Matayo 16

Afarisayo na Asadukayo anahenza dalili

(Mariko 8:11-13; Luka 12:54-56)

1 # Mat 12:38; Luk 11:16 Tsʼiku mwenga, Afarisayo na Asadukayo ákwenda kwa Jeso achendamuheza kwa kumwamba ahende dalili ya konyesa kukala, widimiwe ulaa kwa Mulungu. 2Jeso achiaudzidza achiaamba,#16:2 Nakala zinjine kʼazina fungu ra phiri na ra hahu kwanzira phapha. “Dzuwa richikala rinatoka na kudoo, ni seti mwambe, ‘Machero kundasindatʼo!’ 3Kuchicha na kuchikala ku kutʼukutʼu, munaamba, ‘Rero ni seti kunye mvula!’ Ndo muchikala munaidima kulola dzulu mainguni na mukamanya kukala kundakalani, heka sambi kʼamwidima kuzimanya zino dalili zihendekazo ukati uno? 4#Mat 12:39; Luk 11:29Atʼu mwimwi mu ai na kʼamu aaminifu kwa Mulungu! Mwimwi munanihenza nihende dalili ya konyesa kukala, nálaa kwa Mulungu, ela tsʼindamuhendera dalili yoyosi. Dalili yindasala dza yiyatʼu tu yohenderwa mugomvi wa Mulungu Jona.” Ariphomarigiza kwaambira gago, achiaricha phapho yiye achiphauka.

Kudzimanyirira na mafunzo ga Afarisayo na Asadukayo

(Mariko 8:14-21)

5Jeso na anafunzie ariphovuka ziya, ao anafunzie ndiphomanya ányala kutsukula mikahe. 6#Luk 12:1Jeso achiaamba, “Mwimwi dzimanyirireni na kukolea kwa hamira ya Afarisayo, na Asadukayo!” 7Ndo ao anafunzi achanza kuuzana-uzana enye kwa enye, “Akale unagomba vivyo kwa kʼahutsukulire mikahe?” 8Jeso achigamanya garatʼu gokala anagomba na achiaamba, “Heka munauzana-uzana dzulu ya kutsʼakala na mikahe? Mwimwi kuluphiro renu ni dide muno! 9#Mat 14:17-21Yaani mwimwi kʼamudzangwe kunimanya mino nina widimi? Vino bee mukale mudzinyala ni vikaphu vingaphi vyoudzaza mwimwi vya visiku vyokala visala, phara niriphoamegera mikahe mitsano atʼu helufu tsʼano? 10#Mat 15:34-38Na mukale mudzinyala ni vikaphu vingaphi vyoudzaza mwimwi vya visiku vyokala visala, phara niriphoamegera mikahe mifungahe atʼu helufu ne? 11Kʼamumanyadze mwimwi kukala, nidzikala tsʼigomba dzulu ya mikahe? Bee dzimanyirireni na kukolea kwa hamira ya Afarisayo na Asadukayo!” 12Phapho ndo anafunzi achimanya kukala, ákala anaambwa adzimanyirire na mafunzo ga Afarisayo na Asadukayo, ela tsʼi hamira yipigirwayo mikahe.

Pʼetero unakubali kukala Jeso ndiye yiye Kʼirisito

(Mariko 8:27-29; Luka 9:18-20)

13Jeso na anafunzie aripholaa phapho, ákwenda boma ririro phephi na mudzi wa Kaisariya-Filipi. Kuko Jeso achiauza anafunzie achiaamba, “Atʼu anaamba mino Mutʼu yelaa dzulu ni ani?” 14#Mat 14:1, 2; Mar 6:14, 15; Luk 9:7, 8Ao achimuudzidza achimwamba, “Atʼu anaamba uwe u Johana Mubatizi. Anjine anaamba u Eliya, na hata anjine ao anaamba kukala, uwe u Jeremia, hebu mumwenga wa agomvi a Mulungu anjine.” 15Jeso achiauza kahiri achiaamba, “Hanga mwimwi, munaamba mino ni ani?” 16#Joh 6:68, 69Simoni Pʼetero achimuudzidza vivi, “Uwe ndiwe yiye Kʼirisito, Mwana wa Mulungu ariye moyo.” 17Jeso achimwamba, “Baha uwe Simoni mwana wa Jona! Maana, kumanyako kukala mimi ndimi yiye Kʼirisito, bee kwʼambirirwe ni mutʼu, hata uwe ni wafunulirwa ni Baba ariye mulunguni. 18Na chisha, dzinaro ni Pʼetero,#16:18 Maana ya dzina riri ra Pʼetero ni mwamba. nawe ninakwambira mino kukala, nindajenga kanisa rangu dzulu ya mwamba uo, na hata chifo kʼachindaidima kuririma. 19#Mat 18:18; Joh 20:23Mino uwe nindakupʼa funguwo za Ufalume wa Mulungu, na rorosi rondarikahaza phapha duniani, ndiro rondakahazwa hata kuko mulunguni, na rondarihenzeza phapha duniani, bee rindahenzezwa hata kuko dzulu mulunguni nako.” 20Chisha, Jeso achiafungira ao anafunzie kukala atsʼimwambire mutʼu yeyosi kukala, yiye ndiye yiye Kʼirisito.

Jeso unasema chimbere dzulu ya sheneneye na chifoche

(Mariko 8:30-9:1; Luka 9:21-27)

21Kulaira phapho, Jeso waanza kwaambira lwazu-lwazu anafunzie kukala, “Ni seti mimi nende Jerusalemu nikaturiswe muno ni atumia, makuhani abomu na alimu a shariya. Na hata nindaulagwa, ela tsʼiku ya hahu nindafufuka.” 22Phapho Pʼetero achimuusa kʼanda, na achanza kumugombera vivi, “Mulungu naagazize gago! Gago kʼagandakugwira kamare!” 23Ela Jeso yiye achimulozera mongo Pʼetero na achimwamba, “Uwe bee una Shetani hata niukira phapha! Maazogo uwe ni ga chidamu tsʼigo ga chimulungu, na uhenza unizize nitsʼichimize gago nihenzwago nihende.” 24#Mat 10:38; Luk 14:27Chisha, Jeso achiaamba anafunzie vivi, “Mutʼu yeyosi ahenzaye kukala mwanafunzi wangu, ni seti ariche njiraze mwenye, atsukule musalabawe, na anituwe. 25#Mat 10:39; Luk 17:33; Joh 12:25Maana, ahenzaye kutivya maishage mwenye, bee kʼandapata uzima uphya wa kare na kare. Ela alavyaye maishage kwa dzulu yangu, undapata uzima. 26Na vina faida yani mutʼu kuupata utajiri wosi wa dunia, ela yiye mwenye atsʼipate uzima? Kʼaphana! Maana, kʼakuna chitʼu chiricho na maana, kuriko uzima uo. 27#Mat 25:31; Zab 62:12; Arum 2:6Mimi Mutʼu yelaa dzulu nindakudza na widimi wa Baba Mulungu na malaika angu, na phapho ndipho nindamunosa chila mutʼu kutuwirizana na mahendoge. 28Ninamwambira jeri, phana anjine phapha ario kʼaandafa photsʼinona mimi Mutʼu yelaa dzulu ni mwangu Ufalumeni.”

Currently Selected:

Matayo 16: CHIDUR

Highlight

Copy