Марк 4

НикӀе тум цазвайдакай кьиса

(МатӀай 13:1-9; ЛукӀа 8:4-8)

1 Исади вирин къерехда мад чирвилер гуз хьана. Вичин патав гзаф инсанар атуниз килигна, Ам луьткведа акьахна. Халкь вирин къерехда амукьна. 2Луьткведа ацукьна, Ада яргъалди Вичин несигьатар кьисайралди инсанрал агакьарзавай. Ада халкьдиз ихьтин кьиса ахъайна:

3– Яб це! Йикъарикай са юкъуз лежбер никӀиз тум цаз фена. 4Ада тум вегьидайла, са бязи тварар рекьин къерехрал аватна, алтӀушай къушари абур кӀуфар ягъиз тӀуьна. 5Са бязи тварар къван квай чкадиз аватна. И тварар фад экъечӀна, вучиз лагьайтӀа абур накьв тӀимил квай чкадиз аватна. 6Рагъ экъечӀайла, цӀирер шуьткьвена, чӀварахар галачирбур хьиз, кьурана. 7Са бязи тварар къалгъанар квай чкадиз аватна. Къалгъанри чӀехи жердавай цӀирер пӀуьрчӀуькьарна. Гьавиляй абуру майваяр гъанач. 8Амай тварар мублагь чилел аватна ва абуру цӀир авуна, хкаж хьана, майваярни гъана – сада къанницӀуд твар, муькуьда – пудкъад, амайбуруни – виш.

9Ахпа Исади хълагьна:

– Нихъ япар аватӀа, гьадаз ван атурай.

Кьисадин мана ачухарун

(МатӀай 13:10-23; ЛукӀа 8:9-15)

10Халкь чкӀана, Иса Вичин цӀикьвед тилмиздихъни Вичин гуьгъуьнавайбурухъ галаз кьилди амукьайла, абуру Адавай кьиса ахъаюнин мана-метлеб вуч ятӀа хабар кьуна.

11– Аллагьди пачагьвал авунин сирер кьатӀун квез ганва; амайбуруз кьисаяр мисал яз гъана кӀанда, – лагьана Исади, – 12Каламда лагьанвайвал: «Аллагьдихъ элкъуьн тавун патал ва Ада чпелай гъил къахчун тавун патал, абуруз килигайла аквазвач, яб гайила абур гъавурда акьазвач».

13Исади абуруз мад лагьана:

– Куьн и кьисадин гъавурда гьатначни? Бес амай кьисайрин гъавурда куьн гьикӀ гьатда? 14Тум вегьизвайда цазвайди Аллагьдин Гаф я. 15Рекьин къерехдал аватнавай тум – им ван хьана рикӀера Аллагьдин Гаф гьатнавай, амма ам анай тадиз иблисди ахкъудай инсанар я. 16Гьа и жуьреда къван квай чкадиз аватнавай тумни – ван хьанмазни гьасятда гаф шадвилелди кьабулдай инсанар я лагьай чӀал я. 17Амма чпихъ мягькем дувул тахьуниз килигна, абур икӀ яргъалди амукьдач. Чеб а гаф кьуна лугьуз хурук кутурла, кьил баладик акатайла, абур гьасятда рекьяй акъатда. 18Къалгъанриз вегьенвай тум гафунин ван къвезвайбур я лагьай чӀал я. 19Амма гьар йикъан къайгъуйри, девлетдихъ вил ичӀи хьуни ва маса къанихвилери ахьтинбурун рикӀера гьатнавай гаф пӀуьрчӀуькьарда, ам бегьер тагудайди ийида. 20Миян чилиз аватнавай тварар – гафуниз яб гана, ам кьабулзавайбур я. Гьа ксари вичин бегьерни гъида – садбуру къанницӀуд гъилера, масабуру пудкъад гъилера, са бязибуру виш гъилерилайни артух бегьер гъида.

