ROMA, 14

O LE MATAUPU XIV.

Aua le fefaasalai i mea ua taofi eseese ai.

1Ia outou talia le ua vaivai i le faatuatua, a e le ina ia faamasinoina o masalosaloga. 2O le taofi o le tasi, e ‘aina mea uma lava; a e ‘aina e le ua vaivai na o mea e tutupu i le laueleele. 3Aua ne‘i ta‘ufaatauvaaina lē ‘ai i le le ‘ai ma le ua le ‘ai, auā ne‘i faasala o ia i le ua ‘ai; auā ua talia o ia e le Atua. 4O ai ea oe lē faasala atu i le auauna a le tasi? E tumau ia pe paū i lona lava alii; a e faatumauina lava ia, auā e mafaia e le Atua ona faatumau ia te ia. 5O le manatu o le tasi, e sili le tasi aso i le tasi aso; a o le manatu o le isi, ua tutusa aso uma lava. Ia taitoatasi ma mautinoa lona lava manatu. 6O lē anaana i le aso, e anaana o ia i ai ona o le Alii; o le le anaana foi i le aso, e le anaana i ai o ia ona o le Alii; o lē ‘ai, e ‘ai o ia ona o le Alii, auā ua faafetai i le Atua; o le lē ‘ai foi, e lē ‘ai o ia ona o le Alii, ua ia faafetai foi i le Atua. 7Auā e leai so tatou e ola mo ia lava, e le oti foi se tasi mo ia lava; 8auā afai tatou te ola, tatou te ola mo le Alii, pe afai e oti, e oti mo le Alii; o lenei, pe ola pe oti i tatou, o tagata lava o le Alii i tatou. 9Auā o le mea lava lea na maliu ai Keriso, ma ua toe tu mai ai, ma ua soifua ai, ina ia faia o ia ma Alii i e ua oti atoa ma e o ola. 10O oe na, se a le mea e te faasala ai i lou uso? o oe na foi, pe se a le mea e te ta‘ufaatauvaaina ai lou uso? auā tatou te laulaututū uma lava i luma o le nofoa faamasino o Keriso. 11Auā ua tusia, Ua fetalai mai le Alii, Ou te ola a‘u, e tootuli mai ia te au o tulivae uma lava, e ta‘uta‘u mai foi o laulaufaiva uma lava i le Atua. 12O lenei, e taitasi i tatou ma tala i lana amio i le Atua. 13O lenei, aua ne‘i tatou toe fefaasalai; a e lelei ina ia manatu i lenei lava mea, aua ne‘i tuu ane e se tasi se mea e tausuai ai, po o se mea e tautevateva ai lona uso. 14Ua ou iloa ma ou mautinoa i le Alii o Iesu, e leai se mea e leaga fua; peitai o se ua manatu ua leaga le mea, ona leaga ai lea ia te ia. 15A e afai e faatigaina lou uso i au mea e ‘ai, ua e le toe amio alofa; aua le fano i au mea e ‘ai o ia na maliu ai Keriso. 16O lenei, aua nei ta‘uleagaina lo outou lelei. 17Auā o le malo o le Atua, e le o mea e ‘ai ma mea e inu; a o le amiotonu, ma le filemu, ma le olioli i le Agaga Paia. 18Auā o le ua auauna atu ia Keriso i ia mea, ua fiafia i ai le Atua, ua ta‘uleleia foi o ia e tagata. 19O lenei, ia tatou tausisi i mea e tupu ai le filemu, ma mea e fefaamafanafanai. 20Aua le lepetia le galuega a le Atua ona o mea e ‘ai; e mamā mea uma a e leaga i le tagata o lē ‘ai ma le tausuai. 21E lelei pe a le ‘ai ni aano o manu, ma ia le inu uaina, po o se tasi mea e tausuai ai lou uso, pe tautevateva ai, pe vaivai ai. 22Ua mau ea lou taofi? ia ia te oe lava ia i luma o le Atua; amuia le ua le faasalaina o ia e ia i le mea ua manatu o ia e tatau. 23A o lē masalosalo, ua faasalaina ia pe afai e ‘ai, auā e le o lana taofi lea; o mea uma lava e le ala mai i le taofi, o le agasala lea.

Currently Selected:

ROMA, 14: SOV

Highlight

Copy