Luka 20
20
Ayahudi anamuuza Jeso dzulu ya widimiwe
(Matayo 21:23-27; Mariko 11:27-33)
1Tsʼiku mwenga, Jeso wakala u Hekaluni unafunza atʼu na kwasumurira dzulu ya Nguma Mbidzo. Makuhani abomu, alimu a shariya phamwenga na atumia achidza, 2na achimuuza Jeso achiamba, “Hwambire, uwe unahenda maneno gano ga kwavuguza atʼu muno boma ra Hekalu kwa widimi wani? Na ni ani yekupʼa widimi uno?” 3Jeso naye achiaudzidza kwa kwauza swali achiaamba, 4“Hebu nambirani, Johana Mubatizi ariphobatiza atʼu, uo widimiwe wakala ulaa kwa Mulungu, hebu wakala ulaa kwa atʼu?” 5Ela ao achikwatya kwambana enye kwa enye: “Huchamba widimiwe walaa kwa Mulungu, undahwuza yiye ahwambe, ‘Bee kwadze kʼamumukuluphirire?’ 6Na huchamba widimiwe walaa kwa atʼu, atʼu osi phapha andahupiga mawe, kwakukala, osi ákala anakuluphira kukala, Johana wakala ni mugomvi wa Mulungu.” 7Ndo achimuudzidza achimwamba kukala kʼaamanya widimiwe walaaphi. 8Jeso naye achiaamba, “Hʼaya bee hata mimi nami tsʼindamwambira yenipʼa widimi wa kuhenda maneno gaga.”
Tʼadi ya munda wa mizabibu na aroromi
(Matayo 21:33-46; Mariko 12:1-12)
9 #
Isa 5:1
Jeso waambira atʼu tʼadi yiyi, “Mutʼu mumwenga warima mundawe na achiphanda mizabibu, chisha acherekezana na atʼu anjine aurorome uo munda, ela zabibu zichiiva adze agavye. Ndo yiye mwenye achitsamira itsʼi ya kure, na achendakala kuko chirimo chizima. 10Musimu wa zabibu kwiva uriphofika, mwenye munda wamuhuma muhendikaziwe kwa aratʼu aroromi, kwa hata akamuhwalire fungure ra mavuno ga zabibu. Ela aratʼu aroromi ákwendamupiga yiye muhendikazi, na achimuudza mikono miphuphu. 11Yuyatʼu mwenye munda achimuhuma kahiri muhendikazi munjine, ela ao achendamupiga yuyu naye na achimuhenda vii, chisha achimuudza mikono miphuphu vivyo. 12Mwenye munda achimuhuma kahiri wa hahu: yuyu naye achendamupiga hata achimulumiza mbavu, na chisha achimutsupha konze ya uo munda. 13Phapho yuyatʼu mwenye munda achaza mwakwe moyoni achiamba, ‘Nindahendadze mino? Mimi vivi nindamuhuma mwanangu mwenye nimuhenzaye, mana, yuyu anaidima akendamogopha.’ 14Ela aratʼu aroromi ariphomona tu áambana vivi, ‘Yuyu abaye achifa ndiye yendahwala ufa. Ndo nahumuulageni kwa hata abaye achidzafa, ufawe ukale wehu.’ 15Ndo achimugwira achimulavya konze ya uratʼu munda wa mizabibu achendamuulaga.”
Ndo phapho Jeso achiuza vivi, “Hʼaya munaona yiye mwenye achidza, undakudzaahendadze ao aroromi? 16Yiye achidza, undakudzaaulaga ao aroromi, na uo munda wa mizabibu aerekezane na aroromi anjine.” Atʼu ariphosikira maneno gago achirema achiamba, “Nagatsʼikale hivyo kamare!”
17 #
Zab 118:22
Jeso achialola yiye, chisha achiauza vivi, “Maandiko ga Mulungu gano, maanaye nini?
‘Dziwe riro roremwa ni ajengi,
vivi ndiro rodzikala dziwe ra tende muno!’
18“Mutʼu achigwa dzulu ya dziwe riro, undatoka visiku-visiku, na richimugwerera mutʼu, rindamutisatisa.”
Swali dzulu ya kuripha kodi kwa Kaisari
(Matayo 22:15-22; Mariko 12:13-17)
19Alimu a shariya na makuhani abomu ámanya kukala, tʼadi yiyo yakala yi dzulu yao. Ndo achikala anahenza amugwire Jeso phapho kare, ela ni áogopha atʼu tu. 20Ndo sambi achikala anamwinza, na achiahonga atʼu anjine adzihende kukala ni adzo, na achiahuma akamuhege Jeso na maneno kwa hata achiudzidza ii, aidime kumugwira na amuphirike kwa abomu a sirikali. 21Ndo ao atʼu okala áhongwa achendamwamba Jeso vivi, “Mwalimu, hunamanya kukala, unagomba na unafunza maneno ga jeri. Hunamanya kukala, uwe kʼulola cheo cha mutʼu, na unafunza ujeri dzulu ya njira ya Mulungu. 22Ndo sambi, hwambire chikala ni shariya hebu tsʼiyo shariya kuripha kodi kwa Kaisari!”
