Luka 6:27-49
Luka 6:27-49 CHIDUR
Jeso waenderera kugomba achiamba, “Ela ninamwambira mwimwi munisirikisao, ahenzeni adawa enu, ahenderenitʼo aratʼu odzimumena, avoyereni aajaliwe ni Mulungu aratʼu amulaphizao, na avoyereni nao aratʼu amuhenderao vii. Mumwenga wao achikupiga ukofi kʼai mwenga, uwe bee hata mugaluzire yiyo kʼai yinjine nayo apige. Achihwala kotiro, murichire hata shatiyo nayo. Chila akuvoyaye-voyaye chitʼu, mupʼe, na achikuphoka miyoyo, tsʼimwambe akuudzire. Ahenderenitʼo anjine dza viratʼu muhenzavyo nao amuhendere. “Maana, muchikala mwahenza aratʼu amuhenzao nao tu, bee muna udzo wani? Kʼamuna udzo, mana, hata adambi nao anaahenza aratʼu aahenzao. Muchiahenderatʼo aratʼu amuhenderaotʼo nao tu, bee muna udzo wani? Kʼamuna udzo, mana, hata adambi nao anagahenda gago. Na muchikala munaakopesha aratʼu murio munaaona andamuripha nao tu, mukale munawirya kulikwa na kunoswa? Ngʼo kʼamuwirya, mana, hata adambi anaakopesha adambi anziao, kwa hata ariphwe chitʼu dza chicho! Kwa vivyo, ahenzeni adawa enu, na ahendereni chividzo. Lavyani photsʼilolera kuriphwa, na manoso genu gandakala mabomu, na mundakala anangwa a Mulungu Ariye Dzulu kuchira osi, mana, yiye ni mudzo hata kwa otsʼi mumvera, na ai. Mwimwi hendani mbazi dza Abayenu Mulungu arivyo na mbazi.” Chisha Jeso wagomba achiamba, “Mutsʼialamule anjine, na ndipho namwi kʼamundalamulwa ni Mulungu, mutsʼialaumu anjine, na ndipho namwi kʼamundalaumiwa ni Mulungu, na asameheni anjine, na ndipho namwi mundasamehewa ni Mulungu, apʼeni anjine chodziaphungukira, Na mwimwi mundahewa ni Mulungu. Mwimwi mundaphokera na mikono yenu pʼishi ya tele, yodzifyeherwa na kukuchwakuchwa hata kumwagika. Maana, pʼishi yiyatʼu muyihumirayo kwa anjine, ndiyo ariyo Mulungu undayihumira kwenu naye.” Chisha Jeso achiaambira tʼadi yiyi: “Vidze, mutʼu yetsʼona unaidima kumulongoza munziwe yetsʼona vivyo? Hʼa-a kʼaviidimikika, na achivihenda, osi airi andavoromoka bopʼoni. Mwanafunzi tsʼiye mubomu kuchira mwalimuwe, ela chila mwanafunzi achimala masomoge chividzo, nikukala dza mwalimuwe. Kwadze unalola chidudu chiricho dzitsoni mwa munzio, ela kʼuchona chikokopha chiricho mwako dzitsoni? Hebu unaidimadze kumwamba munzio, ‘Musena, hima nikulavye chidudu,’ na kuno kʼuchona chikokopha chiricho mwako dzitsoni? Uwe mulumakwiri uwe! Chilavye mwanzo chikokopha chiricho mwako dzitsoni, na ndipho undaidima kona chividzo hata widime kumulavya chidudu munzio naye.” Jeso waenderera kugomba achiamba, “Muhi udzo wa tʼude za kuriwa kʼauvyala matunda ga kʼoma, hebu muhi wa kʼoma kʼauvyala matunda madzo ga kuriwa. Atʼu aumanya muhi kwa tʼudeze uvyalazo. Vi lwazu kukala, atʼu kʼaahunda tʼini kulaa kwa mihi ya miya, hebu kʼaahunda zabibu kulaa kwa vitsaka vya mihi ya miya. Mutʼu mudzo, una madzo mwakwe moyoni, na kwa vivyo, ugomba gago madzo galaago mumo moyoni. Na mutʼu mui naye, una mai mwakwe moyoni, na kwa vivyo, ugomba gago mai galaago mumo moyoni. Maana, mutʼu ugomba garatʼu garigo tele mwakwe moyoni.” Chisha Jeso wagomba achiamba, “Kwadze munaniiha ‘Bwana, Bwana,’ na kuno kʼamugahenda gano nimwambirago? Bee ninamwambira mino, chila mutʼu adzaye kwangu, akasikira maneno gangu na kugatuwa, unga dza mutʼu ajengaye nyumba. Yiye nikuyitsimbira ndani muno hata akakumba mwamba, chisha akayitiya chunu. Ndo muvo wa madzi nikudza ukayipiga yiyo nyumba, ela ukashindwa vivyo, mana, yajengwa kudiniswa. Ela asikiraye maneno gangu na kʼagatuwa, unga dza mutʼu yejenga nyumba na kʼayitsimbirire ndani muno, na chisha kʼayitiyire chunu. Ndo muvo wa madzi uriphokudzayipiga, nyumba yiyo yagwa maruru, na yichikuluzwa ni madzi kamare!”