I. KORINITO, 4
4
O LE MATAUPU IV.
O le tautiga o le au aposetolo i le galuega.
1Ia faapea ona manatu o tagata ia te i matou, o auauna a Keriso, o auauna foi e tausi i upu lilo a le Atua. 2O lenei, e suesueina i auauna tausi mea ina ia iloa ai le tagata ua faamaoni. 3A o le mea matuā māmā lava ia te au ona faamasinoina o a‘u e outou, po o le faamasinoga a tagata; ou te le faamasino lava a‘u ia te a‘u. 4Auā ou te le iloa ifo i lo‘u loto so‘u sese, a e le ta‘uamiotonuina a‘u i lea mea; a o le na te faamasinoina a‘u o le Alii lea. 5O lenei, aua tou te faamasino i se tasi mea a o le oo mai ona po, seia afio mai le Alii, o le na te faamalamalamaina mea lilo io i le pouliuli, ma faaalia filifiliga o loto; e i ai ona taitasi ma ta‘uleleia e le Atua.
6Le au uso e, ua ou faatatauina ia mea ia te i maua ma Apolo ona o outou; ina ia a‘oa‘oina ai outou ia i maua, ia le sili lo outou manatu i le mea ua tusia, ina ne‘i ai so outou e fefete le loto ona o le tasi, a e faasiasia i le isi. 7Auā o ai ea na te faaeseina oe? se a foi se mea ua ia te oe e lei foaiina atu? A e afai na foaiina atu ia te oe, se a le mea ua e mitamita ai, peiseai e lei foaiina atu lava? 8Ua maoona nei outou, ua tamaoaiga nei, ua avea outou ma tupu a e le o i ai matou; a ni tupu outou po ua lelei lava lea ia te au, ina ia avea foi i matou ma tupu faatasi ma outou. 9Auā o lo‘u manatu ua tuuina atu i matou le au aposetolo e le Atua ia mulimuli, pei o e ua tofia ia oti; auā ua avea i matou ma mataaga i le lalolagi, o agelu atoa ma tagata. 10O loo valelea i matou ona o Keriso, a o outou o loo atamamai ia Keriso; o loo vaivai i matou, a ua malolosi outou; ua mamalu outou, a ua faaletaualoaina i matou. 11Ua oo mai i lenei lava itu aso, ua matou fia aai, ma fia inu, ma ua le lavalavā, ma taufaitu‘iina, ma maumau solo; 12o loo tautiga i matou o galulue i o matou lava lima; o loo agateleina i matou, matou te upu lelei atu; o loo sauaina i matou, matou te onosai; 13o loo faifaia i matou, matou te aioi atu; ua matou pei o otaota o le lalolagi, o le punefu foi o mea uma, ua oo mai lava i ona po nei. 14Ou te le tusi atu na mea e faamāina ai outou, a e peitai ou te apoapoai atu ia te outou o la‘u lava fanau pele. 15Auā e ui ina toamano o ta‘ita‘i tama ia te outou ia Keriso, a e peitai e le toatele o outou tamā; auā na ou fanaua outou i le tala lelei ia Keriso Iesu. 16O lenei, ou te aioi atu ia te outou, ia outou faaa‘oa‘o ia te au. 17O le mea lea ua ou auina atu ai Timoteo ia te outou, o lo‘u atalii pele lea ma le faamaoni i le Alii, o le na te faamanatuina outou i la‘u amio i le galuega a Keriso, pei ona ou a‘oa‘o i mea uma i ekalesia uma. 18O loo fefete loto o isi, peiseai a ou le alu atu ia te outou. 19A e vave ona ou alu atu ia te outou, a finagalo i ai le Alii; ona ou iloa ai lea e le o le upu a e loto fefete a o lo latou malosi. 20Auā o le malo o le Atua e le o i le upu, a o le malosi. 21Po o le fea tou te loto i ai? ou te alu atu ea ia te outou ma le sasa, po o le alofa ma le loto agamalu?
Currently Selected:
I. KORINITO, 4: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
