MAREKO, 13
13
O LE MATAUPU XIII.
O le valoaga a Iesu i le faaumatia o le malumalu.
1Ua ulufafo o ia i le malumalu, ona fai mai lea o le tasi o ona soo ia te ia, Le a‘oa‘o e, ina silasila ia i nei maa ua tetele lava, ma nei fale, ua tetele lava! 2A ua tali atu Iesu ia te ia, ua faapea atu, Ua e iloa ea nei fale tetele? e le tuua le tasi maa i luga o le tasi maa, a e uma lava ona sŏloia i lalo. 3Ua nofo o ia i le mauga o Olive, e feagai ma le malumalu, ona fesili lemu lea ia te ia o Peteru, ma Iakopo, ma Ioane, ma Aneterea, 4Se‘i e ta‘u mai ia te i matou, pe fai afea ia mea? pe se a foi le faailoga pe a lata ona taunuu o ia mea uma? 5Ona tali atu lea o Iesu ia te i latou, ua faapea atu, Ia outou, ne‘i faaseseina outou e se tasi; 6auā e toatele e o mai i lo‘u nei igoa, ma faapea ane, O a‘u o ia, latou te faaseseina foi tagata e toatele. 7Pe a tou faalogo i taua ma tala o taua, aua tou te atuatuvale; auā e tupu lava ia mea; a e lei oo i le gataaga. 8Auā e sii le taua e le tasi nuu i le tasi nuu, o le tasi malo foi i le tasi malo; e i ai foi mafuie i lea mea ma lea mea, e i ai foi oge ma fouvale; o amataga ia o puapuaga. 9Ia outou ia te outou; auā e tuuina atu outou e i latou i fono, ma sasaina outou i sunako; e tutū foi outou i luma o alii ma tupu ona o a‘u, e fai ma molimau ia te i latou. 10Ia muai tala‘iina foi le tala lelei i nuu uma lava e ao ai. 11Pe a latou ta‘ita‘iina ma tuuina atu outou, aua ne‘i muai manatu i sa outou e fai atu ai, aua foi le lua‘i fatufatua‘i; a o se mea e foaiina ia te outou i lena itu aso, o lea tou te fai atu ai; auā e le o outou e fai atu ai, a o le Agaga Paia. 12E tuuina atu foi le uso e le uso ia oti, e tuuina atu foi e le tamā lona atalii, e tutū atu foi le fanau i o latou mātua, ina ia fasiotia i latou. 13E inosia foi outou e tagata uma ona o lo‘u igoa; a o lē tumau seia oo i le iuga, e faaolaina lea.
14Pe a outou iloa le mea e inosia e faatafunaina a‘i, ua fai mai ai e Tanielu le perofeta, ua tu i le mea e le tatau ai, (o lē faitau ia mafaufau ia;) o e o i Iutaia i ia ona po, ia latou sosola i mauga; 15o le ua i luga o le fale, aua ne‘i alu ifo ia i le fale, aua foi ne‘i ulu ai e ave se mea ai lona fale; 16o le ua le vao foi, aua ne‘i toe foi o ia e ave lona ofu. 17Oi talofa foi i fafine totō, ma ē failele i na ona aso! 18A ia outou tatalo ina ne‘i sosola outou i le tausaga maalili; 19auā o ia ona aso e i ai le puapuaga, e leai sona tusa talu lava le amataga o mea na faia e le Atua, ua oo mai i ona po nei, e le toe faapea foi amuli. 20Afai foi e le faapuupuuina ia aso e le Alii, e leai se tagata e faaolaina; a e peitai ona o le au filifilia ua filifilia e ia ua ia faapuupuuina ai ia aso. 21Afai foi e foi ane se tasi ia te outou i ia ona po, Faauta, o iinei le Keriso; pe faapea, Faauta, o iilā; aua ne‘i faalogo i ai. 22Auā e tutū mai Keriso pepelo, ma perofeta pepelo, ma latou faia faailoga ma vavega, ina ia faasese a‘i e ua filifilia lava, pe afai e mafai ai. 23Ia outou; faauta, ua ou muai ta‘uina atu ia te outou ia mea uma. 24O aso foi ia pe a mavae atu lena puapuaga, e faapogisaina ai le la, e le susulu mai foi le masina, 25e pauu mai fetu o le lagi, e luluina foi ‘au a le lagi. 26Ona iloa atu lea e i latou o le Atalii o le tagata ua sau i ao ma le mana tele ma le mamalu. 27Ona aauina mai lea e ia o ana agelu, latou te faapotopotoina e ua filifilia e ia mai matāmatagi e fa; e amata i le tulu‘iga o le lalolagi e oo atu i le tulu‘iga o le lagi.
28Ia outou mātau i le faataoto i le mati; pe a faatoa tutupu ona tatupu, ma matala mai ona lau, ona outou iloa ai lea ua latalata mai le tausaga vevela. 29E faapea foi outou, pe a iloa ia mea ua tutupu mai, ia outou iloa ua latalata mai ia, ua i faitotoa lava. 30E moni, ou te fai atu ia te outou, E le mavae lenei tupulaga, seia taunuu ia mea uma. 31E mavae atu le lagi ma le lalolagi; a e peitai a‘u upu, e le mavae lava ia. 32A o lea aso ma lea itu aso e le iloa e se tasi, e le iloa lava e agelu i le lagi, po o le Atalii; ua na o le Tamā lava. 33Ia outou, ina mataala ia ma tatalo, auā tou te le iloa pe oo mai afea ia aso. 34Faapei o se tagata na alu malaga, na ia tuua lona fale ma avane le pule i ana auauna, ua taitoatasi foi ma lana lava galuega, ma ua fai atu i le leoleo faitotoa ina ia mataala o ia. 35O lea, ia mataala ai outou; auā tou te le iloa po o afea e sau ai le Alii o le aiga, po o le afiafi, po o le tautuluaga o le po, po o le vivini o moa, po o le taeao; 36ne‘i faafuasei ona sau, e maua mai outou o momoe. 37O le mea ou te fai atu ia te outou, ou te fai atu ai i tagata uma, Ina mataala ia.
Currently Selected:
MAREKO, 13: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
