Марк 3

Киш юкъуз сагъар хъувун

(МатӀай 12:9-14; ЛукӀа 6:6-11)

1Мад садра Киш юкъуз Иса синагугдиз атана. А юкъуз ана гъил члахъ хьанвай са инсан авай. 2Бязибуру Исадилай вил алудзавачир. Адак тахсирар кутун патал, Ада Киш юкъуз начагъди сагъардатӀа лугьуз, абуру Ам вилив хуьзвай. 3Исади члахъ гъил галай касдиз лагьана:

– Виридаз аквадайвал юкьвал акъваз.

4Анал алай фарисейризни Ада лагьана:

– Киш юкъуз хъсанвал авун лазим яни, я тахьайтӀа писвал? Уьмуьр хвена кӀандани, я тахьайтӀа пучна кӀандани?

Амма абурай гафни акъатнач. 5Абуруз хъел кваз вил яна, абурун рикӀер къван хьунал гьайиф чӀугуна, Исади а инсандиз лагьана:

– Ви гъил инихъ ая кван.

Адани лагьайвал авуна. Адан гъил сагъ хъхьана. 6Фарисейри, анай экъечӀна, Гьируд пачагьдин терефдаррихъ галаз Иса рекьидай рекьер жагъурун патал меслят авуна.

Исади гзаф инсанар сагъар хъувун

(МатӀай 4:23-25; 12:15-16; ЛукӀа 6:17-19)

7-8Иса Вичин тилмизарни галаз вирин къерехдал фена. Галилейдай, Ягьудатдай, Ярусалимдай, Идумейдай, Ярдан вацӀун а патай ва гьакӀни Туьрсдинни Сидундин патарив гвай чкайрайни Адан крарикай хабар авай гзафбур Исадин гуьгъуьна аваз фена. 9Гзаф инсанар кӀватӀ хьуниз килигна, Исади, Вич басрухра гьат тавун патал, тилмизриз Вичиз кьилди луьткве гьазура лагьана. 10Ада гзафбур сагъар хъувуна лугьуз, азарар квайбур, Исади чпик гъил кяна кӀанз, Адав агатиз кӀанз алахънавай. 11ЧӀуру жинерар квайбуру, Ам акурвалди, Адан вилик ярх хьана, гьарайзавай:

– Вун Аллагьдин Хва я!

12Амма Ада абуруз Вич вуж ятӀа лугьун кӀевелай къадагъа ийизвай.

ЦӀикьвед илчи хкягъун

(МатӀай 10:2-4; ЛукӀа 6:14-16; Кр. 1:13)

13Ахпа Ам пелел экъечӀна ва Вичиз кӀандайбурузни эверна. Абурни Адан патав атана. 14-15Вичихъ галаз са рекье хьун патал ва гьар санихъ Шад Хабардикай муштулухар гуз ракъурун патал, Исади абурукай цӀикьвед кас хкяна. Ада абуруз жинерар хкуддай къуват гана. И цӀикьвед касдиз Исади илчияр лагьана тӀвар гана. 16Ада хкянавай цӀикьвед илчи ибур тир: Ада Петру лагьана тӀвар гайи Симун, 17Зебедеян рухваяр Якьубни Ягья (Исади абуруз Бунаржис, яни цавун гугрумрин рухваяр лагьана тӀвар ганвай), 18Эндирей, ФилипӀ, БартӀаламай, МатӀай, ТӀумай, Гьалфеян хва Якьуб, Тадас, Миллетбаз Симун 19ва гьакӀни Ам маса гайи Искарият Ягьуд.

Иса ва Багьал-Зевул

(МатӀай 12:22-29; ЛукӀа 11:14-22; 12:10)

20Ам кӀвализ хтайла, аниз мад акьван инсанар атана хьи, Исадизни Адан тилмизриз ацукьна фу недай мажални хьанач. 21И кардикай Исадин мукьва-кьилийриз хабар хьайила, абур Ам хутахиз атана, вучиз лагьайтӀа абуру «Ам Вич Вичик квач» лугьуз фикирзавай. 22Ярусалимдай атай тавратдарри лугьузвай:

– Адак жинерин кьил тир Багьал-Зевул акатнава! Жинерар хкуддай къуватни Ада гьадавай къачузва!

23Инал Исади тавратдарриз эверна, абуруз кьисаяр мисал гъиз эгечӀна:

– Иблисди иблис гьикӀ чукурда? 24Са пачагьлугъ сад садаз акси кьве патал пай хьайитӀа, а пачагьлугъ яргъалди амукьдач. 25Хизан кьве патал пай хьайитӀа, а кӀвал чӀур жеда. 26Иблис вич вичиз акси хьайитӀа, иблисдивай давам гуз жедач, адан эхир пуч жеда. 27Низ гуж авай касдин кӀвал атӀуз кӀанзаватӀа, ада эвелни-эвел къуват авайдан гъилер-кӀвачер кутӀунна кӀанда, ахпа адан кӀвал тарашиз жеда. 28За квез рикӀивай лугьузва: инсанрин вири гунагьрилайни, абуру ийизвай чӀуру ихтилатрилайни гъил къахчуда, 29амма вуж Пак Руьгьдикай чӀурукӀа рахаз хьайитӀа, адалай гьич садрани гъил къахчудач. А гунагь инсандик даим кумукьда.

30Иса гьа икӀ рахана, вучиз лагьайтӀа тавратдарри «Адак чӀуру жин акатнава» лугьузвай.

Исадин дидени стхаяр

(МатӀай 12:46-50; ЛукӀа 8:19-21)

31Ахпа Исадин дидени стхаяр атана, къецел акъвазна. Абуру, Исадиз эверун патал, са кас ракъурна. 32Инсанар Иса юкьва туна ацукьнавай. Абуру Адаз лагьана:

– Ингье, ви дидени, стхаярни вахар къецел ала, абуру Вун хабар кьазва.

33– Зи диде, зи стхаяр-вахар вужар я? – жаваб гана Ада. 34Ацукьнавайбурулай вил элкъуьрна, Ада лагьана:

– Ингье Зи диде ва Зи стхаяр-вахар! 35Аллагьдин къаст ни кьилиз акъудзаватӀа, гьам Зи стхани я, вахни я, дидени.

Currently Selected:

Марк 3: ЛезПК

Highlight

Copy