II TIMOTEO, 4
4
O LE MATAUPU IV.
Ua fai atu Paulo ia faamalosi Timoteo.
1O lenei ou te matuā fai atu ia te oe i luma o le Atua ma le Alii o Iesu Keriso, o le na te faamasinoina o e ola atoa ma e ua oti, pe a oo i lona faaali mai ma lona malo; 2ia e tala‘i atu le upu, ia e faamalosi i ona aso e taugalemu ai, ma ona aso e le taugalemu ai, ia e faatonu atu, ia e aoai atu, ia e apoapoai atu ma le onosai uma atoa ma le a‘oa‘o atu. 3Auā e oo i ona po latou te le mafafai ai ona talia o le mataupu e ola ai, a e tusa ma o latou lava tu‘inanau, latou te faapotopoto ai a‘oa‘o mo i latou, ina ua feū o latou taliga; 4latou te liliu ese foi o latou taliga i le upu moni, a e liliu atu i tala o le vavau. 5A o oe, ia e faautauta i mea uma lava, ia e onosai i mea e tiga ai, ia e fai le galuega a lē folafola le tala lelei, ia e matuā faaiuina lau faiva. 6Auā o a‘u ua faamaligiina nei lo‘u toto, ua lata ona po ou te alu ai. 7Ua ou tau le taua lelei, ua iu ia te au le tausinioga, ua ou taofi i le upu o le faatuatua. 8O lenei, ua teuina mo a‘u le pale o le amiotonu, e foaiina mai ia te au i lea lava aso o le Alii le faamasino amiotonu; e le gata foi ia te au, a o i latou uma lava o e fiafia i lona faaali mai.
9Ia e taumafai ona sau ia te au ia vave lava; 10auā ua tuulafoaiina a‘u e Tema, ina ua manao ia i lenei olaga, ua alu foi i Tesalonia; o Kerese ua alu ia i Kalatia, o Tito ua alu ia i Talamatia; 11na o Luka o loo ia te au. Ia oulua o mai ma Mareko; auā e aoga ia ia te au i le galuega. 12Ua ou auina atu Tuiko i Efeso. 13A ē sau, ia e au mai le ofu talaloa na tuu e a‘u i Teroa, o loo ia Kaapo, atoa ma tusi, a e tautuana a pa‘u e tusi ai ne‘i tuu. 14E tele mea leaga na faia ia te au e Alesana le fai mea ‘apa memea; ia taui atu e le Alii ia te ia e tusa ma ana galuega. 15Ia oe foi ia te ia, auā ua na matuā tetee mai i a tatou upu. 16O la‘u uluai faatonu atu e lei faatasi mai ai se tasi ia te au, a ua lafoai mai e tagata uma lava ia te au; aua ne‘i tauiina atu ia te i latou 17a e peita sa ia te au le Alii, ma na faamalosi mai ia te au; ina ia faaatoatoaina e a‘u le tala‘iga, ina ia faalogologo i ai o nuu uma lava; ua laveaiina foi a‘u ai le gutu o le leona. 18E laveai mai foi le Alii ia te au ai mea leaga uma, ma faaola mai ia te au ia oo i lona malo i le lagi; ia ia te ia le viiga e faavavau faavavau lava. Amene.
19Ua ou alofa atu ia Piseka ma Akula, ma le aiga o Oneseforo. 20Ua nofo pea Erato i Korinito; a o Tofimo na tuua o ia e a‘u i Meleto o ma‘i. 21Ia e taalise mai a o lei oo i le tausaga maalili. O alolofa atu ia te oe o Eupolo, ma Paute, ma Lino, ma Kalaotia, ma le au uso uma lava. 22Ia i ai i lou agaga le Alii o Iesu Keriso. Ia ia te outou le alofa tunoa. Amene.
Currently Selected:
II TIMOTEO, 4: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
