IOELU, 1
1
O LE MATAUPU I.
O le toasa o le Atua.
1O le afioga a Ieova na oo ia Ioelu, le atalii o Petuelu.
2Outou toeaina e, ina faalogologo mai ia i lenei mea, o outou uma o e nonofo i le nuu, ia outou liliu mai o outou taliga; pe na i ai le mea nei i ona po o outou, po o ona po o outou tamā? 3Ia outou talatala atu ai i la outou fanau; ia talatala foi la outou fanau i la latou fanau, ma la latou fanau i se tasi tupulaga. 4O mea na tuua e le sē kasama ua ‘aina ia e le sē akerise; o mea na tuua e le sē akerise ua ‘aina ia e le sē aleka; o mea foi na tuua e le sē aleka ua ‘aina ia e le sē kasili. 5Ala mai ia outou ua onā, ma fetagisi; ia uio foi outou uma o e inu uaina, auā tou te le toe feinu lava i le suāvine. 6Auā ua alu ae le nuu ese i lo‘u laueleele, e malolosi i latou, e le mafaitaulia lava; o latou nifo o nifo o leona ia, ua i ai foi gao peiseai o gao o se leona tele. 7Ua fano ia te i latou la‘u vine, ua fo‘ea e i latou la‘u mati, ua matuā fo‘ea lava e i latou, ua lafotuina foi; ua sinasina ai ona la.
8Ia e tagiaue, e pei o se taupou ua fusia i le ie talatala ona o lana tane sa fai a o teine muli o ia. 9Ua leai ni toe taulaga i mea e ‘ai ma taulaga i mea e inu i le fale o Ieova; ua faanoanoa le au faitaulaga o e auauna ia Ieova. 10Ua fano le fanua, ua faanoanoa le laueleele; auā ua fano le saito; ua velasia le uaina, o le a uma le suāuu.
11Le au galulue fanua e, ia outou mamā ia. O outou o e teuteu vine, ia outou uio, ona o le saito ma le karite; auā ua māumau le saito o le fanua. 12Ua mago le vine, ua mamae le mati, o le rimoni, ma le pama, ma le tapua, ma laau uma o le vao ua mamago ia; auā ua mavae atu le fiafia o tagata.
13Le au faitaulaga e, ia outou fufusi ia te outou ma faanoanoa; ia uio outou o e auauna i le fata faitaulaga; o mai ia, ia aoina outou o oofu i le ie talatala, o outou o e auauna i lo‘u Atua; auā ua leai ni toe taulaga i mea e ‘ai ma taulaga i mea e inu i le fale o lo outou Atua. 14Ia outou atofaina ni aso e anapogi ai; ia outou tala‘iina se faapotopotoga, ia outou faapotopotoina le au toeaina, atoa ma i latou uma e o nonofo i le nuu, i le fale o Ieova lo outou Atua; ma ia outou alalaga ia Ieova.
15Aue, le aso e! auā ua latalata mai le aso o Ieova, e oo mai e pei o se malaia ai Le e ona le malosi uma lava. 16E le ua fano ea mea e ‘ai i o tatou luma, ua aveeseina foi le fiafia ma le olioli i le fale o lo tatou Atua? 17Ua pala fatu saito i lalo ifo o ona eleele, ua faatafunaina fale saito, ua lepetia fale oo, auā ua magumagu le saito. 18Ua fetagisi naua manu vaefa, ua puapuagatia lafu povi, auā ua leai ni a latou mea e ‘ai; ua fano foi lafu mamoe. 19Ieova e, ou te valaau ia te oe, auā ua ‘aina e le afi mea e tataa ai manu i le vao, ua mu i le afi laau uma o le vao. 20E fetagisi foi ia te oe o manu vaefa o le vao; auā ua pepē vaitafe, ua ‘aina foi e le afi mea e tataa ai manu i le vao.
Currently Selected:
IOELU, 1: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
