FAATAOTO, 9
9
O LE MATAUPU IX.
O le amio a le poto. O le tu a le ua valea.
1O le poto ua faia e ia lona fale; ua ia talai ona pou e fitu. 2Ua na fasia ana manu; ua na suia lana uaina; ua na laulau atu foi mea i lana laoai. 3Ua ia auina atu lona galu teine; ua tala‘i i mea maualuluga o le aai, 4Ai se faigofie, ia afe mai o ia iinei; o le ua leai sona mafaufau, ua ia faapea atu i ai, 5O mai ia, ina aai la‘u areto, ma inu i la‘u uaina ua ou suia. 6Ia outou tuulafoai atu i e valelea, tou te ola ai; ma ia outou ui atu i le ala e atamai ai. 7O le na te aoai atu i lē tauemu e maua e ia le faamāina; ma le la te finau ma le tagata amio leaga e maua a ia le ila. 8Aua ne‘i aoai atu i lē tauemu, ne‘i inosia oe e ia; aoai atu i le ua poto, ona alofa mai lea o ia ia te oe. 9A‘oa‘o atu i le ua poto e atili poto ai o ia; a‘oa‘o atu i le ua amiotonu e tupu ai pea lona poto. 10O le mata‘u ia Ieova, o le amataga o le poto lea; ia iloa foi lē Paia, o le atamai lava lea. 11Auā o a‘u e faateleina ai ou aso; e faaopoopoina ai foi tausaga i lou olaga. 12Afai e te poto, mo oe lava e te poto ai; afai e te tauemu, na o oe lava e nofo sala ai.
13O le fafine valea, ua leoleoa lava ia, e faigofie lava o ia, na te le iloa se mea. 14Ua nofo o ia i le faitotoa o lona fale, i luga lava o le nofoa i mea maualuga i le aai; 15ina ia valaau i e ui ane i le ala, o e savavali tonu i o latou ala. 16O sē faigofie, ia afe mai o ia iinei; o le ua leai sona mafaufau, ua ia faapea atu i ai, 17E suamalie le vai ua gaoia, e manogi foi le areto ua natia. 18A ua le iloa e ia o i lea mea agaga o e ua oti; ua i mea maulalo o seoli e ua valaauina e ia.
Currently Selected:
FAATAOTO, 9: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
