Matayo 18

Ni ani mubomu?

(Mariko 9:33-37; Luka 9:46-48)

1 # Luk 22:24 Jeso ariphomala kugomba na Pʼetero dzulu ya kuripha kodi ra Hekalu, ahumwae anjine ákudzamuuza vivi, “Ni ani ariye mubomu kuriko anzie osi Ufalumeni kwa Mulungu?” 2Jeso achimwiha mwanache mudide, achimwimisa kati-kati yao. 3#Mar 10:15; Luk 18:17Chisha achiamba, “Ninamwambira jeri, mutsʼiphogaluza menenzi genu na kukala dza anache, kʼamundaphenya Ufalumeni kwa Mulungu. 4Mutʼu yetsʼidziunula dza mwanache, bee ndiye mubomu Ufalumeni kwa Mulungu. 5Na yeyosi amuphokeraye mwanache dza yuyu kwa dzina rangu, bee unaniphokera mimi.”

Maneno gaudzago atʼu nyuma

(Mariko 9:42-48; Luka 17:1-2)

6Phapho Jeso waenderera kugomba achiamba, “Ela mutʼu yeyosi yendamuhenda mumwenga wa aa ario chiroho ni atsanga ariche kukuluphira, vingekalatʼo muno kala mutʼu yiye ni kufungwa lwala lubomu lwa tsʼingo, na akendatsuphwa kati-kati ya bahari. 7Atʼu phapha duniani a maengaengani, kwakukala, phana maneno manji ga kwahenda ahende dambi. Gago ni seti galairire, ela undamanya mwenye yiye yendagareha. 8#Mat 5:30Mukonoo, hebu lwayolo luchikuhenda uriche kunikuluphira, lutose ulutsuphe kure. Ni baha kuhenda chirema cha mukono, hebu cha gulu, ela ukaphenye uzimani, kuriko kukala na mikonoyo yosi miri, hebu magulugo gosi mairi, na ukatsuphwe moho wa kare na kare. 9#Mat 5:29Na dzitsoro richikuhenda uriche kunikuluphira vivyo, rishungulule uritsuphe kure. Ni baha kuhenda chʼongo, ela ukaphenye uzimani, kuriko kukala na matsogo gosi mairi, na ukatsuphwe moho wa Jahanamu.”

Mulungu kʼenzi hata mwanache mudide ayaye

(Luka 15:3-7)

10 # Luk 19:10 Jeso waamba, “Dzimanyirireni mutsʼidze mukaphurya hata mumwenga wa aa anache adide. Ninamwambira mino, malaika ao kuko mulunguni ukati wosi a mbere za Baba ariye kuko mulunguni.#18:10 Nakala zinjine zinaonjeza fungu ra 11 dza: Maana, mimi Mutʼu yelaa dzulu nákudzaativya aratʼu oyaya. 12Mutʼu achikala una magonzi gana mwenga, ela mwenga tu riyaye, munaona yiye undahendadze? Kʼamona yiye undagaricha garatʼu mirongo chenda na chenda dzeruni, na ende akaritsakule riratʼu mwenga rodziyaya! 13Na ninamwambira jeri, achirona nikuhamirwa muno kwa riro kuchira vivyo ahamirwavyo kwa gago mirongo chenda na chenda garigo kʼagayayire. 14Na vivyo vyenye bee ndo arivyo Abayenu ariye mulunguni, yiye kʼenzi hata mumwenga wa aa anache adide ayaye.”

Dzulu ya kukanyana

15 # Luk 17:3 Jeso waamba, “Mukuluphiri munzio achikukosa, muvuhe kʼanda umwambire makosage muchikala ni uwe na yiye tu. Na achikusikiza, undakala udzimukanya, na udzimuudza yiye nduguyo. 16#Kʼumb 19:15Ela atsʼiphokusikiza, mugwirire ndugu wa chijeso mumwenga, hebu airi. Henda vivyo kutuwa Andiko rambaro, ‘Chila neno narihakikishwe ni ushaidi wa atʼu airi, hebu kwenderera.’ 17Ao nao achirema kwasikiza, enda ukamuseme kanisani. Kuko kanisani nako achirema kusikiza vivyo, muhwalire dza mutaifa, hebu dza mutosi wa kodi.”

