MAREKO, 9

O LE MATAUPU IX.

O le liliueseina o Iesu; o le tagata na uluitinoina e temoni ua faamaloloina.

1Ua fetalai ane foi o ia ia te i latou, E moni, ou te fai atu ia te outou, o loo tutū mai nisi iinei, e le oo ia te i latou le oti, seia latou vaaia le malo o le Atua ona oo mai ma le mana.

2Ua mavae aso e ono, ona o ai lea o Iesu ma Peteru, ma Iakopo, ma Ioane; ua ia avae ia te i latou i le mauga maualuga, ua na o i latou lava; ona liua lea o ia i o latou luma. 3Ua pupula ona ofu, ua matuā pe‘epa‘e lava pei o le kiona; e leai foi se tagata taofu i le lalolagi na te mafaia ona faasinasina faapena. 4Ua faaali mai foi ia te i latou o Elia ma Mose; ua fetautalatala‘i i latou ma Iesu. 5Ona fai mai lea o Peteru ia Iesu, ua faapea mai, Rapi e, e lelei ina tatou nonofo iinei; se‘i matou faia foi ni fale apitaga se tolu; o le tasi mo oe, o le tasi mo Mose, o le tasi mo Elia. 6Auā ua ia le iloa se upu e fai atu, ina ua matautuia i latou. 7Ua oo mai foi le ao ua ufitia ai i latou; ona tŭlei mai lea o le siufofoga mai le ao, ua faapea mai, O lo‘u Atalii pele lena, ina faalogo ia outou ia te ia. 8Ona faafuasei lea ona vaavaai solo o i latou, ua le toe iloa se tasi, ua na o Iesu lava ma i latou. 9Ua o ifo i latou i le mauga, ona vavao atu lea o ia ia te i latou, ne‘i latou ta‘u atu i se tasi o mea sa latou vaaia, seia tu mai le Atalii o le tagata nai e ua oti. 10Ona latou taofi ai lea i lea upu, ma fesueai, pe se a le toe tu mai nai e ua oti. 11Ona latou fesili lea ia te ia, ua faapea mai, Se a le mea e fai mai ai le au tusiupu, e ao ona muai sau o Elia? 12Ona tali atu lea o ia, ua faapea atu ai ia te i latou, E lua‘i sau lava Elia, ma toe fuatai mea uma; pei ona tusia foi i le Atalii o le tagata, e tiga o ia i mea e tele, e inosia foi o ia. 13A ou te fai atu ia te outou, ua mavae ona sau o Elia, ua latou faia foi ia te ia mea uma na latou loto i ai, pei ona tusia ia te ia.

14Ua oo atu ia i le au soo, ona silasila atu lea i le motu o tagata e toetele ua vagaia i latou, ma le au tusiupu ua fesilisili ia te i latou. 15Ua iloa o ia e le motu o tagata uma, ona taufaiofo loa ai lea o i latou, ua latou taufetuli mai, ma fealofani ma ia. 16Ua fesili foi o ia i le au tusiupu, Pe se a se mea tou te fesili ai ia te i latou? 17Ona tali mai lea o le tasi o le motu o tagata, ua faapea mai, Le a‘oa‘o e, ua ou au mai ia te oe lo‘u atalii ua i ai le agaga gūgū; 18so se mea e pue ai ia te ia, ona lafotu ai lea ia te ia, ua fāuā le gutu, ua lilivau ona nifo, ua tino vale ai foi o ia; ua uma foi ona ou fai atu i ou soo ina ia latou tulia o ia, a ua le mafaia e i latou. 19Ona tali atu lea o ia ia te ia, ua faapea atu, Le tupulaga le faatuatua e, tatou te i ai ma outou seia afea? ou te faapalepale ia te outou seia afea? ina au mai ia o ia ia te au. 20Ona latou aumaia lea o ia ia te ia; ua na iloa o ia, ona faataafiti loa lea ia te ia e le agaga, i le ua paū ia i le eleele, ona taafilifili ai lea o ia, ma fāuā lona gutu. 21Ona fesili atu lea o ia i lona tamā, Talu mai anafea ona oo o lena mea ia te ia? Ua fai mai o ia, Talu ina o tama itiiti. 22Ua lafo soo foi o ia ia te ia i le afi, atoa ma le vai, ina ia fano ai o ia; a e peitai ai se mea e te mafaia, ia e alofa mai ia te i matou, ma ia e fesoasoani mai ia te i matou. 23Ona fetalai atu lea o Iesu ia te ia, Afai ua e mafaia ona faatuatua, e mafaia mea uma lava i lē faatuatua. 24Ona alaga loa lea o le tamā o le tama, ua fai mai ma le tagi, Le Alii e, ua ou faatuatua; ia e fesoasoani i lo‘u le faatuatua. 25Ua silafia e Iesu ua taufetuli mai le motu o tagata, ona vavao atu lea o ia i le agaga leaga, ua faapea atu ia te ia. O oe na, le agaga gūgū ma le tutuli, ou te fai atu lava ia te oe, ina e alu i fafo ia te ia, aua foi e te toe alu i totonu ia te ia. 26Ona alaga lea o le agaga, ma faataafiti tele ia te ia, ona alu lea i fafo; ona liua lea o ia peiseai ua oti; ona fai mai ai lea tagata e toatele, Ua oti lava ia. 27A o Iesu ua tago ifo ia i lona lima, ma faatu ia te ia, ona tulai lea o ia. 28Ua maliu ane Iesu i le fale, ona fesili lea o ona soo ia te ia ina ua na o i latou, Se a le mea na matou le mafai ai ona tulia o ia? 29Ona fetalai atu lea o ia ia te i latou, Ua na o le tatalo ma le anapogi e mafai ai ona ō ese o mea faapena.

