Saray Salmo 28
28
Pikekerew na Tulong#SAY TITULO ED TIKSTON HEBREO: Salmo nen David.
1Ontatawag ak ed sika, Katawan, a manangyagel ko.
Dengel mo ak pa!
No ag mo ak ebatan, magmaliw ak
a sakey ed saray totoon onlalasur ed pasen a panaayaman da ray inaatey.
2Dengel mo ak pa no onkerew ak ed sika na tulong,
no iyatagey ko ray limak tan iyarap ko rad masanton Timplom.
3Ag mo ak pa pidudusad saray totoon maoges,
totoon managgaway kaogsan—
saray totoon maung so pitotongtong dad kapara ran too,
balet walay bosul ed kapusoan da.
4Dusam ira lapud saray ginagawa ra,
lapud saray kasalanan da.
Dusam ira lapud saray ginagawa ran kasalanan;
iter moy dusan kanepegan da!
5Ag da iimanoen iray ginagaway Katawan,
odino saray pinapalsa to;
kanyan dusaen to ra,
tan deralen to ra ya anggad angga.
6Idayew yoy Katawan;
ta dinengel toy inkerew ko na tulong.
7Say Katawan so biskeg tan manangyagel ko,
imamatalek kod sikato so bilay ko.
Tutulongan to ak tan pagagayagaen to ak;
idayew ko diad panamegley na saray maliket a kanta.
8Say Katawan iyaagel to ray totoo to,
iyaagel tan ilalaban toy pinili ton ari.
9Ilaban mo pa ray totoom, O Katawan,
tan bindisionan mo pa ray totoon kayaryan mo!
Sika komuy pumapastol da,
tan asikasom ira ya anggad angga.
Currently Selected:
Saray Salmo 28: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
