IOELU, 2

O LE MATAUPU II.

E faigata le toasa o le Atua.

1Ia outou ilia le pu i Siona, ia taalili i lo‘u mauga paia, ia tetemu i latou uma o e nonofo i le nuu; auā o le a oo mai le aso o Ieova, auā ua latalata mai. 2O le aso pouliuli ma le pogisa, o le aso malumalu ma le pogisa lava, e pei o le malamalama o le taeao ona sosolo i mauga; o le nuu tele ma le malolosi, e leai sona tusa mai le vavau; a mavae ia e le toe faapea lava i lea tupulaga ma lea tupulaga. 3O loo i o latou luma le afi e fano ai, o loo i o latou tua foi le afi mumū; o le fanua i o latou luma e pei o le faatoaga i Etena ia, a o latou tua, ua faalalaoina ia; e leai lava se mea e sao ia te i latou. 4E tino mai i latou e faapei ona tino mai o solofanua; pei o e tietie i solofanua, e faapea lava ona latou taufetuli. 5Latou te taufaioso, e pei o le taalili o kariota i tumutumu mauga, e pei o le taalili o le mu o le afi e susunuina ai tagutugutu o saito, e pei o le nuu malosi ua pae tau. 6E gatete tagata i luma ia te i latou, e sesega mata o tagata uma. 7Latou te taufetuli e pei o tagata totoa; latou te tausili i le aupa e pei o tagata tau; latou te savavali taitasi i lona ala, latou te le ‘alo foi ai le mea e ui ai i latou. 8E le tulei le tasi i le tasi; latou te savavali taitasi i lona ala; a latou pauu foi i tao e le manunua ai. 9Latou te femoei i le aai; latou te taufetuli foi i le aupa; latou te feaei i fale; latou te ulufale atu i faamalama e pei o se gaoi. 10E tetemu le lalolagi i o latou luma; e luluina le lagi; e pouliuli le la ma le masina, o fetu foi e le toe fepulafi mai. 11O Ieova foi na te tŭlei mai lona siufofoga i ana ‘au; auā e matuā tele lava lana itu taua; auā e malosi o ia le na te faataunuuina lana afioga; auā e mamafa le aso o Ieova, e matuā matautia, po o ai se na te mafaia ona talia?

12O lenei, ua faapea mai Ieova, Ia outou toe foi mai ia te au ma o outou loto atoa, ma le anapogi, ma le fetagisi, ma le tagiaue; 13ia outou saeia o outou loto, a e le o outou ofu, ma toe foi ia Ieova lo outou Atua; auā e alofa fua, ma alofa mutimutivale o ia, e tele gese lona toasa, ua tele foi lona alofa, e salamo ia ona o le leaga. 14Po o ai se tasi ua iloa, pe toe foi mai o ia, ma salamo, ma tuuina mai le manuia pe a mavae atu ia mea o le taulaga lea i mea e ‘ai ma le taulaga i mea e inu ia Ieova lo outou Atua?

15Ia outou ilia le pu i Siona, ia outou atofaina ni aso e anapogi ai, ia outou tala‘iina se faapotopotoga. 16Ia outou faapotopotoina le nuu, ia outou faapaiaina le potopotoga, ia outou faapotopotoina toeaina, ia aofia tama iti, atoa ma e o fesusui; ia alu atu le faatoafaiavā ai lona potu, ma le faatoanofotane ai lona afeafe. 17Ia fetagisi le au ositaulaga o auauna a Ieova, i le va o le faapaologa ma le fata faitaulaga, ma ia latou faapea atu, Ieova e ia e faasaoina lou nuu, aua foi e te tuuina atu lou tofi ia faalumaina, ina ne‘i fai ma faatusa o nuu ese; latou te faapea i se a i nuu, O ifea lo latou Atua? 18Ona fuā lea o Ieova ona o lona nuu, na te alofa mutimutivale i ona tagata. 19E tali mai Ieova, ma faapea mai i lona nuu, Faauta mai, ou te foaiina atu ia te outou o saito, ma uaina, ma suāuu tou te maoona ai; ou te le toe tuuina atu ia te outou ia faalumaina e nuu ese. 20Ou te faate‘a mamao ia te outou o ‘au mai le itu i matu, ou te tulia i latou i le nuu naumati ma le gaogao, e faasaga o latou mata i le sami i sasae; e u foi o latou tua i le sami tupito, e alu ae foi lo latou elo, e alu ae foi ma lona saugā, auā o mea tetele ua ia faia.

21Le fanua e, aua e te fefe; ia e fiafia ma olioli, auā e faia e Ieova mea tetele. 22O manu vaefa o le vao e, aua tou te fefefe, auā ua tupu le mutia i mea e tataa ai manu o le vao, auā ua fua mai le laau i lona fua, o le mati atoa ma le vine ua matuā fua mai lava. 23O outou foi o le fanau a Siona e, ia outou fiafia ma olioli ia Ieova lo outou Atua; auā ua ia foaiina faatatau mai ia te outou le uaga muamua, na te faatotōina ifo foi le ua mo outou, o le uaga muamua, atoa ma le uaga mulimuli i le masina muamua. 24E tutumu mea e sasa ai saito i saito, e taumasuasua o latou tuugāuaina i le uaina ma le suāuu. 25Ou te taui atu ia te outou o tausaga na ‘aina e le sē akerise, ma le sē aleka, ma le sē kasili, ma le sē kasama, o la‘u itu taua tele na ou auina atu ia te outou. 26Tou te aai lava, ma maoona ai, tou te vivii atu foi i le suafa o Ieova lo outou Atua, o le ua faia vavega ia te outou; e le mā foi lo‘u nuu e faavavau. 27Tou te iloa foi, ou te i ai ia Isaraelu, o a‘u lava o Ieova lo outou Atua, a e leai se tasi; e le mā lo‘u nuu e faavavau.

28Mulimuli ane, e iu ina ou liligi ifo ai lo‘u Agaga i luga i tagata uma; ona perofeta ai lea o outou atalii ma o outou afafine, e fai miti o outou toeaina, e iloa faaaliga e o outou taulelea. 29Ou te liligi ifo foi lo‘u Agaga i auauna ma auauna fafine, i ia ona aso. 30Ou te tuuina atu foi vavega i le lagi ma le lalolagi, o le toto, ma le afi, ma le asu faaniutu. 31E muamua ona liua le la i le pouliuli, ma le masina i le toto, i le oo ai i le aso tele ma le silisili o Ieova. 32E iu foi ina faaolaina o i latou uma lava o e valaau atu i le suafa o Ieova; auā e i ai le faaolataga i le mauga o Siona ma Ierusalema, faapei ona fetalai mai ai o Ieova, e i ai foi i e ua totoe o i latou ia e valaauina e Ieova.

Currently Selected:

IOELU, 2: SOV

Highlight

Copy