Saray Salmo 7
7
Say Pikekerew na Katonungan#SAY TITULO ED TIKSTON HEBREO: Sakey ya imnon kinanta nen David ed Katawan lapud kinen Cus a Benjaminita.
1 Katawan a Dios ko, pasalimbengan ak ed sika;
ilaban tan iyagel mo ak pad amin da ray mangoosil ed siak,
2ta no andi, singa ra lion a mangyakar ed siak ed arawin pasen,
ya anggapo lad may makapangilaban ed siak,
et bingbingkasen da ak.
3-4 Katawan a Dios ko, no nanggawa ak na maoges ed siopaman,
no nantraidor ak ed kaarok,
odino pinasakitan kon anggapoy makasengeg so kalaban ko,#7:3-4 pinasakitan kon anggapoy makasengeg so kalaban ko; odino kinasian ko so toon nanggawad siak na makapoy tan ag ontokuy ed katonungan.
no ginawak so anggan dinan ed saraya,
5paosilan mo ak ed saray kalaban ko ta erelen da ak,
pagatin-gatinan mo ak ya anggad ipatey ko,
insan diad dabuk taynan day bangkay ko!
6Alagey ka lapud pasnuk mo, O Katawan!
Talindeg ka sumpad sebeg da ray kalaban ko;
bangon ka pa tan tulongan mo ak!
Katonungan so labay mon nagawa,
7kanyan pantitipon mo pa ray katoowan ed kaliber-liber mo,
tan manlapud tagey oleyan mo ra.
8Sikay huis na amin a katoowan.
Sintinsiaan mo ak pa, O Katawan,
onung ed inkatonung tan inkamaung kon too.
9Matonung kan Dios
tan sisintinsiaan moy kanunotan tan pilalek mi.
Patondam pay kaogsan da ray
totoon maoges tan tumangan mo pa ray maung a totoo.
10Say Dios so manangyagel ko,
ilalaban to ray matoluk ed sikato.
11Matonung a huis so Dios
tan dudusaen to lawas iray totoon maoges.
12No ag ira mampatauli,
iyobul na Dios so ispada to.
Pipinaten ton itaryay bekang na pana to;
13ipaparaan to ray armas ton makapatey,
iinan to na apoy so ngoro na saray pana to.
14Imanom so pannununot na totoon maoges ed kaogsan;
iplaplano ray panggawa ray golo tan say pamalikdo ra.
15Balet sikaran diliy napelag ed abut ya impatit dad arum a totoo.
16Kanyan dudusaen ira lamlamang na dilin kaogsan da,
tan napapasakitan ira na dilin panagduksa ra.
17Pisasalamatan koy Katawan lapud inkatonung to;
kakantaan ko na pangidayew so Katawan a Sankatageyan.
Currently Selected:
Saray Salmo 7: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