СукӀрадин кӀаник квай шем

(ЛукӀа 8:16-18)

21Исади абуруз лагьана:

– КуькӀуьрнавай шем къапунин кӀаник кутуна туьхуьрун патал, я тахьайтӀа чарпайдин кӀаник эцигун патал гъизвайди яни? Ам шемерганда тун патал гъизвайди тушни кьван? 22Винел акъат тийидай сирни авайди туш, я ашкара тахьана амукьдай чинебан карни. 23Нихъ ван къведай япар аватӀа, гьадаз ван атурай.

24Ада мад лагьана:

– Исятда квез ван жезвай гафариз хъсандиз яб це. Куьне гьихьтин уьлчмедалди алцумайтӀа, квезни гьахьтин уьлчмедалди алцумда, квез гьатта артухни гуда. 25Авайдаз мадни гуда, авачирдавай гвайдини къакъудда.

Тварцикай кьиса

26Исади давамар хъувуна:

– Аллагьдин Пачагьлугъ инсанди чилиз тум вегьизвайдаз ухшар я. 27Ахпа ам йифиз ксузва, югъ алукьайла къарагъзава. Тум гьикӀ экъечӀзаватӀа, гьикӀ цӀир ахъайзаватӀа, адаз хабарни жедач. 28Чили сифте вичи къаз гъида, ахпа къуьлуьн кьилерив чеб ахъайиз тада, адалайни кьулухъ кьилер тварарай ацӀурда. 29Бегьер агакьайла, инсанди гьасятда мукал гъиле кьада, вучиз лагьайтӀа гвен гуьдай вахт атанва.

Финдин тварцикай кьиса

(МатӀай 13:31-34; ЛукӀа 13:18-21)

30Исади мад лагьана:

– Аллагьдин Пачагьлугъ чна куьв гекъигин? Я тахьайтӀа гьихьтин кьисадалди чна адан шикил чӀугван? 31Ам финдин тварцив гекъигиз жеда. Ам дуьньяда чилик кутазвай тумарикай виридалайни куьлуь тум я. 32Амма цайила, адакай экъечӀдай тар амай салан вири набататрилайни чӀехи жеда. Ада чӀехи хилер гъида. Хъен гудай гьа хилерал къушаривай мукар ийиз жеда. 33Абур гъавурда гьатдай тегьерда Исади гьа ихьтин кьисайралди Аллагьдин гафар абурал агакьардай.

34Кьиса галачиз Ада халкьдиз ихтилат ийидачир, амма тилмизрихъ галаз кьилди амукьайла, Исади абуруз кьисайрин мана ачухардай.

ТӀурфан секинарун

(МатӀай 8:18, 23-27; ЛукӀа 8:22-25)

35Гьа йикъан няниз Исади тилмизриз лагьана:

– Ша чун вирин а патаз экъечӀин.

36Абурни, халкь туна, Адахъ галаз луьткведа акьахна. Абурун гуьгъуьна маса луьтквеярни авай. 37КӀеви гар акъатна; лепейри, луьткведин къерехрилай хкадриз, ам цяй ацӀурзавай. 38Иса луьткведин кьулухъ кьиле, тумаж акьалжнавай хъуьцуьган кьилик кутуна, ксанвай. Тилмизри Ам ахварай авудна лагьана:

– Муаллим! Ваз чун квахьна кӀанзавани?

39Иса къарагъна, гарузни вириз «Кис хьухь, акъваз» лагьана эмир гана. Гар секин хьана, вирин кьуд пата лал кьена.

40– Квез вучиз икьван кичӀе я? – лагьана Исади тилмизриз. – Квехъ са тӀимил кьванни иман авачни?

41Авайдалайни гзаф кичӀе хьайи абуру чпи чпиз лугьуз хьана:

– Вирни гар муьтӀуьгъарзавай Им вуж хьуй?

Currently Selected:

Марк 4: ЛезПК

Highlight

Copy