Luka 21
21
Sadaka ya muchetʼu gungu
(Mariko 12:41-44)
1Tsʼiku mwenga, Jeso wakala u Hekaluni unalolera chividzo vivyo matajiri arivyokala anabitʼa sadaka zao ndani ya chisanduku cha kuhwalira sadaka mumo Hekaluni. 2Phapho phachidza muchetʼu mumwenga yekala ni gungu na ni muchiya, achibitʼa ndururu mbiri mumo ndani. 3Ndo Jeso achiamba, “Ninamwambira jeri, yuyu muchetʼu gungu na muchiya ulavya sadakaye na moyo umwenga kuchira anjine osi. 4Maana, ao anjine osi alavya sadaka pʼesa zodzikala zirizo mwao mifukoni tu, ela ana mbeko zao kʼanda. Ela yuno muchetʼungwa muchiya yiye, ulavya chila chitʼu chodzikala unacho, na hata kʼana mbeko yinjine kʼanda yodziyikuluphira.”
Jeso unagomba dzulu ya kuvunzwa kwa Hekalu
(Matayo 24:1-2; Mariko 13:1-2)
5Anafunzi a Jeso anjine ákala anagomba dzulu ya Hekalu, jisi ririvyojengwa chividzo na mawe ga maana, na kutiywa maleleo kwa pʼesa za sadaka zokala zilavirwa Mulungu. Ndo phapho Jeso achiamba, 6“Ukati undafika urio riri Hekalu bee, rindavunzwa, na gaga mawe gosi mugaonago bee kʼarindasala hata dziwe mwenga renye dzulu ya rinjine.”
Riki na shenene
(Matayo 24:3-14; Mariko 13:3-13)
7Ndo ao anafunzi achimuuza vivi, “Mwalimu, rira Hekalu rindavunzwa rini? Na ni dalili yani yondaonyesa kukala, neno riro ri phephi na kulairira?”
8Jeso achiaudzidza achiaamba, “Dzimanyirireni mutsʼidze mukalembwa, mana, atʼu anji andalairira na andarihumira dzina rangu ambe, ‘Mimi ndimi yiye Kʼirisito,’ na ‘Uratʼu ukati ufika.’ Ela mwimwi tsʼiatuweni gao! 9Na muchisikira kuna viha na miyuwano, mutsʼiphenywe ni woga, kwakukala, ni seti gago galairire mwanzo, ela vivyo tsʼivyo kwamba gandakala ganaonyesa tsʼiku ya musindikizo wa urumwengu yifika phephi.”
10Ndo achenderera kwamba, “Itsʼi mwenga yindaheha na itsʼi yinjine, na ufalume umwenga undaheha na ufalume unjine. 11Itsʼi yindasumba muno, na kundakala na nzala na makongo ga lugwiza kutʼu mbalimbali. Kundakala na maneno ga kogofya, na mautʼu-mautʼu manjine ga kwangalaza kuko mbinguni. 12Na gachikala gago gosi kʼagadzangwe kulairira, mwimwi mundagwirwa muhenderwe mauku, muphirikwe masinagogini kwa alamuli na mufungwe jela, na mundaphirikwa hata mbere za afalume na magavuna, kwakukala, munanikuluphira. 13Na uo ndio ondakala ukati wenu udzo wa kunishuhudiya. 14#Luk 12:11, 12Na vivi amulani kutsʼalilikana chimbere myoyoni mwenu vyondaudzidza. 15Kwakukala, uo ukati uchifika, mimi mwenye nindamupʼa hekima na widimi wa kugomba hata ao adawa enu ashindwe ni kumuvunga ulongo, hebu kumupinga. 16Na hata avyazi enu enye, ndugu zenu enye, mbari zenu enye na asena enu enye nao andamugalukira, na hata andahendaaulaga anjine enu. 17Atʼu osi andamumena, kwakukala munanikuluphira. 18Ela gago kʼagandamuhenda chochosi kamare. 19Mwimwi gwiririrani kuluphiro renu kinyi tu, namwi mundatiya.”
