Jɔ̌n 5

Yesò bəâ wòt kǒ a ngèt àtɨ̀ŋ

1Mènəè maà tse ale, Yesò kɔꞋ nga a Jèlusalèm a èpǎ̧ Bèjuê ko. 2Àtɨ̀ŋ àko a wu a Jèlusalèm a ngèt ètsəêkaã yu bɔ̀ɔ ntɔ nê ètsələèꞋ njɨ̀tsə la. Èlen àtɨ̀ŋ a ngaa ane ndɨ̧ Ebùlù wu Betzatà, a bɔ ètsəê yetà̧â̧ àa nyià abot la. 3Ènɔ̧̂ bòt nè èlɔ̀Ꞌ (bòt àghɨ àleme nè bòt èka bɔb e ŋɔꞋte la, ndɔ̀Ꞌ nè èbe èbâ ènyit bɔb e pfəꞋte la), e wu a mètsəê bɔ nɔ̀ŋkè la. [Bɔ li ngua nɔ̀ŋkà nchɨ̀Ꞌà àtɨ̀ŋ yu aa bente, 4nkàà nê, wantu̧ Mbɔ̧ɔ̧mà nàa ngɨ̀ tseke tê è chu ngɨ̀ àtɨ̀ŋ yu a bentè. À bente ale, wòt àghɔ̧ tà bɨ̌ nyi a èbem àtɨ̀ŋ a mbɔŋ la kweelè, ka è màà ngu wuê ka àghɔ̧ ane tò leꞋ.] 5Wòt kǒ li ngu abot, tà ghɔ̧̀ɔ̧̀ne ane èngùꞋebȩ èghem yetat ntsɔ̀b yefà̧aã la. 6Yesò kɨꞋɨ̀ ndzea atò tà nɔ̀ŋke abot la, nko nê, tà ghɔ̧̀ɔ̧̀ne ane àfɨ̀Ꞌ à seè, mbììte atò nê, “Àa nkɨ ekweele?”

7Wòt àghɔ̧ wu bɨ̀ɨ̀le nê, “Tê, mèleb mu nàa mbènta, wòt kà wu tàa zi am a èbèm la. E ngɨ̀ e mbela nyɔ̀Ꞌtà nkɨ enyi, wòt tsa bɨ̀ a èbèm.”

8Yesò shuê abua tò nê, “Lɔ̀Ꞌɔ a si, ngwia matà wê me ghǎ.” 9KwàꞋ àfɨꞋa mbɔŋ, mbê wu bê nkwèèlê, ngwia matà vi me ghǎ.

E li ngu àliapfəèa Bèjuê. 10Ale bɔɔjuŋ Bèjuê e shu abua mbê wu bɔ bə atò la nê, “Laane wu àliapfəè, mbɨ̧ ta te bakà bɨ̧̀ɨ̧̀ne laꞋnê, ŋeꞋa matà wê ane èwuu àli yàa.”

11Bɔ làꞋ ale, mbê wu bɨ̀ɨ̀lè nê, “Wòt tà yaã mbəè am la, yaã shu abua am nê, ‘Vi matà wê me ghǎ.’ ”

12Bɔ biite atò nê, “Wòt waa tà yaã shu abua yê nê, ‘Via matà wê me ghǎ la wu wàà’?”

13Ka mbê wu bɔ bə atò la ka ko wòt Yesò wu wùà la, ngu nê bòt e li ngua ndzaãaã Yesò dzə ayɔɔ ayɔb ngà kà tà ko.

14Àfɨ̀Ꞌ a tseke tê me wu, Yesò ye atò a èbem lob nɨ̧ Mbɔ̧ɔ̧mà, shuê abua tò nê “Ye, à peme tê ndɔ̀Ꞌ. Ka tsi ngɨa kàbɔ̀ŋ mbɨ̀Ꞌɨ̀ ànəa a bɨ ntsè ayaa la a yea wê.” 15Mbê wu zə ale, nga shu bɔɔjuŋ Bèjuê bu nê, “Wòt wu ta yaã mbəè am la wu Yesò.”

16Yesò ghɨ ànəê yaa àliapfəèa Bèjuê ale, a ghɨ̂ bɔɔjuŋ bu e me kɨ àtsəa tò enɨ. 17Ale, Yesò shuê abua yɔb nê “Eyaa wu èghɨ Tǎt am nàa ngɨ̀a àfɨ̀Ꞌ àgème la. Mmɔ̌ mbɔŋ mâ bɔ ndɨ màa me ghɨ a èlɨ ngaa la.” 18Eyaa wu àghɨa a li ngɨ̀ bɔɔjuŋ Bèjuê e paa me kɨa tò ebùŋe la, nkàà nê tà bakà bəꞋə wuê ndàꞋà mbɨ̧ àliapfəèa yɔb, tàa ntɔ fɔ̀ɔ̀le Mbɔ̧ɔ̧mà ane Tǎt vi, ale ngua nɨa vi fɨꞋna ane tò.