Rondalamulwa phapha ndiro rondalamulwa hata kuko mulunguni

18 # Mat 16:19; Joh 20:23 Jeso waenderera kugomba achiamba, “Ninamwambira jeri, rondarikahaza phapha duniani, bee ndiro rondakahazwa hata kuko mulunguni, na rondarihenzeza phapha duniani, bee rindahenzezwa hata kuko dzulu mulunguni nako. 19Chisha ninamwambira jeri mino, airi enu phapha duniani acherekezana kuvoyera utʼu wowosi, Baba ariye dzulu mulunguni undaachimizira. 20Maana, atʼu airi hebu kwenderera, aonanapho na kuno ananikuluphira, bee nindakala phamwenga nao.”

Mufano wa muhendikazi yetsʼiasamehe anzie

21 # Luk 17:3, 4 Jeso ariphomala kugomba gago, Pʼetero wamutuwa achendamuuza vivi, “Bwana, musena achikala unanikosa kwenda-kwenda, ninimusamehe kʼano ngaphi? Kale ninimusamehe kʼano fungahe?” 22#Mwa 4:24Jeso achimuudzidza achimwamba, “Tsʼi kʼano fungahe tu, ela hata musamehe kʼano mirongo mifungahe mara fungahe zenye.

23“Kwa gago phapho dzulu, Ufalume wa Mulungu unaidima kuhwalanishwa na tʼadi yiyi ya mufalume mumwenga yelamula kutara madeni ga ahendikazie. 24Ariphoanza kutara, phárehewa muhendikaziwe mumwenga yekala una deni ra mamiliyoni. 25Mutʼu yiye chakwe chokala unacho, chakala kʼachitosha hata kwanza kuripha deni riro. Ndo tajiriwe achiamba, yiye, muchewe na anae aguzwe na hata miyoye yokala unayo, kwa hata denire ririphike.

26“Ela yiye muhendikazi wamitʼa mavindi mbereze kumulalamira, na achiamba, ‘Bwana, uwe nivumirira tu, nami nindakuripha deniro rosi.’ 27Yiye tajiri achimonera mbazi, achimusamehe riratʼu deni, na achimuricha ende vyakwe.

28“Ela muhendikazi yiye ariphouka phapho, wakwendamona muhendikazi munziwe yekala unamwisa mirongo mifungahe na tsʼano tu. Ndo achimupamba kare, chisha achimugwira pʼanga za umiro na achimwamba, ‘Niripha pʼesa zangu zosi nikwisazo phapha!’

29“Yiye muhendikazi munziwe achimitʼa mavindi kumulalamira, na achimwamba, ‘Musena, uwe nivumirira tu, nami nindakuripha deniro.’ 30Ela yiye hata kʼagasirikisire kamare gago. Yiye wamuhwala guu kwa guu hata polisi achendaamba afungwe hata phondariphirwa. 31Ndo ahendikazi anzie ariphogasikira gago, áshononeka muno hata achendamwambira tajiri wao gosi gokala galairira.

32“Phapho yiye tajiri achimwiha yiye muhendikazi yiye na achimwamba, ‘Uwe u muhendikazi mui muno! Mino uriphonilalamira, nákusamehe deniro rosi. 33Kwadze sambi uwe kʼumonerere mbazi muhendikazi munzio dza nirivyokonera mbazi?’ 34Phapho yiye tajiri achitsukirwa muno hata achimwamba naye aphirikwe jela, na asuguwe hata phondariripha deni rosi.” 35Ndo kumarigiza Jeso achiamba, “Hata mwimwi namwi mutsʼiphoasamehe anzienu moyo kutsuka, Baba ariye mulunguni undamuhendera dza vivyo namwi.”

Currently Selected:

Matayo 18: CHIDUR

Highlight

Copy