Matayo 17

Ufalume wa Jeso unangʼazwa

(Mariko 9:2-13; Luka 9:28-36)

1Jeso ariphogomba dzulu ya chifoche, wakala vivi hata zichichira tsʼiku tʼandahu, ndo achiahwala ano Pʼetero, Jakobo na nduguye Johana, achenda nao vivi hata dzulu ya mwango ure ao tu hichiyao. 2Ariphofika kuko, achanza kugaluka chivinjine mbere za ao anafunzie. Usowe wangʼala dza dzuwa, na mavaloge nago gachigaluka meruphe tsetsetse. 3Phapho kare agomvi a Mulungu, Musa na Eliya achialairira ao anafunzie, na ákala anagomba na yiye Jeso. 4Pʼetero achimwamba Jeso, “Bwana, ni vidzo vivi vya kukala naswi hu phamwenga phapha! Ndo, uchihenza, nindajenga vibanda vihahu: chimwenga chako, chimwenga cha Musa na chinjine cha Eliya.” 5#Mwa 22:2; Zab 2:7; Isa 42:1; Mat 3:17; 12:18; Mar 1:11; Luk 3:22; Kʼumb 18:15#2 Pet 1:17, 18Pʼetero phokala unagomba gago, phapho kare ingu dzeruphe richilairira, richiima dzulu yao kwaerekeza, na laka kulaa kuko inguni richamba, “Yuyu ni Mwanangu nimuhenzaye, na unanihamira, musirikiseni.” 6Ao anafunzi ariphosikira gago, áphenywa ni woga muno hata achifinikʼirika vifunefune. 7Jeso phapho achiasengerera, achiapiga-piga achiaamba, “Hʼaya unukani mutsʼogophe!” 8Ndo achiunula vitswa vyao, na achiona Jeso hicheye tu phapho.

9Ndo Jeso na ao anafunzi ariphokala anateremuka kulaa phapho mwangoni, achiafungira achiaamba, “Mutsʼimwambire mutʼu yeyosi dzulu ya riratʼu ono rodzirona hata phondakala Mulungu udzinifufula mimi Mutʼu yelaa dzulu.” 10#Mal 4:5Ndo ao anafunzie achimuuza vivi, “Bee heka alimu a shariya anaamba kukala, Eliya ndiye yendamulongolera yiye Kʼirisito?” 11Jeso achiudzidza achiamba, “Eliya undakudza mwanzo jeri, adze agaudzetʼo maneno gosi. 12#Mat 11:14Ela ninamwambira mino, vivi Eliya wakudza kare hata ni atʼu kʼaamumanyire, na ndo hata achimuhendera mai. Na vivyo vyomuhendera Eliya, ndivyo vyondanihendera mimi Mutʼu yelaa dzulu.” 13Phapho ao anafunzi ndipho achimanya kukala, wakala unaambira dzulu ya Johana Mubatizi.

Jeso unamuphoza mwanache wa chilume mwenye pʼepʼo

(Mariko 9:14-29; Luka 9:37-43a)

14Jeso na ao anafunzi ahahu ariphogwirikana na duu ra atʼu, mutʼu mumwenga wamwendera Jeso, achimitʼa mavindi mbereze na 15achimwamba, “Bwana, monere mbazi mwanangu, mana, una chifofo na chinamuyuga muno. Chicho ukati unjine chinamubitʼa chisichisi mohoni, na ukati unjine chinamubitʼa chisichisi madzini. 16Na nidzimureha kwa ahumwao, ela kʼaaidimire kumuphoza.” 17Jeso achiaamba ahumwae, “Atʼu mwimwi kʼamuna kuluphiro, na muna adambi! Nindakala Na mwimwi hata rini? Na nindamuvumirira hata rini? Hʼaya mureheni phano bee yiye mwanache!” Mwanache achiphirikwa, na 18Jeso achimuchemera yiye pʼepʼo yekala udzimupagaa hata achilaa, na yiye mwanache achiphola phapho kare.

19Ndo chidzakoche, ao anafunzie achimutuwa Jeso hicheye achimuuza vivi, “Kwadze sino kʼahwidimire kumulavya yiye pʼepʼo?” 20#Mat 21:21; Mar 11:23; 1 Akor 13:2Jeso achiaudzidza achiaamba, “Ni kwakukala, kʼamuna kuluphiro. Ninamwambira jeri mino, kala ngawa muna kakuluphiro hata kumba ni kadide dza mbeyu ya haradali tu, mungari kwidima kuchamba chichi chirima, ‘Ngʼoka phano wende phara,’ na chingari kungʼoka chikenda, na kʼakuna chiricho chingari kumurima.”#17:20 Nakala zinjine zinaonjeza fungu ra 21 dza: Ela pʼepʼo dza yuyu, ulaviwa ni mavoyo na kufunga tu bahi.

Jeso unagomba kahiri dzulu ya chifoche

(Mariko 9:30-32; Luka 9:43b-45)

22Ukati umwenga, Jeso na ahumwae ákala a phamwenga kuko jimbo ra Galilaya. Ndo Jeso achiaamba, “Mimi Mutʼu yelaa dzulu nindalaviwa kwa atʼu ario 23andaniulaga, ela tsʼiku ya hahu nindafufulwa.” Na phapho ahumwae achishononeka muno.

Kuripha kodi ra Hekalu

24 # Kul 30:13; 38:26 Jeso na ahumwae ariphofika Kaparinaumu, atosi a kodi ra Hekalu ámutuwa Pʼetero achimuuza vivi, “Vidze, yuno mwalimu wenu unaripha kodi ra Hekalu?” 25Pʼetero achiudzidza achiamba, “Ehʼe, unalavya.” Na Pʼetero ariphokwendaphenya nyumba yokala Jeso achisagala tu, achilokera kare kuuzwa ni Jeso vivi, “Simoni, ano afalume a phano duniani akale anavoya kodi hata ana ao, hebu aavoya ao atʼu anjine hichiyao tu?” 26Pʼetero achiudzidza achiamba, “Aavoya ao atʼu anjine tu.” Phapho Jeso achiamba, “Kwa vivyo, anangwa a afalume kʼaaripha. 27Ela hata vivyo, kʼahwenzi kwakosa sino ao a phapha. Ndo enda vyako ukalowe ziyani, na beshe rondarigwira mwanzo rifunule kuko kwa mulomo, na undaona pʼesa zirizo zinatosha kuhuriphira kodi ra Hekalu siswi airi. Uchizona, zihwale ukariphe kodi rehu.”

Currently Selected:

Matayo 17: CHIDUR

Highlight

Copy