Марк 12

Пис ципицӀбандикай кьиса

(МатӀай 21:33-46; ЛукӀа 20:9-19)

1 Исади Вичин патав атанвай чӀехи хахамриз, тавратдарриз ва агъсакъалриз кьисаяр мисал яз гъиз, суьгьбет ийиз эгечӀна:

– Са инсанди ципицӀбагъ кутуна, адалай пару чӀугуна. Фур эгъуьнна, шуткьурган туькӀуьрна, ципицӀбагъдал вил алаз хьун патал минарани эцигна. Ибур вири вичиз кӀвалахиз кьунвай ципицӀбанрив вугана, вич сиягьатдиз фена. 2Вахт атайла, вичиз къвезвай пай къахчун патал, ада вичин нуькеррикай сад ципицӀбанрин патав ракъурна. 3ЦипицӀбанрини ам кьуна, хъсандиз гатана, затӀни гвачиз рахкурна.

4Ада аниз муькуь нуькер рекье туна, гьадан кьилни хана, беябур авуна чукурна.

5Мад сад рахкурна, гьамни абуру яна кьена. ГьакӀ гьар гъилера атай-атайди я гатадай, я рекьидай.

6Эхирни ада «Зи хцикай абуруз регъуь жеда» лагьана, вичин рикӀ алай авай-авачир са хва гьаниз ракъурна.

7Амма ципицӀбанри чпи чпиз лагьана: «Им варис я. Ша чна ам рекьин, адан ирсни чаз жеда». 8Абуру ам яна кьена, ципицӀбагъдай акъудна гадарна. 9Гила ципицӀбагъдин иесиди вуч ийида? Ада атана ципицӀбанар рекьида, ципицӀбагъни масабурун гъиле вугуда.

10Куьне Каламдай ихьтин гафар кӀелначни бес: «УстӀарри кваз такьуна гадарай къванцикай хандакӀдин пипӀе твадай кьилин къван хьана. 11Бес им аламат тушни кьван чаз аквазвайди»#Забур 117:22-23..

12Кьиса чпикай тирдан гъавурда акьур абуруз Иса кьаз кӀанзавай, амма халкьдихъай кичӀе хьана. Иса гьанал туна, чеб хъфена.

Пачагьдиз гудай харж

(МатӀай 22:15-22; ЛукӀа 20:20-26)

13Иса гафунал кьадай къаст аваз, абуру Адан патав фарисейрикайни Гьирудан терефдаррикай са бязибур ракъурна. 14Абуру атана Адаз лагьана:

– Я Муаллим! Вун гьакъикъи ва масадаз чин чуьхуьдай гафар талгьудай инсан тирди чаз чизва. Вуна, садазни гардан кӀир тавуна, Аллагьдин рекьер гьакъикъидаказ къалурзава. Римдин пачагьдиз харж гун дуьз кар жезвани-жезвачни? Чна ам гана кӀанзавани, тагана?

15Амма Ада, абурал кьве чин алайди чир хьуниз килигна, лагьана:

– Куьне вучиз Зун синагъ ийизва? Зун килигун патал са динар гъваш.

16Абуру ам гъана.

– Идал алай шикил ва кхьенвай тӀвар нинди я? – лагьана Ада.

– Пачагьдинди я, – жаваб гана абуру.

17– Пачагьдин пай – пачагьдиз це, Аллагьдин пай – Аллагьдиз, – лагьана Исади.

Абур Адан гафари мягьтеларна.

Кьейибурал чан хтуникай

(МатӀай 22:23-33; ЛукӀа 20:27-40)

18Ахпа Исадин патав кьейидалай кьулухъ инсандал чан хкведач лугьудай сакъаяр атана.

19– Я Муаллим! – хабар кьуна абуру. – Мусади чаз кхьенай: «Стхайрикай сад кьена, аялар галачир паб амукьайтӀа, къуй муькуь стхади адан паб къахчуна вичин стхадин тухум кухтурай»#Киххьей Къанун 25:5-6..

20Ирид стха хьана: сад лагьай стхади паб гъана, амма ам аялар тахьана кьена. 21Адан паб кьвед лагьай стхади къахчуна, аялар тахьана гьамни кьена; пуд лагьай стхани гьакӀ хьана. 22А паб ирид стхадини къахчунай, амма садахъни аялар хьанач. Абурулай кьулухъ пабни хкьена. 23Ада ирид стхадик гъуьлуьк хьуниз килигна, абурал чан хтайдалай кьулухъ а паб ирид стхадикай гьи стхадин паб жеда?

24– Квез я Калам, я Аллагьдин къуват тийижирвиляй тушни куьн гъалатӀ жезвайди? – жаваб гана Исади.

