ègwet la. Wòt tà jɨ èghɨjɨ baa la lia kà wu tsi epfə. Èghɨjɨ baa wu mbɨ̧̀ ènyit yaã màa ŋa mbɨ̀Ꞌɨ̀ bòt ngɔ̀ŋ àa bɔ mèmpème la.”

52Tà làꞋ ale Bèjuê bu e bùꞋ me yɔ̌ a kètsìà wɔb shua nê, “Mbê waa ghɨ̀ na ka nê yea ŋa mbɨ̧̀ ènyit zi abua ya baa kwele à?”

53Yesò shu abua yɔb nê, “Ane nkûŋ, tsiꞋ è shua wɨ̧ nê, bɨ bakà kwele nyà̧ ènyit Waã Wòt, e mèe nu àlo̧ atò, bɨ̀ ka bɔ mèmpème. 54Wòt tà kwele nyà̧ ènyit yaã ndɔ̀Ꞌ nù àlo̧ am la, è bɔ mèmpème kàlìà, e mbɔ̂ ngu li eyu̧u̧me atò àlia ngɔ̀ŋ naa lìa la. 55Aa ale nkàà nê nyà̧ ènyit yaã wu ngule èghɨjɨ, àlo̧ am mè ngu ngule àghɨa betsiꞋa wòt nu la. 56Wòt tà kwele nyà̧ ènyit yaã ndɔ̀Ꞌ nù àlo̧ am la wua ndzìà vi ane yaã, e mè ngua ndzì am ane tò mɨ̧̂. 57Tǎt am wu tàa ŋa mèmpème la, e tsàà am, è mè ngu tòà ka tà ghɨ̂ e mbɔ mèmpème la. Wu wuê èlɨ màa ghɨ̌ wòt tà kwele yà̧ ènyit yaã la nàa bɔ mèmpème la. 58Eyaa wu bled wu è chu a ègwet la, è ntsě àfəa wu bètǎt nyaꞋ bɨ̧ e li nkwet ndɔ̀Ꞌ mè mpfəèꞋte la. Wòt tà kwele a bled waa la naa bɔ mèmpème e me tseke ane àlia nè àlia.” 59Yesò nàà ndàꞋà mènəè maa ale ngu a èbem lob Mbɔ̧ɔ̧mà a Kàpenàwuêm nyɨ̀Ꞌta èngǎ̧ Mbɔ̧ɔ̧mà.

Mèngǎ̧ mèmpème kàlìà

60Tà làꞋa èngà̧ waa ale bòt nyaŋ ane bɔkatè tò e zə nê, èngǎ̧ mbɔŋ e ghe àa nkwèèla la, tè betsiꞋa waa bɨ̧ɨ̧ne wùà?

61Ka bɔɔ ngɨ̀à ale Yesò ko nê bòt bu nkùŋà vi la àa ndèmta ànəa mbɔŋ, ale tà bììte awɔb nê “Ànəê yaa a tsoke mèntɨ̧ɨ̧ mɨ̧̂? 62Tè bɨ me wu ale ndzè Waã Wòt nkɔ̀Ꞌa nga a ègwet àdziꞋa tà li ngu la ko bɨa tsiꞋi ghɨ̀ naà? 63Fo Mbɔ̧ɔ̧mà ka nàa ngɨ̀a bòt e bɔ mèmpème la, betsiꞋa wɔ̀bȩ̂ ka bɔ mua ane mi ne mètàŋ. Mèngǎ̧ maa e ndaꞋa abua yɨ̧ la dzə abua Fo Mbɔ̧ɔ̧mà, è mè ngu mùà ka nàa ŋǎ mèmpème kàlìà la. 64Ka àbəèꞋ àyɨ̧ ako à ka lem mbɨ̧ɨ̧ne mèngǎ̧ mbɔŋ.” (Yesò nàà ndàꞋà ale ngu ndɨ tà yaŋe ko bòt kà wu ebɨ̧ɨ̧ne èngǎ̧ vi kwàꞋ ane àlia mbìa tà buêꞋ me laꞋa wùà la, mè nko wòt wu tàa ghɨ̌ efɨ̧̀ɨ̧̀nè àvi la.) 65Ale, Yesò nê “Eyaa wu lə yu e ndi shu abua yɨ̧ nê betsiꞋa wòt kà kɨꞋɨ etsiꞋi wòt am kà Tǎt am ghɨ̀ ane ndɨ tàa kɨꞋɨ la.”

66EbuꞋu àfɨꞋa mbɔŋ me ghà ne mbì bòt nyaŋ ane bɔkatè tò e kua kwèn, bɔ ka tsi ngua nkùŋà atò.

67Yesò shu abua èbu ntsɔ̀b babe la nê, “Bɨa sa am ghà àyɨ̧ mɨ̧̂?”

68Simùn wu èlen tò ko wu Pità la bɨ̀ɨ̀lè nê “Tê, à kɨa nê bà ghǎ abua waa tsa à? Wu ndàꞋ àwɔ̀ ka à bɔ mèngǎ̧ nàa ŋǎ mèmpème kàlìà la. 69Ba bɨ̧ɨ̧ne mè nko nê, à wu ngule wòt wu Mbɔ̧ɔ̧mà tsàà la.”

70Yesò bɨ̀ɨ̀lè nê “E ndɨ è nka laa wɨ̧ ntsɔ̀b babe, wòt wemɔ̀Ꞌ naa bɔ ewu wòt Satàn?” 71Tàa ndàꞋà ale ngua ŋa abua Judàs waã Simùn wu èlen tò ko wu Iskaliòt la, nkàà nê tà batè ngu wekǒ ayɔɔ bɔkatè bu ntsɔ̀b babe la ale, mbɔ̂ ngu we tàa lɔ̀Ꞌɔ efɨ̧̀ɨ̧̀ne a Yesò la.

Currently Selected:

Jɔ̌n 6: mnf

Highlight

Copy