SAKARIA, 9
9
O LE MATAUPU IX.
O le maliu mai o le tupu i Siona.
1O le avega o le afioga a Ieova i le nuu o Hataraka, a o Tamaseko o lona malologa lea; auā e uai atu ia Ieova o mata o tagata, mai itu aiga uma o Isaraelu. 2O Amato foi o loo tuaoi ai; o Turo ma Saitonu e ui lava ona sili lona poto. 3Ua faia foi e Turo le ‘olo mōna, ma ua faafaupue le ario e pei o le efu, ma le auro e pei o le eleele i fafo. 4Faauta, e tulia o ia e le Alii; na te taia foi lona malosi ia paū i le sami; e faaumatia foi o ia i le afi. 5E vaai atu i ai Asekelona, ona mata‘u ai lea; o Kasa foi e vaai i ai o ia, ona tiga tele ai lea, atoa ma Ekerona; auā ua faamāina lona faatuatuaga, e fanoia foi le tupu o Kasa, ma Asekelona e le āina ia. 6E mau le tagata ese i Asetota; ou te faaumatia foi le matagofie o Filisitia. 7Ou te aveesea lona toto ai lona gutu, atoa ma ana mea e inosia nai le va o ona nifo; e faatoeina foi o ia lava mo lo tatou Atua; e fai o ia e pei se alii ia Iuta, a o Ekerona e pei o le sa Iepusē o ia. 8Ou te to lauapi i lo‘u fale e sioma‘i ona o le itu taua, i lo latou alu atu ma lo latou foi mai; e le toe alu atu lava lē faasaua ia te i latou; auā o lenei, ua vaavaai o‘u lava mata.
9Ia e matuā fiafia o oe le tama fafine a Siona; ia alaga fiafia o oe le tama fafine a Ierusalema; faauta, o le a alu atu lou Tupu ia te oe; o ia o le amiotonu ma le faaola; e agamalu o ia, o loo tietie i le asini, o le tamai asini foi. 10Ou te faaumatia le kariota i Efaraima, ma le solofanua i Ierusalema, e faaumatia foi le aufana o le taua; na te tautala foi i le leleiga i nuu ese; o lana pule e pau mai i le sami e oo atu i le sami, e pau mai i le vaitafe e oo i tuluiga o le lalolagi. 11O oe foi, ona o le toto o lau feagaiga, ou te tuu atu ai ou tagata ua noanoa e o ese i le lua e le i ai se vai. 12Ina foi mai ia i le ‘olo, outou ua noanoa ua i ai le faamoemoe; o lenei lava aso ou te ta‘utino atu, ou te toe avatu faalua ia te oe. 13Auā ua ou lo‘ua Iuta mo a‘u; ua ou tuu Efaraima i le fu‘a o le aufana; ou te faaoso atu foi i ou tagata Siona e, e tetee atu i ou tagata Iavana e; ou te faia foi oe peiseai se pelu a se toa. 14E vaaia Ieova i o latou luga; e alu atu lana u e pei o le uila; e ili mai le pu e le Alii o Ieova; e alu atu foi ia i afā o le itu i toga. 15O Ieova o ‘au, o ia na te faamamalu ia te i latou; latou te aai, ma soli i lalo i maa o le maatā; latou te feinu, latou te pisapisaō pei o e inu uaina; e faatumuina i latou, pei o se ipu, pei o tulimanu o le fata faitaulaga. 16E faaolaina i latou e Ieova lo latou Atua i lena aso; e pei o le lafu mamoe lona nuu; auā e fai i latou ma maa o le palealii; o loo siitia i luga i latou i lona laueleele. 17Auā ua tele naua lona lelei, e tele naua lona matagofie; e faamalosia taulelea i le saito, ma taupou e faamalosia ia i le uaina.
Currently Selected:
SAKARIA, 9: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