Mètàŋ Waã Mbɔ̧ɔ̧mà

19Ale, Yesò shuê abua yɔb nê, “Ane nkûŋ, tsiꞋ è shua wɨ̧ nê, betsiꞋa Waã ka ghɨ̂ àghɨ ane mi ne mèmɨ̀ɨ̀te tè è bəa wuê àghɨa tà ye tǎt tò me ghɨ̀ la. Àghɨa tǎt nàa ngɨ̀à la, wu yùà yu Waã nàa ngɨ̀à la mɨ̧̂. 20A wu anè nkàà nê, tǎt è kɔ̀ŋkè waã tè nyɨ̀Ꞌte atò, àghɨ àgème tòà zìambɔŋ nàa ngɨa la. Tàà nyɨꞋte atò fɔ̀ɔ̀le èghɨ e taꞋa tsè è baa la taa ghɨ̌, tê ànəa mbɔŋ aa taꞋa tsè àwɨ̧ bɨ̀agème. 21KwàꞋ ane ndɨ tǎt nàa ngɨ̀ tà yù̧ù̧me bèmpfəà ngɨ̀ bɔ pem la, wu wuê a èlɨ mbɔŋ Waã nàa ngɨ̀a bòt tà kɔ̀ŋkè la e bɔ mèmpème la. 22Tǎt nàà kà saꞋa mènəè wòt. Tà ŋa mètàŋ mà saꞋa mènəè bòt ègème abua waã, 23mbɨ̀Ꞌɨ̀ bòt bàgème aa me ŋa kènuke abua Waã mbɨ̀Ꞌɨ̀ bɔ̀ɔ ŋa abua Tǎt la. Wòt bakà wua ŋa kènuke abua Waã, tà ko nê yea kà ŋa abua tǎt wu tà tsàà tò la.

24“Ane nkûŋ, tsiꞋ è shua wɨ̧ nê, wòt tà zə èngǎ̧ am, ndzì èntɨ̧ɨ̧ vi ane wòt wu tà tsàà am la, è bɔ mèmpème kàlìà. Tà ka tsi ekwene èsaꞋa. Tà peme èvə, tè ntsìꞋi nyi a èbem mèmpème. 25Ane nkûŋ, tsiꞋ è shua wɨ̧ nê, àfɨ̀Ꞌ aa nkùꞋà, a bê nkùꞋ tè ndɔ̀Ꞌ, àfɨꞋa bèmpfəà àa zə àtɔŋ Waã Mbɔ̧ɔ̧mà la, mbɔ̂ bòt bɔ zə la, aa peme. 26KwàꞋ ane ndɨ Mbɔ̧ɔ̧mà nàa ngɨ̀a bòt e bɔ mèmpème la, wu wuê a èlɨ mbɔŋ tà ghɨ̂ Waã tò me ŋa mèmpème la. 27Tà ŋa tò àtɔŋ ane ndɨ tàa saꞋa mènəè bòt te lià la, nkàà nê, tà wu Waã Wòt.

28“Bɨ̀ ka màkè àyaa, nkàà nê, àfɨꞋa a kuêꞋ bòt bu a èbem èsî la àa zə àtɔŋ tò, 29èdzəâ àbȩ la. Bòt bɔ li ngua ngɨ̀à ntsɔ̧̀ la, aa yu̧u̧me ebɔ mèmpème, èbe be li ngua ngɨ̀à kàbɔ̀ŋ la, e yu̧u̧mè bɔ zì àwɔb a èbem ngoꞋ kà wu li elìa.

Wòt Yesò wû wùà la

30“Maa kà nɨ mètàŋ mɔ̧ ka nɨŋ ngɨ̀ àghɨ. Maà saꞋa ànəa wòt wuê mbɨ̀Ꞌɨ̀ mâ zə abua Tǎt am la. Màa ngɨ̀ è saꞋ ànəê, bɔ ko nê a kuêꞋ, nkàà nê maa kà ghɨ wuê àghɨa èntɨ̧ɨ̧ am àa nkɨà la, maa ngɨ̀ wuê àyea wòt wu tà tsàà am la, nàa nkɨà la.

