1 AKORINTHO 3

Aruti ngûgî ba Ngai

1Aruayia na aarayia, ntaaria naabi ta antû ba gîîkîrundu. Ndaariire naabi bûrî bara batongoragîîrua kûrûtha mantû i mawîrirîîria ma kîîmwîrî, bûrî ta tûgenke mantûûni ma gîîkîrîstû. 2Ûrutani bûra ndabûrutanire bwarî ta îria ti ta irio biongwa, n'ûntû bûtikîûmba kûrîa irio. Wana îîndî bûtiûmbana na bio 3n'ûntû bûtongoragua kûrûtha mantû i mawîrirîîria ma kîîmwîrî. Bûkaraga bûkîîganagua rûriitho, bûkîthetanagia na kwathûkana gatîgatî keenu. Gûku ti kwonania bûtirî ba gîîkîrundu na bûrûthaga mantû ma kîîmuntû? 4Rîra muntû augaga, “Niû ndî wa Paûrû,” na ûngî akauga, “Niû ndî wa Apooras,” ti ta kwonania bûrî bûmwe na antû ba kîînthîgûrû?

5Paûrû îîndî n'ûû? Kana Apooras? Tiû n'aruti ngûgî ba Ngai tu, bara twabûteetheerie bweetîgia. Wakîra ûmwe wacietû aarutire ngûgî îra Ngai amwete aruta. 6Niû i kwanda ndaandire mbeû, Apooras amîîtûûrîria rûûyî. Îndî i Ngai aatûmire mbeû înu îkûra. 7Kwoogu ûra aandaga mbeû na ûra amîîtûûragîria rûûyî batiganaanua na Ngai ûra atûmaga mbeû cionthe ikûra. 8Gîtûmi kîa ûra aandaga mbeû na ûra amîîtûûragîria rûûyî i kîmwe, na woora ûmwe waciao akeewa kîewa gîake i Ngai n'ûntû bwa ngûgî yake. 9Mworooto wetû n'ûmwe ngûgîîni ya Ngai, na biû naabi bûrî mûnda wa Ngai kana mwako wake.

10Ndatûmîîre kîewa kîa mwanya kîra Ngai ampete ndaaka mûcingi wa nyomba ta mwaki arî wara, rîru ûngî n'we aaya aakîîra kuuma agu. Îndî nwa mwanka woora mwaki amenyeere bûra agwakanga nyomba îno. 11Gûtirî we aûmba kwanjîîria mûcingi ûngî tatiga ûra wanjîîrue, ta uu Yiesû Kîrîstû. 12Muntû nwa aake kuuma mûcingiini ûyû na thaabu, fetha, maiga ma goro mûno, mbaaû, nyaki, kana na mîboa. 13Ntugû ya mûthia ûkeegua kûrî na kagiita ga kûgeria ngûgî ya woora muntû yonekane bûra îkari. Ngûgî ya woora muntû îgaakûrûkîîrua mwankiini, kaingo yonekana bûra îbuîte bûgana. 14Weegua kîra muntû aakire gîkaûmîîria mwanki akeewa kîewa. 15Îndî weegua kîra muntû aakire igîkaabea i mwanki, ûyu n'uu mûthia wa kîo. Mwaki arî we akoonokua, îndî i taka akoonoka kuuma mwankiini.

16Ka bûtaiyî biû i nyomba ya Ngai na Kîrundu wake atûîre ndeni yenu? 17Muntû akaaya kwînyangia nyomba ya Ngai, Ngai nakaamwînyangia n'ûntû nyomba ya Ngai n'întheru, na i biû yo.

18Bûtikeebenie. Ûkaaya kwîgua kûrî we akûthûgaania n'ûmûûme mantûûni ma nthîgûrû îno, abatîîrue atuîka kîaa kaingo agîa ûûme bwa mma. 19Ûûme bwa mantû ma nthîgûrû i waa kîrî Ngai, wata bûra kwandîkîîtwe *Maandîkooni Maatheru atî, “Agwataga bara baûme na ûûme bwao bongwa.”#Ayubu 5:13 20Na kaîrî kwandîkwa, “Ngai naiyî bûra bara baûme bathûgaanagia. Naiyî mathûgaanio maao i ma ûtheri.”#Cabuurî 94:11 21Kwoogu gûtirî muntû abatîîrue eekumia na antû. Kîra gîntû i kîenu n'ûntû bwa Kîrîstû, 22nwîgue i Paûrû, Apooras, kana Kebas. Naka na kinya nthîgûrû, ûûmbani mwoyooni ûyû na gîkuûni, bira birî oogo îgiitaani rîrî kana rîra rîkaaya, bionthe i bienu. 23Biû naabi bûrî ba Kîrîstû, na Kîrîstû n'we n'wa Ngai.

Currently Selected:

1 AKORINTHO 3: thk

Highlight

Copy