HOSEA, 11
11
O LE MATAUPU XI.
O le alofa o le Atua ia Isaraelu.
1O ona po na tama itiiti ai Isaraelu, na ou alofa atu ia te ia, na ou valaauina foi lo‘u atalii nai Aikupito. 2Na latou alalaga ia te i latou, a ua latou o ese ia te i latou; na latou fai taulaga ia Paala, ma faamu mea manogi i tupua ua ta. 3Na ou a‘oa‘oina Efaraima ia savali, o loo o tauta‘ita‘i ia te i latou i o latou lima; a ua le iloa e i latou ona ou faamaloloina o i latou. 4Na ou tosina i latou i maea a le tagata, o maea alofa lava; na ou i ai ia te i latou e pei o e sii ae le amo ai o latou aulamu, na au tuuina atu foi mea e ‘ai ia te i latou. 5E le toe foi o ia i le nuu o Aikupito, a e avea le Asuria mona tupu; auā ua le mafafai i latou ona toe foi atu. 6E tumau le pelu i ona aai, e faaumatia ai foi ona la, ma fano ai, auā o a latou lava filifiliga. 7Ua naunau lo‘u nuu e liliu ese ia te au; latou te valaau i ai e o mai i lē Silisili ese, a e leai se tasi e vivii atu ia te ia. 8Efaraima e, ou te mafai faapefea ona tuu atu ia te oe? Isaraelu e, ou te tuuina atu oe faapefea? ou te mafai faapefea ona tuuina atu o oe e pei o Atama? ou te tuuina atu oe faapefea e pei o Sepoima? Ua liua lo‘u loto i totonu ia te au; atoa foi ma lo‘u alofa mutimutivale ua tupu. 9Ou te le faaoo lo‘u ita tele; ou te le toe faaumatia Efaraima; auā o a‘u o le Atua, a e le se tagata, o le Paia o loo i totonu ia te oe; ou te le alu atu ma le ita. 10Latou te mulimuli atu ia Ieova, e tagi lava ia e pei o se leona; a tagi o ia, ona taalise mai ai lea o le fanau mai sisifo. 11Latou te taalise mai e pei o se manu lele mai Aikupito, e pei o se lupe foi mai le nuu o Asuria; ou te faanonofo foi ia te i latou i o latou fale, ua faapea mai ai Ieova. 12Ua siosio Efaraima ia te au i le pepelo, o le aiga foi o Isaraelu ua siosio ia te au i le ‘ole‘ole; a ua pule pea Iuta faatasi ma le Atua, ua faamaoni ia faatasi ma le au paia.
Currently Selected:
HOSEA, 11: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
