I. IOANE, 5

O LE MATAUPU V.

O lē alofa i le Atua, e alofa lea i lana fanau.

1O i latou uma o e talitonu, o Iesu o le Keriso lava lea, ua fanau mai i latou mai le Atua; o i latou uma foi o e alolofa i lē ana le fanau, e alolofa foi i latou i lana fanau. 2O le mea lava lenei ua tatou iloa ai e alolofa i tatou i le fanau a le Atua, pe a tatou alolofa i le Atua, ma tausi i ana poloaiga. 3Auā o lenei lava le alofa i le Atua, ia tatou tausi i ana poloaiga; e le mamafa foi ana poloaiga. 4Auā o i latou uma o e fanau mai i le Atua, e manumalo i latou i le lalolagi; o lenei foi le manumalo e manumalo ai i le lalolagi, o lo tatou faatuatua lava. 5O ai se na te manumalo i le lalolagi, pe afai e le o lē talitonu, o Iesu o le Alo lava ia o le Atua? 6O ia lava lenei, o le na maliu mai ma le vai atoa ma le toto, o Iesu Keriso lava; e le tuli i le vai, a o le vai atoa ma le toto; o le Agaga foi o loo molimau mai, auā o le Agaga e faamaoni lava ia. 7Auā e toatolu o e molimau i le lagi, o le Tamā, ma le Lokou, atoa ma le Agaga Paia; o i latou nei foi e toatolu e toatasi lava ia. 8E tolu foi e molimau mai i le lalolagi, o le Agaga, ma le vai, atoa ma le toto; o lea tolu foi e auga atu ia i le mea e tasi. 9Afai e talia e i tatou le molimau a tagata, e sili le molimau a le Atua; auā o lenei lava le molimau a le Atua na ia molimau mai ai i lona lava Alo. 10O lē faatuatua i le Alo o le Atua ua i totonu ia te ia le molimau; o le le talitonu i le Atua ua ia faia o ia ma pepelo; auā e lei talitonu ia i le mau na molimau mai ai e le Atua i lona lava Alo. 11O lenei foi le mau, ua foaiina mai e le Atua ia te i tatou le ola e faavavau; o le ola lava lea ua i lona Alo. 12O le o ia te ia le Alo, o ia te ia le ola; o le e le o ia te ia le Alo o le Atua, e le o ia te ia le ola.

13Ua ou tusi atu nei mea ia te outou o e faatuatua i le suafa o le Alo o le Atua, ina ia outou iloa ai ua ia te outou le ola e faavavau, ina ia outou faatuatua foi i le suafa o le Alo o le Atua. 14O lenei foi le faamalosi ua tatou maua i ona luma, pe afai tatou te ole atu ai se mea e tusa ma lona finagalo, e faafofoga mai o ia ia te i tatou. 15Afai foi ua tatou iloa, e faafofoga mai o ia ia te i tatou e se mea tatou te faatoga atu ai, ua tatou iloa e maua e i tatou mea tatou te faatoga atu ai ia te ia. 16Afai ua iloa e se tasi lona uso ua na fai se agasala e le iu i le oti, ia faatoga o ia mo ia, ona foaiina mai lea o le ola ia te ia mo e agasala e le iu i le oti. O i ai le agasala e iu i le oti; ou te le fai atu ia outou faatoga atu mo lea agasala. 17O amioletonu uma lava, o agasala ia; o i ai foi le agasala e le iu i le oti. 18Ua tatou iloa e le agasala se tasi o e ua fanau mai i le Atua; a o le ua fanau mai i le Atua, e tausi o ia e ia, e le tago foi loo leaga ia te ia. 19Ua tatou iloa e mai le Atua lava i tatou, a o le lalolagi uma o loo nofo toilalo i loo leaga. 20Ua tatou iloa foi ua maliu mai le Alo o le Atua, ua ia foaiina mai foi le mafaufau ia te i tatou, ina ia tatou iloa ai loo moni, o i ai foi i tatou i loo moni, o i lona Alo o Iesu Keriso. O lenei lava le Atua moni, ma le soifua e faavavau. 21Le fanau e, ia leoleo outou ia te outou ia taumamao i tupua. Amene.

Currently Selected:

I. IOANE, 5: SOV

Highlight

Copy