25Чан хтайла, инсанрин арада я папар гъунар, я гъуьлуьз финар хъжедач. Абур цавараллай малаикар хьиз жеда.

26Кьейибурал чан хтуникай рахайтӀа, бес куьне Таврат кӀелначни кьван? ЦӀай кьуна кузвай къакъвадин валарин юкьвай Аллагьди Мусадиз ихьтин гафар лугьузвай чка кӀелначни: «Зун Ибрагьиманни, Исакьанни, Якьубан Аллагь я»#ЭхкъечӀун 3:6.? 27Аллагь кьейибурун ваъ, чан алайбурунди я. Куьн кӀевелай гъалатӀ жезва.

Виридалайни кьилин тагьким

(МатӀай 22:34-40; ЛукӀа 10:25-28)

28Тавратдаррикай сада, Исади сакъайриз гьуьжетра хъсан жавабар гуз акуна, атана Адавай хабар кьуна:

– Аллагьдин вири тагькимрикай сифтегьанди гьим я?

29Исади адаз жаваб яз кьилин тагьким лагьана:

– «Яб це, Исраил! Чи Ребби Аллагь я, Ребби сад я; 30жуван Ребби Аллагь рикӀин вири сидкьидай, жуван вири руьгьдалди, жуван вири кьатӀунралди, жуван вири амандалди кӀан хьухь»#Киххьей Къанун 6:4-5.. Ингье, сифтегьан тагьким гьа им я!

31Кьвед лагьайди ихьтинди я: «Жув хьиз жуван мукьув гвайдини кӀан хьухь»#Леви 19:18.. И кьве тагьким вирибурулайни важиб тирбур я.

32– Хъсан я, Муаллим! – лагьана тавратдарди, – Вуна авайвал лагьана, Аллагь сад я, Адалай гъейри масад авач. 33Гьам рикӀин сидкьидай, вири кьатӀунралди, вири амандалди кӀан хьун, жуваз жув хьиз, мукьув гвайдини кӀан хьун Аллагьдиз акъуднавай вири къурбандрилайни артух я.

34Ада акьул квай жавабар гуз акуна, Исади лагьана:

– Вун Аллагьдин Пачагьлугъдиз гьахьдайвал гьазур хьанва.

Мад Адавай са куьникайни хабар кьадай жуьрэт абуру хъувунач.

Месигь – Давуд пачагьдин Хва яни?

(МатӀай 22:41-46; 23:1-7; ЛукӀа 11:43-46; 20:41-47)

35 Аллагьдин КӀвале чирвилер гун давамариз, Исади лугьуз хьана:

– Тавратдарри Месигьдиз Давуд пачагьдин Хва вучиз лугьузвайди я? 36Пак Руьгь акатай Давуд пачагьдин вичин мецелай алатнай: «Реббиди зи Агъадиз лагьанай: „Ви душманар За Ви кӀвачерик вегьидалди Зи эрчӀи гъилихъай ацукь“»#Забур 109:1..

37Давуд пачагьди Месигьдиз Агъа лугьуз хьайила, Ам адан эвлед гьикӀ жезвайди я?

Гзаф халкьди хуш аваз Адаз яб гузвай.

38Халкьдиз чирвилер гуз, Исади лугьузвай:

– Тавратдаррикай яргъаз хьухь! Абуруз, яргъи пекер алаз, майданрал чеб къалуриз кӀанзава, абурун рикӀ халкьди чпиз гьуьрмет къалурунал ала. 39Синагуграни межлисра абур вилик чкаяр кьаз алахъда.

40Абуру, кьве чин алайбуру хьиз, яргъалди дуьаяр ийидай амалар ийиз хендедайрин кӀвал-югъ тӀуьна куьтягьда. Амма Аллагьдин патай абурув лап кӀеви жаза агакьда.

Кесиб хендедадин садакьа

(ЛукӀа 21:1-4)

41Иса, садакьадин пул вегьидай буьруьнждикай авунвай крчунин къаншарда ацукьна, халкьди гьаниз пул гьикӀ вегьизватӀа, килигзавай. Девлет авай гзафбуру пул пара вегьизвай. 42Атай са кесиб хендедади, къапуниз мукьва хьана, кьве чет кепек вегьена.

43Исади, Вичин тилмизрин фикир а папал желбна, лагьана:

– За квез рикӀивай лугьузва: и кесиб хендедади амайбурулай гзаф пул вегьена, 44вирибуру чпихъ авай артуханди вегьизвай, и папа, вичин кесибвилизни килиг тавуна, вичихъ авай-авачир вири гана.

Currently Selected:

Марк 12: ЛезПК

Highlight

Copy