EPERU, 2

O LE MATAUPU II.

O le apoapoaiga ia matuā saili i le ola.

1O le mea lea e tatau ona atili ai ona tatou naunau i mea ua tatou faalogologo i ai, ne‘i te‘a ia i tatou. 2Auā afai na faamauina le upu na molia mai e agelu, taitasi foi soli tulafono ma faalogogata ma oo i ai le taui e tusa ai, 3pe sao faapefea i tatou pe a faatamala i le olataga e matuā tele? sa muai fetalaia mai e le Alii, ona faamaonia mai lea ia i tatou e i latou sa faalogo ia te ia; 4ua molimau mai foi le Atua faatasi ma i latou i faailoga ma vavega, i mea mamana eseese foi, ma mea alofa mai le Agaga Paia, e tusa ma lona lava finagalo.

5Auā ua le tuuina atu e ia i agelu e pule i le sauniga atali, o loo matou o tautala nei i ai; 6a ua molitino mai e le tasi i le tasi upu, ua faapea mai, Se a ea le tagata ua e manatu mai ai ia te ia; po o le atalii o le tagata ua e asiasi mai ai ia te ia? 7Ua e faamaulalo ane teisi o ia i agelu; ua e faapale ia te ia i le mamalu ma le viiga, ua e tofia foi o ia e pule i galuega a ou aao; 8ua e tuuina foi o mea uma lava i lalo o ona vae. O lenei, ina ua tuuina o mea uma i lalo ia te ia, ua le tuua e ia se mea e tasi e lei tuuina i lalo ia te ia; a ua le vaaia nei e i tatou o mea uma lava ona tuuina i lalo ia te ia. 9A ua tatou iloa o ia o le na faamaulaloina teisi i agelu, o Iesu lea, ua faapaleina i le mamalu ma le viiga, ona o le tiga o le oti, ina ia oo ia te ia le oti ona o tagata uma i le alofa tunoa o le Atua. 10Auā o le na fai mea uma lava mona, sa na faia foi mea uma lava e ia, na tatau ia te ia i lona ta‘ita‘iina o atalii e toatele i le manuia, ona faaatoatoaina ai o le Alii o lo latou olataga ona o tiga. 11Auā o le na te faapaiaina mai atoa ma i latou uma e ua faapaiaina, e tasi lo latou tupuga; o le mea lea e le mā ai o ia ia ta‘ua i latou o ona uso, 12o loo faapea mai, Ou te ta‘u atu lou suafa i o‘u uso; ou te pese atu viiga ia te oe i totonu o le ekalesia. 13Ua toe faapea mai, Ou te faatuatua ia te ia. I le ma lea, Faauta mai, o a‘u nei ma le fanau ua foaiina mai e le Atua ia te au. 14O lenei, ina ua i ai i le fanau le tino tagata ola, na faapea foi ona ua i ai ia te ia, ina ia faaumatia e ia i lona maliu o le ua i ai le malo e oti ai, o le tiapolo lea, 15ma tuusaunoaina ai i latou uma o e na faapologaina i o latou olaga uma ona o le mata‘u i le oti. 16Auā e moni, e le fesoasoani o ia i agelu, peitai ane o le fanau a Aperaamo o loo fesoasoani o ia i ai. 17O le mea lea ua tatau ai ina ia avea o ia ia faapei o ona uso i mea uma lava, ina ia faia o ia ma faitaulaga sili e alofa ma faamaoni i mea a le Atua, ina ia faia e ia se togiola mo agasala a le nuu. 18Auā na tigaina o ia ina o tofotofoina, o le mea lea ua mafai ai e ia ona fesoasoani i e ua tofotofoina.

Currently Selected:

EPERU, 2: SOV

Highlight

Copy