1 AKORINTHO 2

Ntûmîîri ya gîkuû gîa Kîrîstû

1Rîra ndaayire kwenu, aruayia na aarayia, ntaatûmîra mîgambo îmînene kana kîthoomo kîa îgûrû tûbwîra ûkûûyî bwa Ngai.#2:1 Kana: kûbûtûmîîria kîriga kîa Ngai. 2Ndoonire rîra ndî amwe naabi mbwîre mantû ma Yiesû ûra aambirwe mûtharabaani monka, gûtarî ûntû bûngî. 3Kwoogu rîra ndaayire kwenu ntaarî na inya na indainainaga n'ûguaya. 4Ntaabûtûmîîria ntheto îmbega na mîgambo ya ûûme bwa kîîmuntû, mbûkuuyia n'yo. Ntûmîîri yakwa nîonanagia nîarî na inya ya Kîrundu wa Ngai. 5N'ûntû bwa ûgu wîtîgio bwenu ti bwa ûûme bwa kîîmuntû, i bwa kuumania na inya ya Ngai.

Ûûme bwa Kîrundu

6Tûtûmagîra ûûme kwaria na bara barî baagima wîtîgioni. Îndî ûûme bûbû ti bwa kîînthîgûrû kana bwa kuuma kîrî anene ba nthîgûrû îno bara batagîkarakaranga. 7Ûûme bûra twaragia bûkoneetie kîriga kîra Ngai atwoneetie. Mbere ya nthîgûrû yûmbwa Ngai naabangîîte na ûûme wabûbu gûtûreeta mwagooni, îndî abwitha mwanka îîndî. 8Gûtirî we wa anene ba nthîgûrû îno aaciûkîrwa amenya ûûme bûbû. Ûkaaya kwîgua baaciûkîîrwe batikîamba Mwathani ûra arî mwago mûtharabaani. 9Îndî na rîo wata bûra kwandîkirwe *Maandîkooni Maatheru,

“Gûtirî muntû oona,

gûtirî muntû eegua,

na gûtirî muntû aaromenya

kîra Ngai aathuuranîrîte bara bamwendeete.”#Isaaya 64:4; 65:17

10Îndî tiû natûgwûrîrîte na Kîrundu wake mantû mamu. Kîrundu nwa amenye mantû monthe wana kinya mantû ma ndeni mûno ma Ngai. 11Wata bûra kîrundu kîa woora muntû kîmwiyî bûra bunthe akari, i ta bu Kîrundu wa Ngai aiyî mantû monthe ma Ngai. 12Tiû Kîrundu ûra twetwe ti kîrundu gîa kîînthîgûrû, i Kîrundu kuuma kîrî Ngai kaingo tûûmba kûmenya bûra Ngai atûtugîîte bûgana. 13Na tûtiaragia mantû mara twaragia na mîgambo îra twarutanirwe na ûûme bwa kîîmuntû. Tûtûmagîra mîgambo îra twarutanirwe na ûûme i Kîrundu wa Ngai. Tûtaûraga mantû ma gîîkîrundu ma ntheto îmbega na mîgambo ya gîîkîrundu.#2:13 Kana: tûtaûragîra bara barî na Kîrundu mantû ma Kîrundu. Kana: tûbuanaanagia mantû ma gîîkîrundu na mantû ma gîîkîrundu. 14Muntû wa kîînthîgûrû atiûmba kûgwata mantû ma Kîrundu wa Ngai. Kîrî we oonaga marî waa. Aticiûkîrwa amenya bûra makuuga n'ûntû mathûkagua i ma mma i Kîrundu. 15Muntû wa gîîkîrundu nwa amenye ûmma bwa ûntû bunthe, îndî we gûtirî muntû aûmba kûmûgiitîra îgamba. 16Maandîko Maatheru maugîîte,

“N'ûû aaromenya mathûgaania ma Mwathani?

N'ûû aûmba kûmûrutana ûntû?”#Isaaya 40:13

Îndî tiû itwiyî bûra mathûgaania ma Kîrîstû makari.

Currently Selected:

1 AKORINTHO 2: thk

Highlight

Copy