1 AKORINTHO 4

Atûmwa ba Kîrîstû

1Kwoogu antû babatîîrue batwonaga tûrî aruti ngûgî ba Kîrîstû bara twetwe ngûgî ya kûrutana iriga bia Ngai. 2Kîra kîendekanaga kîrî aruti ngûgî i gûtuîka eetîgua kîrî mûnene wao. 3Aakwa niû, ntikûmaka nwîgue i bûkangambithia kana inkairwa kootiini cienu. Wana ndî niû ningwa ntiîgiitîra îgamba. 4Ntikwîgua nkoro yakwa îkîngambithia, îndî bûbu bûtiûmba kûmbagîrithia. Ûra aiyî bûra îgamba rîakwa rîkari i Ngai. 5Kwoogu menya kûgîta muntû agiitîra ûra ûngî îgamba mbere ya Mwathani acooka. Mwathani akaathararia werû bûmûrîke mara monthe marûthagîrwa mwinduuni, oonanie mantû ma nkoro cia antû. Rîru Ngai ape muntû kîra kîmwagîrîte.

6Aruayia na aarayia, ntûmîrîte ngerekano yakwa na Apooras kaingo kuumania naati bûmenya kuuga, “Menya bûra bwandîkîîtwe bunka,” i ta kuuga ata. Bûkarûtha ûgu bûtikumia muntû ûmwe nkûrûki ya ûra ûngî. 7Mûkûûraani waku na bara bangî i mbi? I mbi ûrî îtarî ya kwewa? Na weegua nwetwe rî, aabu gîtûmi gîaku gîa gwîkumia taka ûtarî mwe i kîbi?

8We! Mwanka agu gûtirî kîo gîa gîîkîrundu bûtarî! Bûrî itonga! Naka bûrî anene îndî tûtirî bo tiû! Îndî wabu ûkeegua bûrî anene wana tiû twîgua tûrî anene amwe naabi. 9Ndîona tiû tûrî atûmwa taka Ngai atûmîîte tûrega kwewa gîtîîyo nwa aniini. Tûkari ta antû batûîre kûûragwa. Twonagwa ta mûceetho gûntû kunthe, kîrî antû na kîrî araîka. 10Tiû tûrî biaa n'ûntû bwa Kîrîstû, îndî biû bûrî baûme ndeni yake. Tiû gûtirî bu tûkûûmba, îndî biû gûtirî bu bûtaûmba. Biû ibûtîîyagwa, îndî tiû tûtitîîyagwa. 11Wana ndarîkaani îno tûrî tûtirî na biakûrîa, rûûyî, kana nguo cia gwîkîra. Magiita maingî itûturagwa na tûtirî mîciî. 12Tûrutaga ngûgî na inya na njara cietû twingwa. Antû batwîra mantû mataagîrîte, tiû tûûragia Ngai abathaarime. Batûreetera thîîna, itûûmagîîria. 13Rîra twarumwa tûcookagia na mîgambo ya ûbooreru. Mwanka agu tûkinyîîtie îîndî tûkari ta rûko rwa nthîgûrû, rûra antû bateeyaga.

14Ntikûbwandîkîra mantû mama mbwîkîrithia nthoni. Ndîbwandîkîra mbûkaania kûrî oogo ta aana baakwa bara mbendeete mûno. 15N'ûntû wana ûkeegua i bûrî na aarimû ngiri îkûmi ndeni ya Kîrîstû, bûtirî na baabaagu ba gîîkîrundu baingî. Ndatuîkire abaagu ndeni ya Kîrîstû Yiesû rîra ndabûtûmîîrie ntheto yake îmbega. 16Kwoogu ndîbwîra ngîkinyagîîria atî, bûthingate ngerekano yakwa. 17Gîku i kîo gîgûtûma ntûma kîrî biû mwana wakwa ûra mbendeete mûno na mwîtîgua ndeni ya Mwathani, ta we Timotheo. Akabûririkania bûra mûkarîre wakwa ûkari ndeni ya Kîrîstû, ta bûra ncurutanaga makanicaani monthe gûntû kunthe.

18Bamwe beenu ibaûyûrîîtwe i wîkumia n'ûntû bûrîthûgaania ntiiya naagu. 19Îndî nkaaya naagu nyuma ya kagiita gatarî karaaya, weegua i kwenda kwa Mwathani. Rîru i rîo nkaamenya inya îra eekumia babu barî n'yo, tatiga mîgambo îra baaragia. 20Ûnene bwa Ngai ti bwa kûgwetagwa akî. Bûrî inya. 21I bûrîkû bwenda kûthuura? Bwenda ndaaya naagu mbûye na kîbooko gîa kûbwaa îkaanûkia na kîo, kana bwenda ndaaya mbwonie wendo na ûbooreru?

Currently Selected:

1 AKORINTHO 4: thk

Highlight

Copy