1 AKORINTHO 5

Kwingwa kanicaani

1Igûkwîrîkana kûrî we wacienu arutîîte ngûgî ya ûmaramari. Na bu bûkîaa n'ûmaramari bûtarûthagwa kinya i bara bateetîgîîtie Ngai. Kûrîîrîkana kûrî we aamaamaga na mwekûrû wa îthe, 2na amwe na ûgu ibûgwîkumîria ûgu mûno! Bwabatîîrue bûgwatwa i kîeba na muntû ûyu bûmûruta ngwatanîrooni yenu. 3Wana weegua bûtikûmbona amwe naabi, nkoro yakwa îrî amwe naabi. Na mwanka agu ingiitîîte îgamba rîa muntû ûyu aarûthire wîyia bûbu taka ndarî oogo. 4Rîra bûkeethîrana amwe riîtwaani rîa Mwathani wetû Yiesû Kîrîstû, wana niû nkoro yakwa îrî amwe naabi. Kwa riîtwa rîa Mwathani wetû Yiesû Kîrîstû, 5nwa mwanka bûnenkanîre muntû ûyu kîrî Saitaani. Bwarûtha ûgu, mawîrirîîria ma mwîrî wake mara mathûûku makeenyangua, îndî nkoro yake îkoonokua ntugû îra Mwathani agaacooka.

6Gwîkumia kwenu ti kwega. Ibwiyî njuno îra yugaga, “Kandawa kaniini ga kwimbithia mîgaate nwa gatûme mûtu ûra mûkande wimba unthe.” 7Wîyia bûkari ta ndawa ya kwimbithia mîgaate. Îtherieni kuumania na ndawa ya kwimbithia mîgaate bûtuîke mûtu ûngî ûmûkande, ûtarî mwîkîre ndawa. Yiesû aambirwe n'ûntû bwetû arî ta kagondu kara kaûragagwa îgiita rîa kîatho gîa *Pasaka. 8Kwoogu ga tûkeneere kîatho tûrîe mîgaate îngî îtarî îra mîîkîre ndawa, mîgaate ya ûkembu na ûmma. Tûtikaarîe mîgaate îra yarî mîîkîre ndawa, mîgaate ya mantû mataagîrîte na ûthûûku.

9Rîra rîngî nkûbwandîkîra, ndabwîrire bûtigaatume ûnyanya na bara barûthaga wîyia bwa ûmaramari. 10Îndî nkiuga ûgu ntaaragîîria antû ba nthîgûrû n'ûntû barutaga ngûgî cia ûmaramari, n'eerirîîria, n'atunyani, na barombaga ngai cia ûrongo. Ûtibakuthûka nwanga ûkauma nthîgûrû îno cwe. 11Bûra ndeendaga kûbwîra n'atî, bûtigaatume ûnyanya na muntû woora arauga i mwîtîgîri na akîrutaga ngûgî cia ûmaramari, kana arî mwîrirîîria, kana aroombaga ngai cia ûrongo, kana atuuyagîîra antû, kana mûtogooni, kana arî mûtunyani. Wana kûrîyanîra bûtikaarîyanîreeni na antû ta babu.

12-13Ntibatîîrue ngiitîra îgamba antû batarî ba kanica, i Ngai akaagiita rîao. Giitagaani îgamba rîa eeyia ba kanica. Wata bûra *Maandîko Maatheru maugaga, “Îngatiani muntû ûra mûthûûku aume kîrî biû.”#Kûririkanania Maathana 17:7; 19:19; 24:7

Currently Selected:

1 AKORINTHO 5: thk

Highlight

Copy