30Ua tuua foi e i latou lena mea, ua ui ane i Kalilaia; o lona finagalo foi ina ia le iloa o ia e se tasi. 31Auā ua ia a‘oa‘o atu i ona soo, ma fetalai atu ia te i latou, Ua tuuina atu le Atalii o le tagata i lima o tagata, latou te fasioti foi ia te ia; a uma foi ona fasia o ia, e toe tu mai o ia i le aso tolu. 32A o i latou ua le iloa lea upu, ua matatau foi e fesili ia te ia.

33Ua oo ia i Kapanaumi, sa i le fale, ona fesili lea o ia ia te i latou; Pe se a na outou fefinauai ai i le ala? 34A o i latou ua faalologo; auā sa latou fefinauai i le ala po o ai so latou e sili? 35Ua nofo ia i lalo, ona valaau atu lea i le toatinoagafulu ma le toalua, ua fetalai atu ia te i latou, Afai e fia muamua se tasi, e avea o ia ma mulimuli i tagata uma, ma auauna a tagata uma. 36Ona tago lea o ia i le tama itiiti, ua faatu ia te ia i o latou luma; ua na siitia o ia i ona lima, ona fetalai atu lea ia te i latou, 37Ai sē talia se tama itiiti faapenei i lo‘u nei igoa, ua talia e ia o a‘u; ai se talia a‘u, e le o a‘u ua ia talia, a o ia na auina mai a‘u. 38Ona fai mai lea o Ioane ia te ia, ua faapea mai, Le a‘oa‘o e, na matou iloa le tasi ua tutuli temoni i lou suafa, ua ia le mulimuli mai ia te i tatou; na matou vaoia o ia, auā ua ia le mulimuli mai ia te i tatou. 39A ua fetalai atu Iesu, Aua e vaoia o ia; auā e leai se tagata na te faia se vavega i lo‘u nei igoa, na te mafaia ona vave tautala i se upu leaga ia te au. 40Auā foi o le lē ‘au ese ia te i latou, e ‘au faatasi lea ma i tatou. 41O se na te avatua foi se ipu vai ia te outou i lo‘u nei igoa, auā e o Keriso outou; e moni, ou te fai atu ia te outou, e le māumau ia te ia lona taui. 42Ai se na te faatausuaiina se tasi o i latou nei i faatauvaa o e faatuatua mai ia te au, e lelei ia te ia pe ana noatia se maaolo i lona ua, ma lafoina o ia i le moana. 43A faatausuaiina foi oe e lou lima, ina tutū ese ia; e lelei ona e sao i le ola a ua e lima mutu, a e leaga ona lima lua, a e alu i Kēna, i le afi e le mafai ona tineia; 44o i ai e le mamate o latou ilo, e le tineia foi le afi. 45A faatausuaiina foi oe e lau vae, ina tutū ese ia; e lelei ina e sao i le ola ua pipili, a e leaga ona lua ni vae, a e lafoina oe i Kēna, i le afi e le mafai ona tineia; 46o i ai e le mamate o latou ilo, e le tineia foi le afi. 47A faatausuaiina foi oe e lou mata, ina sali ese ia; e lelei ina e sao i le malo o le Atua ma le mata e tasi, a e leaga ona lafoina oe ma ou mata e lua i le afi o Kēna; 48o i ai e le mamate o latou ilo, e le tineia foi le afi. 49Auā e taitasi uma ma faamasimaina i le afi, e taitasi foi taulaga uma ma faamasimaina i le masima. 50O le mea lelei le masima, a e afai e magalo le masima, se a se mea tou te faamāi a‘i? Ia ia te outou le masima, ma ia fifilemu outou ia te outou.

Currently Selected:

MAREKO, 9: SOV

Highlight

Copy