23Ela Jeso waumanya uo muhego wao, na phapho achiaamba vivi, 24“Mwenye dinari#20:24 Dinari yakala ni pʼesa ya Chirumi. naalavye.” Mumwenga aripholavya, Jeso waauza vivi, “Sura rino na dzina rino ni vyakwe ani?” 25Ao achimuudzidza achimwamba, “Ni vyakwe Kaisari.” Jeso achiaamba, “Hʼaya vyakwe Kaisari mupʼeni mwenye, na vyakwe Mulungu navyo, mupʼeni Mulungu mwenye vivyo.” 26Ao atʼu achangalazwa ni maudzidzige. Achinyamala tu zii. Muhambo wao phapho mbere za atʼu kʼaugwirire neno rorosi.
Swali dzulu ya kufufuka
(Matayo 22:23-33; Mariko 12:18-27)
27 #
Mahe 23:8
Asadukayo aambao kukala, afadzi kʼaafufuka, ákwenda kwa Jeso achendamwamba, 28#Kʼumb 25:5“Mwalimu, Shariya ya Musa yinahwamba, ‘Mutʼu achihwala na afe ariche muchewe kʼadzangwe kupata mwana, nduguye yiye mufadzi ni seti amuhwale yiye gungu amuvyalire ana nduguye.’ 29Ndo sambi, pʼindi kwakala ndugu mwenga, alume afungahe. Yuyatʼu muvyere wahwala, ela achifa photsʼivyala naye yiye muche. 30Muvahawe achimuhwala yuyatʼu gungu, ela yuyu naye kʼavyalire naye achifa vivyo. 31Nduguye wa hahu naye achimuhwala, ela maneno gachikala dza vivyo. Ndo achenderera vivyo kuhwala na kufa hata osi afungahe, photsʼipata mwana. 32Musindikizowe, achifa yuyatʼu muchetʼu naye. 33Ndo sambi, tsʼiku atʼu phondafufulwa, muchetʼu yiye undakala mukaza ani? Kwani osi afungahe ámuhwala vivyo.”
34Jeso achiaamba, “Phapha duniani atʼu anahwala na kuhwalwa. 35Ela aratʼu ondakala anawirya kufufulwa kulaa kuzimu na apate uzima uphya wa kare na kare, kʼaandahwala hebu kuhwalwa. 36Kuko atʼu andakala dza malaika a Mulungu, na kʼaandafa kahiri. Ao andakala ni anangwa a Mulungu kwa hata andakala áfufulwa kulaa kuzimu. 37#Kul 3:6Na dzulu ya kufufulwa kwa atʼu, samba Musa wakungʼaza lwazu-lwazu mumo Maandikoni ga Mulungu dzulu ya chitsaka chokala chinaaka moho? Phapha Musa unamuhadza Mwenyezi Mulungu dza Mulungu wa ano Burahemu, Isaka na Jakobo. 38Na bee, yiye tsʼiye Mulungu wa afadzi, ela ni Mulungu wa aratʼu ario moyo, mana, aratʼu osi oaiha kwakwe ana uzima wa kare na kare.”
39Alimu a shariya anjine achiamba, “Mwalimu udziudzidza chividzo kamare.” 40Na kʼaphana hata mumwenga wao yesubutu kumuuza kahiri maswali manjine.
Swali dzulu ya yiye Kʼirisito
(Matayo 22:41-46; Mariko 12:35-37)
41Jeso waauza achiamba, “Vyambikadze kukala, yiye Kʼirisito ni mutʼu wa mudzungu wa Daudi, 42#Zab 110:1na yiye Daudi mwenye kwenye chitabu cha Zaburi unaamba kukala,
‘Bwana Mulungu wamwamba Bwana wangu,
“Sagala upande wangu wa mukono wa kulume,
43hata phondakuhenda warime tsetsetse adawao” ’?
44“Yiye Daudi mwenye tu, unamwiha yiye Kʼirisito ‘Bwana,’ sambi yiye Kʼirisito unaidimadze kukala ni mutʼu wa mudzunguwe kahiri?”
Jeso unaakanya atʼu dzulu ya alimu a shariya
(Matayo 23:1-36; Mariko 12:38-40)
45Atʼu osi ariphokala anamusirikisa, Jeso waamba anafunzie vivi, 46“Dzimanyirireni na alimu a shariya. Ao ahenza kuchira-chira na kuno adzidzivalira mazurungi mare kwa aonewe ni abomu, na ahenza kulamuswa ni atʼu chiishima kuko vyeteni, ahenza kusagala mbere-mbere mumo masinagogini, na kusagala mutʼu mwa abomu shuhulini. 47Ela anaaiyira magungu miyo yao hata kʼaana haya, na chidzako, anaayaza manza atʼu kwa kuvoya mavoyo mare. Tsʼiku ya ulamuli andatiywa akili vikali muno atʼu dza ao!”
Currently Selected:
Luka 20: CHIDUR
Highlight
Share
Copy
Want to have your highlights saved across all your devices? Sign up or sign in
