Марк 2

Фалужди янавайди сагъар хъувун

(МатӀай 9:1-8; ЛукӀа 5:18-26)

1Са кьадар йикъар алатайла, Иса Кефернагьумдиз хтана. Ам кӀвале авайдакай вири шегьердиз ван хьана. 2Гьасятда кӀвал инсанрай ацӀана, ракӀаривни чка гумукьнач. Исади абурал Аллагьдин Гаф агакьариз хьана. 3Адан патав са кьадар инсанар атана, абурукай кьуд касди фалужди янавай сад гъана. 4Гзаф инсанар хьуниз килигна, Исадин мукьув агатдай мумкинвал тахьайла, мес кьунвайбуру Иса авай кӀвалин къавай тӀеквен акъудна, гьанай азарди кьунвайди агъуз авудна. 5Исади, абурун иман акурла, фалужди янавайдаз лагьана:

– Ви гунагьрилай гъил къахчунва, чан хва!

6-7Анал тавратдаррикайни са бязибур ацукьнавай.

«Ида аси ихтилатар вучиз ийизва?» – фикирна абуру. – «Тек са Аллагьдилай гъейри, гунагьрилай гъил нивай къахчуз жеда?»

8Абуру ихьтин фикирар ийизвайди Исадин рикӀиз аян хьана.

– Вучиз куьне куь рикӀера а фикирар тунва? – лагьана Ада абуруз. – 9Фалужди янавайдаз вуч лугьун регьят я? «Ви гунагьрилай гъил къахчунва» лугьудани, я тахьайтӀа «Къарагъ, месни къахчуна ахлад»? 10-11Амма виридан гунагьрилай гъил къахчудай ихтияр Инсандин Хцихъ авайди квез чир хьун патал, За фалужди янавайдаз лугьузва: «Къарагъ, жуван месни къахчуна кӀвализ ахлад!»

12Ам гьасятда къарагъна, вичин месни къахчуна, виридан виликай тӀуз хъфена. Анал алайбур вири мягьтел хьана.

– Ихьтин кар чаз садрани акурди тушир, – лугьузвай абуру Аллагьдиз шукур ийиз.

Левидикай Исадин тилмиз хьун

(МатӀай 9:9-13; ЛукӀа 5:27-32)

13Иса мад вирин къерехдал фена. Халкь атана Адал алтӀушна. Адани абуруз чирвилер гана. 14Ахпа харж кӀватӀдай чкадин патавай фидайла, Адаз анал Гьалфеян хва Леви ацукьнаваз акуна.

– Зи гуьгъуьна аваз ша! – лагьана Исади.

Амни, къарагъна, Адан гуьгъуьнаваз фена.

15Ахпа Исади Левидин кӀвале фу незвай. Исадихъ ва Адан тилмизрихъ галаз ана харж кӀватӀдайбурни гунагькарар гзаф авай. Адан гуьгъуьна абурукай гзафбур жедай. 16Харж кӀватӀдайбурухъни гунагькаррихъ галаз санал Исади фу нез акурла, фарисейрин арадай акъатнавай тавратдарри Адан тилмизриз лагьана:

– Ада харж кӀватӀзавайбурухъни гунагькаррихъ галаз вуч лагьана фу незва?

17И гафар ван хьайила, Исади абуруз лагьана:

– Жерягьдихъ дирибур ваъ, азарри кьунвайбур муьгьтеж жеда. Зун гьахъ-михьибуруз ваъ, гунагькарриз Зи патав эвериз атанвайди я.

Сив хуьникай

(МатӀай 9:14-17; ЛукӀа 5:33-38)

18Гьа чӀавуз Ягьядин тилмизри ва фарисейри сив хуьзвай. Са шумуд касди, Исадин патав атана, лагьана:

– Ягьядин ва фарисейрин тилмизри сив хуьзва, бес Ви тилмизри вучиз сив хуьзвач?

19– Чам чпихъ галамай кьван гагьда мехъерин мугьманривай сив хвена акъвазиз жедани? – лагьана Исади. – 20Амма са чӀав атана, чпивай чам къакъуддайла, абуру сив хуьда.

21Гьич садани цӀуру пекиниз цӀийи парчадикай пине ядач. ЯгъайтӀа, цӀийида цӀуруди акъажна, тӀеквен авайдалайни чӀехи ийида. 22Гьич садани цӀийи чехир куьгьне целериз цадач, цайитӀа, чехирди куьгьне цел хъиткьинарда – вун чехирдикайни жеда, целерикайни; цӀийи чехирдиз цӀийи целер герек я.

Киш йикъан гъавурда тун

(МатӀай 12:1-8; ЛукӀа 6:1-5)

23Са Киш юкъуз Иса къуьлер экъечӀнавай никӀяй физвай. Рекье Адан тилмизри къуьлуьн кьилер атӀуз хьана. 24И кар акур фарисейри Исадиз лагьана:

– Вучиз абуру Киш юкъуз къадагъа кар ийизва?

25– Давуд пачагьдиз ва адахъ галайбуруз гишин хьанвайла, абуру вуч авунатӀа куьне Каламдай садрани кӀелначни мегер? – жаваб гана Исади. – 26Им кьилин хахам АбиятӀар тир девирда хьайи кар я. Давуда, Аллагьдин КӀвализ гьахьна, хахамрилай гъейри садазни недай ихтияр авачир, Реббидин вилик жедай фар къачуна, вичини тӀуьна, галайбурузни гана.

27Ахпа Исади давамарна:

– Инсан Киш югъ патал ваъ, Киш югъ инсан патал халкьнавайди я. 28ГьакӀ хьайила, Инсандин Хва Киш йикъан Агъани я.

Currently Selected:

Марк 2: ЛезПК

Highlight

Copy