ROMA, 15

O LE MATAUPU XV.

O le tala i le galuega a Paulo.

1O i tatou o e malolosi ia tatou fesoasoani i le vaivai o e ua le lavā e tatau ai; a e aua ne‘i faafiafia i o tatou lava loto. 2Auā ia taitasi o i tatou ma faafiafia i lē la te tuaoi ina ia lelei ai o ia, e faamafanafanaina ai. 3Auā o Keriso lava e lei faafiafia o ia i lona lava finagalo; a e pei ona tusia, Ua oo mai ia te au upu faifai a latou e na faifai atu ia te oe. 4O mea uma foi na tusia anamua, na tusia ia e a‘oa‘o mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi. 5Ia foai atu foi ia te outou e le Atua o ia e tupu mai ai le onosai ma le faamafanafana, ina ia gatasitasi o outou loto e tusa ma le finagalo o Keriso Iesu; 6ina ia vivii outou i le Atua, le Tamā o lo tatou Alii o Iesu Keriso, ma le loto e tasi, ma le upu e tasi. 7O lea ia outou talia ai le tasi e le tasi, faapei o Keriso foi ona talia o i tatou, e oo ai le viiga i le Atua.

8Ou te fai atu foi, ua avea Iesu Keriso ma auauna o le peritomega, ona o le faamaoni o le Atua, ina ia faamauina ai mea na folafolaina i tupuga; 9ina ia vivii foi nuu ese i le Atua ona o le alofa, pei ona tusia, O le mea lea ou te ta‘uta‘ua ai oe i nuu ese, ou te pese atu foi i lou suafa. 10Ua toe faapea foi, Ia olioli outou nuu ese faatasi ma lona nuu; 11i le ma lea, Ia vivii atu i le Alii outou nuu uma, ia faaneenee atu ia te ia outou tagata uma lava. 12Ua toe faapea mai foi Isaia, E i ai le Aa o Iese; o ia foi na te tulai e pule i nuu ese, e faatuatua ia te ia nuu ese. 13O le Atua foi e tupu mai ai le faamoemoe, ia faatutumuina outou e ia i le olioli uma atoa ma le filemu, ina ua faatuatua; ina ia tele lava lo outou faamoemoe ona o le mana o le Agaga Paia.

14O‘u uso e, ua ou mautinoa, o a‘u nei lava, ua tutumu outou foi i le agalelei, ua apepele i le poto uma lava, ua outou mafaia foi ona apoapoai le tasi i le tasi. 15Ua ou tusi atu nisi mea ia te outou, le au uso e, ma le faamalosi, i lo‘u faamanatu atu ia te outou, ona o le alofa tunoa ua foaiina mai ia te au e le Atua; 16ina ia avea a‘u ma auauna a Iesu Keriso i nuu ese, ou te faia le faiva o ositaulaga i le tala lelei a le Atua; ina ia talileleia le taulaga a nuu ese, ina ua faapaiaina e le Agaga Paia. 17O lea ia ia te au ni mea e mitamita ai ona o Keriso Iesu, i mea tau le Atua. 18Auā ou te le faamalosi ona ta‘u atu i mea e lei galue ai Keriso ia te au, ia iu ina gauai o nuu ese, i le upu ma le amio, 19i le mana o faailoga ma vavega, i le mana o le Agaga o le Atua; o lea e afua mai ai i Ierusalema, ma faataamilomilo e oo i Iluriko, ua ou matuā folafola le tala lelei a Keriso. 20A e faapea ona ou loto malosi e tala‘i le tala lelei i mea sa le ta‘ua ai le suafa o Keriso; ina ne‘i ou ati ae i luga o le faavae o se tasi tagata. 21A e peitai e faapei ona tusia, E vavavaai i latou o e na le tala‘iina i ai le tala ia te ia; e lagona e i latou o e na le faalogo atu i ai. 22O lea foi e tele mea sa le mafai ai ia te au ona alu atu ia te outou. 23A o lenei, ua leai se toe mea ou te faia i nei nuu, ma ua tele tausaga sa ou matuā fia alu atu ai ia te outou; 24a a‘u alu malaga i Sepania, ona ou alu atu ai lea ia te outou; auā ou te faamoemoe ou te asiasi atu ia te outou i la‘u malaga, e molia foi a‘u e outou i lea mea pe a ou muai mălie teisi i lo tatou feiloai ma outou. 25A o le a a‘u alu malaga nei i Ierusalema, ou te auauna atu ai i le au paia; 26auā ua loto Maketonia ma Akaia e sauni se alofa fai tele i e matitiva o le au paia o i Ierusalema. 27Ua latou loto foi i ai; sa ia te i latou foi a latou mea; auā afai ua molia i nuu ese e i latou a latou mea i la le Agaga, e tatau ina latou faia se taulaga ia te i latou i mea a le tino. 28O lenei, pe a ou faauma lenei mea, ma faasaogalemu atu lenei fua ia te i latou, ou te ui atu ai ia te outou pe a ou alu atu i Sepania. 29Ua ou iloa foi, pe a ou alu atu ia te outou, ou te alu atu ma le atoatoa o le manuia o le tala lelei a Keriso. 30Le au uso e, ou te aioi atu ia te outou, ona o lo tatou Alii o Iesu Keriso, ma le alofa o le Agaga, ia outou matuā finafinau faatasi ma a‘u i talosaga i le Atua mo a‘u; 31ina ia laveaiina a‘u i e ua le faatuatua o i Iutaia, ia talileleia foi e le au paia la‘u feau i Ierusalema; 32ina ia ou alu atu ia te outou ma le olioli, i le finagalo o le Atua, ina ia tatou fefaamafanafanai ma outou. 33Ia ia te outou uma lava le Atua e ona le manuia. Amene.

Currently Selected:

ROMA, 15: SOV

Highlight

Copy