FAATAOTO, 12
12
O LE MATAUPU XII.
1O le ua fiafia ina a‘oa‘oina, ua fiafia o ia i le poto; a o lē ‘ino‘ino i le aoaiga, o le vale lea. 2O le tagata amio lelei, e maua e ia le alofa mai ia Ieova; a o le tagata ua fai togafiti leaga, e faasalaina lea. 3E le faatumauina le tagata i le amio leaga; a o le pogai o e amiotonu, e le faagaeetia lea. 4O le avā amio lelei, o le pale lea i lana tane; a o lē faamā, e tusa o ia ma le mea e pala ai ona ivi. 5O mafaufauga a e amiotonu, ua tonu ia; o pulega a e amio leaga, ua pepelo ia. 6O upu a e amio leaga e lamalama i le toto; a o gutu o e ua sao a latou amio, e laveaiina ai i latou. 7Ua faaumatia ē amio leaga, ua leai lava i latou; a o le fale o e amiotonu, e tumau lava lea. 8E viia le tagata, e tusa ma lona poto; a o le ua loto faapiopio, e inosia lava o ia. 9E lelei lē ua ta‘ufaatauvaaina, a e fai lona tautua; a e leaga le na te vivii o ia ia te ia, a e fia ‘ai. 10Ua faapelepele le tagata amiotonu i lana manu; a o le alofa o e amio leaga, o le sauaga lea. 11O lē galue i lona fanua, e ma‘ona o ia i mea e ‘ai; a o lē mulimuli i tagata faatauvaa, ua leai sona mafaufau. 12E manao lē amio leaga i mea ua maua e tagata amio leaga; a o le pogai o e amiotonu, e fua mai lea. 13Ua i ai le mailei leaga i le solitulafono o laugutu; a e sao lē amiotonu ai le puapuaga. 14E ma‘ona le tagata i mea lelei ai le fua o lona gutu; e taui at foi i le tagata o mea na faia e ona lima. 15O le ala o le vale, ua tonu lea i lona manatu; a o le ua faalogo i le pule, e poto ia. 16E vave iloa le ita o le vale; a o le tagata mafaufau, ua ufiufi e ia lona mā. 17O lē tautala faamaoni, ua faaali mai e ia le tonu; a o le molimau pepelo, ua faaali mai e ia le faa‘ole‘ole. 18O i ai lē soona tautala, e pei o tutu‘i i le pelu; a o laulaufaiva o e popoto e malolo ai. 19O laugutu faamaoni, e faatumauina ia e faavavau; a o le laulaufaiva pepelo, ua se emo o le mata lea. 20O le faa‘ole‘ole, ua i ai lea i loto o e fai togafiti leaga; a o e pule ia filemu, e i ai le olioli. 21E le oo se mea leaga e tasi i lē amiotonu; a o e amio leaga, e tutumu i latou i le leaga. 22E inosia e Ieova o laugutu pepelo; a o e fai mea faamaoni, e fiafia i ai o ia. 23O le tagata mafaufau, na te ufiufi lona poto; a o loto o e valelea e faalauaitele lo latou valea. 24E manumalo lima o e filigā i galuega; a o lē paie, e fai taulaga o ia. 25O le atuatuvale i le loto o le tagata ua faavaivai ai o ia; a o le upu lelei e faaolioliina ai. 26O le tagata amiotonu, na te faaali le ala i lana uo; a o le ala o e amio leaga, e faaseseina ai i latou. 27E le tunua e le paie lana manu sa tuli; a o le oloa tāua a tagata, e i ai lea i le ua filigā i galuega. 28O le ala o le amiotonu, o i ai le ola; e leai foi se oti i ona magāala.
Currently Selected:
FAATAOTO, 12: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