31“E ngua ndàꞋà ànəê am mmɔ̌ mbɔŋ, ko ànəa e ndàꞋà la ntsě nkûŋ. 32Wòt kǒ nàà və tà tɨ̧ɨ̧ akwene yaã ane ànəê yaa la. E mè nko nê, ànəa tà koê mè me shu ane yaã la wu nkûŋ.

33“Bɨ li ntsàà bòt abua Jɔ̌n, tà shu nkûŋ ye ko ane yaã la, 34ka è kà lem ngu nê, mâ bɔ ndɨ màa lɨ̀Ꞌ am ane ànəa wɔ̀bȩ̂ shu ane yaã la. E ndàꞋà mènəè maa anè wuê mbɨ̀Ꞌɨ̀ bɨa bɨ̧ɨ̧ne epeme. 35Èngǎ̧ Jɔ̌n e li ngu mbɨ̀Ꞌɨ̀ èkaꞋà àa mbèꞋa mbàŋà èdziꞋ la, bɨ mè kɔ̀ŋkè ewùꞋtè àwɨ̧ a èbem èkaꞋà ngaa ane àfɨ̀Ꞌ àko.

36“Ka èghɨ màa ngɨ̀à la aà nyɨ̀Ꞌta wòt è ngu wùà la, tè ntsè àghɨa a li nyɨ̀Ꞌte ane ànəa Jɔ̌n li shu ane yaã la, nkàà nê e ngu anè ngɨ̀à èghɨ bu Tǎt am li nê è mpaa ngɨ̀ la. Wu bùà bu èa nyɨ̀Ꞌta nê tòà ka tà tsàà am la. 37Tǎt am wu tà tsàà am la è laꞋa nkûŋ ane ànəa am zìambɔŋ. Bɨ̀a mbɔŋ e te bakà zə àtɔŋ tò, bɨ̀ ka ye atò, 38ànəa tò à ka wu a èbem mèntɨ̧ɨ̧ mɨ̧ nkàà nê bɨ bakà zi mèntɨ̧ɨ̧ mɨ̧ ane wòt wu tà tsàà la. 39Bɨà ntɔ Àkata Mbɔ̧ɔ̧mà ànyaꞋne ntsìꞋa nta nê wu yùà ka àa ghɨ̌ bɨa ko ndɨ wòt nàa bɔ mèmpème kàlìà la. Àkate mbɔŋ aa ndàꞋà ànəa wòt è ngu wùà la, 40ka bɨ bɔ̂ ntu̧ ekɨꞋɨ abua am mbɨ̀Ꞌɨ̀ e la peme.

41“Maa kà kɨ mèngùꞋte è dzə abua bɔbȩ la, 42ka mâ ko àghɨa bɨ̀ wu yùà la. Mâ ko nê, bɨà kà lâ nkɔ̀ŋkè a Mbɔ̧ɔ̧mà. 43Mâ kɨꞋɨ ane èlen Tǎt am, bɨ̀ ka wua nkɨ eyute ànəa e shua la, ka wòt kǒ tsa ghɨ̀ ale nkɨ̀Ꞌɨ̂ ane èlen li zìambɔŋ ko bɨ bɨ̧ɨ̧ne ànəa ŋut shua la. 44Bɨ̀a nkɔ̀ŋkà wòt wɨ̧ naa me wùꞋtè wanyɨ vi, ka bɨ̀ ka wua nyɔ̀Ꞌtà nkɨ̌ è ghɨ̌ èghɨ ndàꞋa Mbɔ̧ɔ̧mà nàa wùꞋtè àwɨ̧ la.

45“Bɨ̀ ka mɨ̀ɨ̀tè nê maa ghǎ a mbì Tǎt am eshu ànəê àtsəa yɨ̧. Musì wu bɨ li nɔ̀ŋè ntɨ̀ yɨ̧ ane tò la, ka tàa shua ànəê àtsəa yɨ̧ la. 46È wu nê bɨ li mbɨ̧̀ɨ̧̀ne èngǎ̧ Musì nkûŋ ko bɨ zì mèntɨ̧ɨ̧ mɨ̧ ane yaã, nkàà nê, tà li shɨŋ shu ànəa wòt è ngu wùà la. 47Ka bɨ̀a ghɨ̀ na ka ebɨ̧ɨ̧ne ànəa e shua la nè ndɨ bɨ̀ baka bɨ̧ɨ̧ne ànəa tà li shɨŋ la à?”

Currently Selected:

Jɔ̌n 5: mnf

Highlight

Copy