FAATAOTO, 10
10
O LE MATAUPU X.
(There is no heading for this chapter) 1O faataoto a Solomona.
O le atalii poto na te faafiafia lona tamā; a o le tama valea e faanoanoa ai lona tinā. 2E le aoga le faulaigāoloa o le amio leaga; a o le amiotonu, e laveai lea nai le oti. 3E le faalāina e Ieova o e amiotonu; a o le manao o e amio leaga, e teena lea e ia. 4E mativa le ua galue ma le lima vaivai; a o e lima malosi e mauoa i latou. 5O lē faaputu i le tausaga vevela, o le atalii poto lea; a o lē moegase i le tausaga e selesele ai saito, o le atalii lea e tupu ai le mā. 6O faamanuia ua i luga o le ulu o lē amiotonu; a o gutu o e amio leaga, ua ufitia ia i le faasaua. 7O le faamanatuina o lē amiotonu, e viia lava lea; a o igoa o e amio leaga, e pala ia. 8O le ua poto lona loto, na te talia poloaiga; a o le ua gutu vale, e lafotuina ia. 9O lē savali i le amiotonu, ua savali ma le saogalemu o ia; a o lē faapiopio ona ala, e faaalia o ia. 10O le ua genogeno ona mata, na te faatupuina le tiga; o le ua gutu vale foi, e lafotuina ia. 11O le gutu o lē amiotonu, o le puna o le ola lea; a o gutu o e amio leaga, ua ufitia ia i le faasaua. 12O le ‘ino‘ino e faatupu ai misa; a o le alofa e ufiufi ai solitulafono uma lava. 13Ua iloa le poto i laugutu o lē mafaufau; a o le sasa, e tatau lea i le tua o le ua leai sona mafaufau. 14O e popoto latou te teua le poto; a o le gutu o le vale, ua latalata i ai le malaia. 15O le oloa o le mauoa, o lona ‘olo malosi lea; a o le mativa o e matitiva, o lo latou malaia lea. 16O le galuega a lē amiotonu, e iu lea i le ola; a o mea e maua e le ua amio leaga, e iu lea i le sala. 17Ua i le ala o le ola o lē tausi i mea e a‘oa‘oina; a o le ua tuua le aoaiga, ua sese lea. 18O le ua ufiufi le ‘ino‘ino, ua ia te ia laugutu pepelo; ma le ua fai tala leaga, o le vale lava ia. 19O le tele o upu e le oge solitulafono ai; a o le ua taofi ona laugutu, o le tagata poto lea. 20O le laulaufaiva o lē amiotonu, o le ario e sili ona lelei lea; o loto o e amio leaga, e tusa ia ma se mea faatauvaa. 21O laugutu o lē amiotonu e fagaina a‘i le toatele; a o e valelea, e oti i latou ina ua leai se mafaufau. 22O le faamanuia a Ieova, o lea e faatamaoaiga a‘i; na te le faaopoopo i ai se tiga. 23E pei ona fai ma mea e ‘ata‘ata ai le vale ina ua fai mea leaga; e faapea foi le poto i le tagata mafaufau. 24O le mea e mata‘u i ai lē amio leaga, e oo lava lea ia te ia; a o le manao o e amiotonu, e foaiina mai lava lea. 25E pei ona mavae atu o le asiosio, ua faapea foi le ua amio leaga ona leai; a o lē amiotonu, ua i ai faavae e faavavau. 26E pei o le vineta i nifo, e pei o le asu foi i mata, e faapea le paie i e ua auina o ia. 27O le mata‘u ia Ieova e faalevaleva ai aso; a o tausaga o e amio leaga, e faaitiitiina ia. 28O le faamoemoe o e amiotonu o le olioli lea; a o le faatuatuaga o e amio leaga, e iu vale lea. 29O le ala o Ieova o le malosi lea i e ua sao a latou amio; a o le malaia o e fai amio leaga. 30O le ua amiotonu e le faagaeetia lava o ia e faavavau; a o e amio leaga, e le mau i latou i le nuu. 31O le gutu o lē amiotonu e fua mai ai le poto; a o le laulaufaiva faapiopio, e vavaeeseina lea. 32O laugutu o lē amiotonu ua iloa ia o mea mālie; a o gutu o e amio leaga, e faapiopio ia.
Currently Selected:
FAATAOTO, 10: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
