Марк 13

Гележегдикай Исадин келимаяр

(МатӀай 24:1-51; ЛукӀа 21:5-38)

1 Иса Аллагьдин КӀваляй экъечӀдайла, Адан тилмизрикай сада Адаз лагьана:

– Муаллим! Килиг садра! Гьихьтин иер къванер, гьихьтин иер дараматар ятӀа!

2– Вун и зурба дараматрал гьейран хьанвани? – лагьана Исади. – Абур вири барбатӀ жеда, къван къванцел аламукьдач.

3Иса Зейтун пелел, Аллагьдин КӀвалин къаншарда ацукьнавайла, Адахъ галаз кьилди амукьай Петруди, Якьуба, Ягьяди ва Эндирея Адавай хабар кьуна:

4– Ам мус жедай кар я? Адакай виликамаз хабар гудай ишара гьихьтинди я?

5Вичиз гайи суалдиз жаваб яз, Исади абуруз ихтилат ийиз гатӀунна:

– Мукъаят хьухь, куьн алцурариз тахьурай! 6Гзафбур, чеб Зун я лугьуз, чеб Зи ТӀварцӀелай атанвайди я лугьуз, къведа. Гьадалди абуру гзаф инсанар алцурарда.

7Мукьваривай ва я яргъарай дяве физвай ванер къвез хьайила, кичӀе жемир, абур жедай крар я, амма чир хьухь хьи, им гьеле эхир туш. 8Халкь халкьдал къарагъда, пачагьлугъни – пачагьлугъдал, чка-чкайра залзалаяр жеда, каш гьатда. Им азаб-азиятрин эвел я.

9Амма мукъаят хьухь, инсанри дуванханайра куь дуван аквада, чпин синагугра квез гатунар кьада, Закай шагьидвал авун патал, куьн гьакимринни пачагьрин вилик акъвазарда.

10Амма эхир жедалди вилик эвелни-эвел кӀанзавайди вири халкьарин арада Шад Хабар чукӀурун я.

11Куь дуван ийидалди виликамаз вуч лугьудатӀа фикирмир; дуванханада куь рикӀел вуч атайтӀа, гьам лагь, куьз лагьайтӀа куь мецелай рахадайди куьн ваъ, Пак Руьгь жеда.

12Стхади стха, ажалдин къармахра тун патал, маса гуда, бубадини – вичин веледар; веледарни диде-бубадиз акси экъечӀда ва абур рекьида. 13Зи ТӀвар мецел хьуниз килигна, куьн вирибуруз такӀан жеда; эхирдалди эхайди хилас жеда.

14Тахьана кӀандай чкада авай чкӀайвилин чиркинвал акурла, – кӀелзавайда кьатӀунни авурай, – Ягьудатда авай кьванбур вири, катна фена, дагълара чуьнуьх хьурай. 15Вуж къавал алаз хьайитӀа, ам герек шей къачуз кӀвализ гьахь тавурай! 16Вуж чуьлда аваз хьайитӀа, ам винелай алукӀдай вичин пекер къахчуз кӀвализ хъфин тавурай! 17Гьа чӀавуз руфунал заланбурузни хурухъ аялар галайбуруз гуж жеда!

18Гьахьтин къада-балаяр галай йикъар хъуьтӀуьз татурай лагьана дуьаяр ая. 19Аллагьди дуьнья халкьай йикъалай къенин йикъалди тахьай хьтин ва идалай кьулухъ тежедай хьтин мусибат гьа йикъара инсанрин кьилел къведа. 20Реббиди виликамаз гьа мусибатдин йикъар тӀимил авуначиртӀа, чан алай са затӀни хилас жедачир. Амма Вичи хкянавайбурун, Вичин рикӀ алайбурун хатурдай Ада а мусибатдин вахт куьруь авунва.

21Гьа чӀавуз квез сада «Ингье, им Месигь я», я тахьайтӀа муькуьда «Ангье, Ам Месигь я» лагьайтӀа, куьн чӀалахъ жемир. 22Тапан месигьарни тапан пайгъамбарар гзаф акъатда. Абуру гьар жуьредин аламатар ва керемат-ишараяр къалурда, алакьайтӀа, гьатта Аллагьди хкянавайбурни кваз алцурариз алахъда. 23Амма куьн мукъаят хьухь. Килиг гьа, За квез вири виликамаз лагьанва.

24Ахпа и къада-балаяр алатайдалай кьулухъ къведай йикъара рагъ мичӀи жеда, вацрани экв хгудач. 25Гъетер аватда, цавун къуватар юзада. 26Гьа чӀавуз Инсандин Хва зурба къудратда ва баркаллада, циферин юкьва аваз къвез аквада. 27Гьа вядеда Инсандин Хци, дуьньядин и кьиляй а кьилиз Вичин малаикар ракъурна, Вичи хкянавайбур кӀватӀ хъийида.

28Инжилдин тар квез чешне хьурай: адан хилери тӀурар гъана пеш ахъайиз хьайитӀа, квез мукьвара гад алукьдайди чир жеда. 29За лугьузвайди кьилел къвез акурла, Инсандин Хва куь ракӀарив агакьнавайди квез чир хьухь.

30За квез рикӀивай лугьузва: гилан несил алатна фидалди и крар вири кьилиз акъатда.

31Чилни цав алатна фида, амма Зи Гафар алатна фидач.

32Ам къведай я югъ, я сят садазни чидач, я цавараллай малаикриз, я Хциз. Ам анжах Бубадиз чида. 33Килиг гьа, уях хьухь, квезни а вахт чизвач!

34А чӀав – кӀвал-югъ туна, кӀвалел элкъвезвайбурун хиве жавабдарвал туна, гьардал ийидай кар тапшуругъ авуна, варарал алайдазни ксумир лагьана, сиягьатдиз фейи инсан хьиз я. 35ГьакӀ хьайила, уях хьухь. КӀвалин иеси няниз ва я кьуланфериз, кӀекер рахадайла ва я пакамахъ – мус хкведатӀа квез чизвач.

36Килиг гьа, ам хтайла, адаз куьн ксанваз жагъун тавурай!

37За квез лугьузвайди вирибурузни лугьузва: уях хьухь!

Currently Selected:

Марк 13: ЛезПК

Highlight

Copy