Марк 5

Герасинда жинерар хкудун

(МатӀай 8:28-34; ЛукӀа 8:26-39)

1 Исани тилмизар вирин а пата авай герасинвийрин вилаятдиз акъатна. 2Иса луьткведай эвичӀайла, гьасятда кьветӀера авай сурарай Адан вилик чӀуру жин квай са кас акъатна. 3Кьейибур динжардай кьветӀер ам патал кӀвал-югъ тир, гьич садавайни ам гьатта зунжурривни кутӀунна секинариз жезвачир; 4мукьвал-мукьвал ам зунжурралди кутӀуннатӀани, адаз къандалар янатӀани, ада абур кукӀвариз гадариз хьанай. Гьич садавайни ам муьтӀуьгъариз жезвачир. 5Акъваз тавуна, йифдини югъди, дагъларани кьветӀера-сурара гьарай ацалтна, ада вичи вич къванерив ядай. 6Яргъай Иса акурла, ада атана Исадин вилик икрам авуна, 7ва ада гьарайна лагьана:

– Ваз завай вуч кӀанзава, Виридалайни Виниз тир Аллагьдин Хва Иса? Ваз Аллагьдин хатур аватӀа, зун азабрик кутамир!

8Исади лагьана:

– ЭкъечӀ и инсандай, чӀуру жин!

9Исади адавай жузуна:

– Ви тӀвар вуж я?

– Зи тӀвар Кьушун я, вучиз лагьайтӀа чун гзаф я, – жаваб гана ада.

10Ада Исадиз чеб и вилаятдай чукурмир лугьуз минетиз хьана. 11Пелен кӀане вакӀарин са чӀехи суьруьди векь незвай. 12Вири жинерри Исадиз минет ийиз лагьана:

– Чун вакӀарин къенериз гьахьдайвал Вуна чун гьабурук кутур.

13Исади абуруз ихтияр гана. ЧӀуру жинерарни а инсандай экъечӀна, фена вакӀариз гьахьна. Кьве агъзур кьван вакӀар авай суьруьди, кухунна фена, тик чархалай вириз хкадарна. Абур вири цин кӀаниз яна. 14ВакӀарбанри, цӀай квайбуру хьиз, катна фена, и кардикай шегьердани хуьрера ахъайна. Агьалиярни вуч хьанатӀа лугьуз къвез килигиз хьана. 15Исадин патав атайла, абуруз жинеррин кьушун квайди пекер алаз ва акьул кьиле аваз анал ацукьнаваз акуна. Абуруз кичӀе хьана. 16А кар акурбуру жинерар квайдакайни вакӀарикай хьайи-хьайивал атайбуруз ахъайна. 17Анал алайбуру Исадиз, чпин патарай ахлад лугьуз, минетиз хьана. 18Иса луьткведа акьахдайла, жинерар хкатайда Адаз вични твах лугьуз минетна. 19Амма Исади адаз ихтияр ганач.

– Ахлад жуван кӀвализ, жуван мукьвабурун патав, Реббиди ваз вуч регьим авунатӀа, Ада ваз гьихьтин зурба кар авунатӀа, хъфена гьадакай ахъая, – лагьана Исади.

20И касди Исади вичиз авур зурба кардикай ЦӀуд-Шегьер тирвал хабарар чукӀурзавай. Вири инсанарни мягьтел хьана амукьзавай.

Яиран рушал чан хкун

(МатӀай 9:19-26; ЛукӀа 8:41-56)

21Иса луьткведа аваз элкъвена кьулухъ хтайла, гзаф инсанар атана Адал алтӀушна. Ам вирин къерехда акъвазнавай. 22Адан патав синагугдин кьиле авайбурукай тир Яир лугьудай са кас атана. Иса акунмазни, ам Адан кӀвачерик ярх хьана. 23Ада минетна лагьана:

– Зи руш ажалдик ква, атана адалай кап алтадна, ам ажалдикай хиласа.

24Иса адахъ галаз фена. Адан гуьгъуьна гзаф инсанар гьатнавай, абуру Ам чуькьвена юкьва тунвай. 25Фейи чкада цӀикьвед йисуз датӀана къеняй иви физвай са паб авай. 26А папаз такур лукьман хьаначир, абурукай адан чан туьтуьниз кӀватӀ хьанвай. Ада вичихъ авай-авачирди вири лукьманриз харжнатӀани, адаз регьят хьаначир, адан гьалар амайдалайни пис жезвай. 27-28Исадикай а папаз виликрани ванер атанай. Исадин пекерик вичивай гъил кягъиз хьайитӀа, зун сагъ хъжеда лугьуз ада вич чӀалахъарзавай. ГьакӀ хьайила, инсанрин арадай атана, ада кьулухъай Исадин пекерик гъил кяна. 29А папай физвай иви гьасятда акъваз хьана ва ада вич сагъ хъхьайди кьатӀана. 30Исади Вичяй фейи къуват гьасятда гьиссна. Ада, халкьдихъ элкъвена, хабар кьуна:

– Зи пекерик ни гъил кяна?

31– Халкьди Вун элкъуьрна юкьва тунвайди акваз-акваз, Вуна «Зи пекерик ни гъил кяна?» лугьуз, хабар кьазвани? – лагьана Адаз тилмизри.

32И кар авурди гьи паб тиртӀа лугьуз, Исади кьуд патаз вил вегьена. 33Папа, вичиз хьанвай регьятвал чиз, кичӀела зурзаз Адан кӀвачерик ярх хьана, вичин азабрикай ва гила хьанвай регьятвиликай авайвал Исадиз ахъайна.

34– Чан руш! – лагьана Исади адаз. – Ви иманди вун хиласна. Ахлад, саламат хьуй вун! Мад ваз тӀал хъжедач!

35И гафар Адан мецел аламаз, синагугдин кьиле авайдан кӀваляй са кас атана, лагьана:

– Я Яир! Ви руш кьена. Муаллим мад икрагь ийимир.

36Исади и гафар ван тахьайдай кьуна, синагугдин кьиле авайдаз лагьана:

– КичӀе жемир, анжах Захъ иман ая!

37Петрудилай, Якьубалай ва Якьубан стха Ягьядилай гъейри Ада садазни Вичихъ галаз къведай ихтияр ганач. 38Синагугдин кьиле авайдан кӀвализ атайла, Адаз ана авай шел-хвал, гьарай-вургьай акуна. 39КӀвализ гьахьна, ана Ада шехьзавайбуруз лагьана:

– Куьне ина шелар-хвалар вучиз ийизва? Руш кьенвач, ам ксанва.

40Абур Адал хъуьрена. Амма Ам, вири кӀваляй акъудна, рушан диде-буба ва Вичин пуд тилмизни галаз руш къатканвай кӀвализ гьахьна. 41Рушан гъил кьуна, Исади лагьана:

– Талита, кум! (Ам «Я руш, За ваз къарагъ лугьузва» лагьай чӀал я.)

42Руш тадиз къарагъна, къекъвез эгечӀна – адан цӀикьвед йис тир. И кар акурбур мягьтел хьана амукьна. 43Исади абуруз и кардикай садазни талгьун эмирна. Ахпа Ада рушаз тӀуьн гун эмирна.

Currently Selected:

Марк 5: ЛезПК

Highlight

Copy