EPERU, 3
3
O LE MATAUPU III.
Ua silisili ese le Mesia ia Mose.
1O lenei, le au uso paia e, e ua tofutofusia i le valaau mai le lagi, ina mafaufau ia i le aposetolo ma le faitaulaga sili ua ta‘uta‘uina e i tatou, o Keriso Iesu lea; 2ua faamaoni i le na tofia o ia, pei o Mose foi i lona aiga uma. 3Auā e ta‘uaogaina o ia i le mamalu e sili i lo Mose, pei ona sili o le viiga o lē saunia le fale i lo le fale. 4Auā e taitasi fale ma saunia e se tasi; a o le na te saunia mea uma lava o le Atua lea. 5Na faamaoni lava Mose i lona aiga uma, o le auauna ia, ina ia molimau o ia i mea o le a talaina mai; 6peitai ane o Keriso; o le Alo ia e pule i lona lava aiga; o lona aiga i tatou, pe afai tatou te taofi mau i le faamalosi ma le mitamita i le faamoemoe seia oo i le gataaga. 7O le mea lea, pei ona fetalai mai ai le Agaga Paia, O le aso nei afai tou te faalogo ai i lona siufofoga, 8aua tou te faamaaa i o outou loto, pei o le faaonoono i le aso na faaosooso ai i le vao; 9sa faaosooso mai ai o outou tamā ia te au, sa tofotofo mai ai ia te au, a ua latou iloa a‘u galuega i ona tausaga e fagafulu; 10o le mea lea na ou ‘ino‘ino ai i lena tupulaga, ma ou fai ane, Ua sese pea lava i o latou loto, ua le iloa e i latou o‘u ala; 11ona ou tauto ai lea i lo‘u ita, Latou te le sao atu lava i lo‘u malologa. 12Le au uso e, ia outou, ne‘i ai i so outou le loto leaga ma le le talitonu, tou te o ese ai i le Atua soifua; 13a ia outou fefaamafanafanai i lea aso ma lea aso, manū o ta‘ua o le aso nei, ina ne‘i loto fatu so outou i le pepelo o le agasala; 14auā e mafuta faatasi o i tatou ma Keriso, pe afai tatou te taofi mau lava i lo tatou muai faatuatua e oo i le gataaga; 15Manū o fai mai, O le aso nei afai tou te faalogo ai i lona siufofoga, aua tou te faamaaa i o outou loto, pei o le faaonoono. 16Auā o ai ea i latou e na faaonoono ina ua latou faalogologo? e le o i latou uma ea e na o atu nai Aikupito sa ta‘ita‘iina e Mose? 17O ai foi i latou sa ‘ino‘ino o ia i ai i ona tausaga e fagafulu? e le o i latou ea e na agasala, sa oti o latou tino i le vao? 18O ai foi i latou na ia tauto i ai, latou te le sao atu i lona malologa? e le o i latou ea e na faalogogata? 19O lenei, ua tatou iloa na le mafai ona sao atu i ai i latou ona o le le talitonu.
Currently Selected:
EPERU, 3: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
