TITO, 1

O LE MATAUPU I.

O le apoapoaiga ia Tito ia faamalosi o ia i lana galuega.

1 O a‘u o Paulo, o le auauna a le Atua, ma le aposetolo a Iesu Keriso, ona o le faatuatua o e ua filifilia e le Atua, ma le iloa lelei o le upu moni e iu ai i le amio Atua, 2i le faamoemoe i le ola e faavavau, na folafolaina mai talu mai tausaga o le vavau e le Atua e le mafai ona tala pepelo; 3a ua faalia mai lana lava afioga i ona po e tatau ai i le tala‘iga ua tuuina mai ia te au, e tusa ma le poloaiga a le Atua lo tatou Faaola; 4o la‘u tusi lenei ia Tito lo‘u lava atalii i la le faatuatua ua tuu tele, ia ia te oe le alofa tunoa, ma le alofa, ma le manuia mai le Atua le Tamā, atoa ma le Alii o Iesu Keriso lo tatou Faaola.

5O le mea lenei na ou tuu ai oe i Kereta, ina ia e faatonuina mea ua totoe, ma ia e tofia toeaina i lea aai ma lea aai, faapei ona ou fai atu ai ia te oe; 6ai se tasi e le mata‘uleagaina, o le tane a le fafine e toatasi, o i ai ana fanau e faatuatua, e lei ta‘ua i latou ua ulavavale pe soli i tulafono. 7Auā e tatau lava i le epikopo ona le mata‘uleagaina o ia, auā o ia le auauna e tausi i mea a le Atua; e le finau vale, e le itagofie, e le inu tele i uaina, e le fasi tagata, e le manumanu i oloa; 8a o lē alofa i tagata ese, o lē alofa i e amio lelei, o lē faautauta, o lē amiotonu, o lē amio Atua, ma le le gaoiā; 9o lē taofi mau i le upu moni, faapei ona a‘oa‘oina o ia, ina ia mafaia e ia ona apoapoai atu i le mataupu e ola ai, ma aoai atu i e finau mai. 10Auā e toatele o e solitulafono ua tautalatala i upu le aoga ma faasese atu, a e sili musa le au peritome; 11e tatau ina punitia o latou gutu; ua latou faaliliu ese i nisi aiga atoa, o loo a‘oa‘o i mea le tatau, ina ua matapeapea i le oloa. 12Sa faapea mai le tasi o i latou, o sa latou lava perofeta, O tagata Kereta, e sagasaga tala pepelo lava i latou, o manu feai leaga, o e usuusua‘i ina ‘ai. 13O le molimau moni lava lea. O le mea lea ia maamaai ona e aoai atu ai ia te i latou, ina ia latou faamaoni i le faatuatua; 14aua ne‘i taofi i tala o le vavau faa-Iutaia, ma poloaiga a tagata o e liliu ese i le upu moni. 15Ua mamā mea uma i e ua loto mamā, a o e loto eleelea ma le le faatuatua, e le mamā ia te i latou se mea e tasi, a ua eleelea o latou mafaufau atoa ma o latou loto fuatia ifo. 16Ua latou ta‘u ane ua latou iloa le Atua, a e faafiti ia te ia i a latou galuega, o inosia i latou ma faalogogata, latou te le faamaoni foi i se galuega lelei e tasi.

Currently Selected:

TITO, 1: SOV

Highlight

Copy