Kuvunzwa kwa Jerusalemu
(Matayo 24:15-28; Mariko 13:14-23)
20Jeso waamba, “Muchidzayona Jerusalemu yilingwa ni majeshi, manyani kukala, ukatiwe wa kuvunzwa ufika. 21Ndo phapho ondakala a Judea, naakazire virimani, ondakala a Jerusalemu phenye, naauke, na ondakala a phephi-phephi nao, naatsʼende kamare phapho Jerusalemu. 22#Hos 9:7Maana, tsʼiku zizo zindakala ni tsʼiku za kutiywa akili, kwa hata garatʼu gosi goandikwa ni agomvi a Mulungu gachimire. 23Andamanya enye achetʼu ondakala ana tʼumbo na ondakala anaamwisa tsʼiku zizo! Maana, kundakala na riki bomu itsʼi yiyi, na chitai cha Mulungu chindaapata aa. 24Anjine andaulagwa na upanga, anjine andahwalwa mateka kwenda itsʼi zosi, na Jerusalemu yindakala mikononi mwa atʼu a makabila manjine hata ukati wao wa kutawala phondasirira.
Kuuya kwa Mutʼu yelaa dzulu
(Matayo 24:29-31; Mariko 13:24-27)
25 #
Isa 13:10; Ezek 32:7; Joel 2:31; Ufun 6:12, 13 “Tsʼiku ya kuuya kwangu mimi Mutʼu yelaa dzulu, kundahendeka maneno garigo tsʼigo ga kawaida kuko mwezini, nyenyezini na dzuwani. Maimbi gandanguruma muno baharini, atʼu a viryomo vyosi andakala chimoyomoyo hata aonde kwa zizo ngurumo za gago maimbi. 26Atʼu andagwirwa ni muchechetʼa hata agwe kwa woga vivyo aloleravyo maneno gondalairira duniani, mana, nguvu za dzulu zindasumbiswa. 27#Dan 7:13; Ufun 1:7Ndo chidzako, munone mimi Mutʼu yelaa dzulu ni mainguni ninadza na widimi na mungʼalo unji wa Mulungu. 28Maneno gago gachanza kuhendeka, imani na muunule vitswa vyenu mulole dzulu, kwakukala, phapho bee ndipho Mulungu undamutivya kamare.”
Funzo kulairirana na muhi wa mutini
(Matayo 24:32-35; Mariko 13:28-31)
29Chisha Jeso waambira tʼadi yiyi, “Nahuhwaleni mufano wa muhi wa mutini na mihi minjine. 30Mwimwi muyonapho yidzanza kulavya makodza matsanga, munamanya kukala, ukati wa kazikazi ufika. 31Ndo dza gago godzimwambira nago. Muchigaona ganahendeka tu, manyani kukala, Ufalume wa Mulungu u phephi. 32Ninamwambira jeri mino, atʼu angu oatsagula kʼaandafa akasira, hata garipho gago gosi gandahendeka. 33Mbingu na dunia zindakala na musindikizo, ela maneno gangu kʼagandasika. Gago gandakwenderera hata kare na kare.”
Ni seti mudzimanyirire
34Jeso waenderera kugomba achiamba, “Dzimanyirireni, mutsʼidze maisha genu mukagabananga kwa kuhenda mahendo makolo, unwadzi unji, hebu kukala chimoyomoyo kwa mazagazi gaga. Mwimwi muchikala kʼamundadzimanyirira, tsʼiku yiyo yondauya yindakudzamugwira dulukiza 35dza muhego wa fyuko ugwiravyo, na yindaakudzirira atʼu osi a chila phatʼu phapha duniani. 36Ndo dzimanyirireni, na muvoye chila tsʼiku kwa hata mwidime kupata mukotse wa kumuchiza azima kwenye maneno gago gosi gondalairira, na mwime mbere za mimi Mutʼu yelaa dzulu.”
37 #
Luk 19:47
Jeso wakala achifunza atʼu Hekaluni ukati wa mutsana tsʼiku hizo, ela kwakala kuchifika usiku wenda mulima wa Mizeituni akalale kwakwe muwekani. 38Atʼu osi ákala achenda Hekaluni na chiti kwa hata akamusirikise.
Currently Selected:
Luka 21: CHIDUR
Highlight
Share
Copy
Want to have your highlights saved across all your devices? Sign up or sign in