ซ้าว เมี่ยน 8
8
อาโลน หลิ่ว เล์ย ตัง
1 เฒี้ยว ก๊อง บั๋ว โมเซ, 2“อ๋อย หฒุ บั๋ว อาโลน, ‘เฒาะ วั้ว เต๋ย เสี่ย นอม ตัง-ฒ้าน อัน เจี๊ยน ตัง-จ๋า เญย เฒี่ยง โห่, อ๋อย หฒุ ปุน ตัง หฒิว ฌัง ตัง-จ๋า เญย หฑะเฮมียน แหมง.’”
3อาโลน ฯฒฯ ฮนั้ง น้าย นอ โหฒว. นิ่น เฒาะ ตัง-ฒ้าน อัน เจี๊ยน ตัง-จ๋า ปุน หฒิว หฑะเฮมียน แหมง, ฮนั้ง เฒี้ยว พ้าย โมเซ นอ. 4น้าย นอม ตัง ฮนั้ง น้าย นอ โหฒว ต้าย. เฒี่ยง นอม ตัง หล่ง เจียม ต๊า ต้าย เยียม กะเดี๊ย ตัง-เทาะ เถา กู้ หงว่าย เญย เปี้ยง. หฒิว เฒี้ยว บั๋ว โมเซ เญย หญู่ง เฒ้ย โหฒว เหฒียง เหฑ่ง.#ธ้วด อียิบ 25:31-40; 37:17-24
สา เลวี เมี่ยน ธีง-เหฑ่ง แอ๋ง ฝูง ปุน เฒี้ยว
5 เฒี้ยว ก๊อง บั๋ว โมเซ, 6“อ๋อย หฒุ ปุน ฆอย เลวี เมี่ยน เยียม อิสะลาเอน เมี่ยน ธ้วด ต้าย หย่า เถง นิ่น บัว สา หวุย. 7อ๋อย หฒุ ฮนั้ง น้าย นอ เถง สา หวุย. อ๋อย หฒุ หล่ง สา หวุย เญย ววม ฟุ นิ่น บัว, แอ๋ง ปุน นิ่น บัว เถย เหฑ่ง เฒี่ยง ซิน, โหฑ เหฑ่ง นิ่น บัว เญย ลุย-โหว, ฯฒฯ ปุน นิ่น บัว กั้น ธีง-เหฑ่ง. 8อ๋อย หฒุ ปุน นิ่น บัว ต้อ เต้า ง่ง โก๊ว ตอน เหธา เหฒี่ย เญย ล่าง หฒิ เหยียด เหฌี่ย เหฒี่ย, เซ หล่ง บ๊วน-หม่วน หฒอบ เจี๊ยน โย่ว. เม่ย อ๋อย หฒุ แอ๋ง กั้น หล่ง เต้า ง่ง โก๊ว ตอน เหฒี่ย ฟิ ฒุ์ย. 9อ๋อย หฒุ ต้อ เลวี เมี่ยน ต้าย เยียม หวุ่ย ปวั้ง ด๊บ-ลิ่ว เญย หฑะเฮมียน แหมง, แอ๋ง เห่ว อิสะลาเอน เญย เหยียด ฒู้ง เมี่ยน ต้าย ฒุ้น. 10ต้อ เลวี เมี่ยน ต้าย เยียม เฒี้ยว เญย หฑะเฮมียน วั้ว หฒั่น, อิสะลาเอน เมี่ยน อ๋อย หฒุ หล่ง ปั์ว มาน เจี๊ยน นิ่น บัว. 11อาโลน หย่า อ๋อย หฒุ เฒาะ เลวี เมี่ยน ฝูง ปุน เฒี้ยว เหว่ย โหฒว อิสะลาเอน เมี่ยน ธุ้น กีง ฝ่ง ห่อ เญย กะน้าย. ฮนั้ง น้าย โหฒว ลิ์ว, นิ่น บัว ฯฒฯ ไฮ่ โหฒว กง ฟู-สู เฒี้ยว.
12“เลวี เมี่ยน ต้อ ปั์ว มาน เจี๊ยน น้าย เต๋ย อี เต้า ง่ง โก๊ว ตอน เญย มฆ้อง ลิ์ว, อ๋อย หฒุ หล่ง เต้า เหฒี่ย ปุน เฒี้ยว เหว่ย ฟิ ฒุ์ย. แอ๋ง หล่ง เต้า ปั๊ว เหฒี่ย เหว่ย สา เลวี เมี่ยน เญย หวุย. 13อ๋อย หฒุ ปุน เลวี เมี่ยน โซ้ว เจี๊ยน อาโลน เหธา นิ่น เญย ตอน เญย หฑะเฮมียน, ฯฒฯ เฒาะ นิ่น บัว ฝูง ปุน เฒี้ยว, ฮนั้ง โหฒว ธุ้น กีง ฝ่ง ห่อ เญย กะน้าย นอ. 14ฮนั้ง น้าย นอ โหฒว ลิ์ว, เม่ย ปุน เลวี เมี่ยน เยียม อิสะลาเอน เมี่ยน บุด๋ง ธ้วด ต้าย ฯฒฯ เป๋น เยีย เญย หมี่ อ๊ะ.
15“เม่ย เถง เลวี เมี่ยน สา หวุย แอ๋ง เฒาะ นิ่น บัว ธุ้น กีง ฝ่ง ห่อ ลิ์ว, นิ่น บัว อ๋อย หฒุ ต้าย เยียม หวุ่ย ปวั้ง เญย ด๊บ-ลิ่ว โหฒว นิ่น บัว เญย กง อ๊ะ. 16น้าย เต๋ย เมี่ยน เยียม อิสะลาเอน เมี่ยน บุด๋ง ธ้วด ต้าย ฝูง ปุน เยีย, เป๋น เหฑ่ง เยีย เญย เมี่ยน ตี๊ ตอน-หละเก๊า, ต้ง อิสะลาเอน เมี่ยน เญย เหยียด ฒู้ง มเซียะ ตอน ยู์ง เญย ต้าว เต้า ตอน. 17อิสะลาเอน เมี่ยน เญย หฒวัง ตอน-หละเก๊า, เลี่ยม เหยียด ฒู้ง แซง-คู้ เญย ต้าว เต้า ตอน, เยีย กิ๊น ต้าย เป๋น เยีย เญย หมี่ อ๊ะ. เยียม อียิบ เต่ย-ปูง เยีย ไต๋ เหยียด ฒู้ง ตอน-หละเก๊า วั้ว ฮนอย, เยีย กิ๊น ธ้วด เป๋น เยีย เญย หมี่ อ๊ะ.#ธ้วด อียิบ 13:2 18เยีย หย่า กิ๊น เลวี เมี่ยน ตี๊ อิสะลาเอน เมี่ยน เญย หฒวัง ตอน-หละเก๊า. 19เยีย หย่า เฒาะ เลวี เมี่ยน เยียม อิสะลาเอน เมี่ยน บุด๋ง ธ้วด ต้าย ฝูง ปุน อาโลน เหธา นิ่น เญย ตอน บัว ต๋อง อิสะลาเอน เมี่ยน เยียม หวุ่ย ปวั้ง เญย ด๊บ-ลิ่ว โหฒว กง. นิ่น บัว หย่า เถง อิสะลาเอน เมี่ยน สา หวุย เหว่ย ปุน อิสะลาเอน เมี่ยน มี่ง นิด ฟัด สีง ติ่น วั้ว หฒั่น ไม้ หฒุ ต้ม เหฒะ หน่าน ห่อย.”
20โมเซ, อาโลน เหธา อิสะลาเอน เญย หฒวัง เมี่ยน ฯฒฯ หฒิว เฒี้ยว พ้าย โมเซ เญย หว่า ต้อ เลวี เมี่ยน เอย เจี๊ยน โหฒว เหฑ่ง. 21เลวี เมี่ยน ฯฒฯ สา กั้น ธีง-เหฑ่ง, แอ๋ง โหฑ เหฑ่ง ลุย-โหว. อาโลน ฯฒฯ ฝูง ปุน เฒี้ยว ฮนั้ง เป๋น ธุ้น กีง ฝ่ง ห่อ เญย กะน้าย. อาโลน หย่า เถง นิ่น บัว ฟิ ฒุ์ย, สา หวุย. 22ฆะฮ้า เลวี เมี่ยน เยียม หวุ่ย ปวั้ง เญย ด๊บ-ลิ่ว โหฒว นิ่น บัว เญย กง เยียม อาโลน เหธา นิ่น เญย ตอน เญย ปั์ว-เดี๊ย. หฒิว เฒี้ยว พ้าย โมเซ, นิ่น บัว ต้อ เลวี เมี่ยน เอย เจี๊ยน โหฒว เหฑ่ง.
เลวี เมี่ยน โหฒว กง เญย หฮญัง-เจ๊ย
23 เฒี้ยว ก๊อง บั๋ว โมเซ, 24“น้าย เต๋ย เจ๊า ก๊อง เลวี เมี่ยน. เยียม หญี่ เหฒียบ ฮม์ หฮญัง ฝาว แหมง เญย มจั่ง ตอน อ๋อย หฒุ เยียม หวุ่ย ปวั้ง เญย ด๊บ-ลิ่ว โหฒว กง. 25หฮญัง-เจ๊ย ปวั๊ง ฮม์ เหฒียบ หฮญัง วั้ว เต๋ย, อ๋อย หฒุ ตี้ง นิ่น บัว เญย ป่วน กง, ไม้ โหฒว อ๊ะ. 26นิ่น บัว ไฮ่ เถง นิ่น บัว เญย ก๋อ-โย์ว เยียม หวุ่ย ปวั้ง เญย ด๊บ-ลิ่ว โหฒว กง มป่า ไม้ เฒ์ย นิ่น บัว กั้น โหฒว เหฑ่ง. เม่ย อ๋อย หฒุ ฮนั้ง น้าย นอ พ้าย เลวี เมี่ยน โหฒว กง.”
Currently Selected:
ซ้าว เมี่ยน 8: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
