Марк 11
11
Иса Месигь Ярусалимдиз атун
(МатӀай 21:1-9; ЛукӀа 19:28-38; Ягь. 12:12-15)
1 Исани тилмизар Зейтун пелен ценерив гвай Бетфагдивни Бетандив агакьна. Ярусалим, лагьайтӀа, лап мукьварив гвай. Исади Вичин тилмизрикай кьвед ракъурна, 2абуруз лагьана:
– Куь вилик квай хуьруьз алад. Финни кумаз квез гьаятда кутӀуннавай хам лам аквада, адал садрани инсан акьахайди туш. А лам ахъайна иниз гъваш. 3Квез «Куьне вуч ийизва?» лугьудай кас хьайитӀа, куьне адаз икӀ лагь: «Ам Агъадиз герек я, Ада ам вав ахгакьарда».
4Абур фена. Агакьайла, къецихъай варарал кутӀуннавай жегьил лам акуна. Абуру ам ахъайна.
5Анал акъвазнавай са бязибуру лагьана:
– Куьне вуч ийизва? Лам вучиз ахъайзава?
6Абуру Исади лагьайвал жаваб гана. АтӀабуруни абуруз лам тухудай ихтияр гана.
7Абуру ламрал чпин пекер-парталар вегьена, ам Исадин патав гъана, ва Ам гьадал ацукьна. 8Гзафбуру чпин пекер хтӀуниз, муькуьбуру тарарин хилер атӀуз, Исадин вилик рекьел экӀягъиз хьана. 9Вилик квайбуруни кьулухъ галайбуру гьарай къачуна лугьузвай:
– Гьасанна!#11:9 Гьасанна – чувуд чӀалал «Гила хилас ая» лагьай чӀал я. Реббидин ТӀварцӀелай Къвезвайдаз шукур хьурай! 10Чи бубайрин буба Давудан гележегда жедай пачагьвилиз шукур хьурай! Цавариз шукур хьурай!
11Иса Ярусалимдиз гьахьна. Ам Аллагьдин КӀвализ фена. И патаз, а патаз вил яна, вахт гежди хьуниз килигна, Вичин цӀикьвед илчини галаз Бетандиз рекье гьатна.
Исади инжилдин тар негь авун
(МатӀай 21:18-19)
12Бетандай экъечӀай пакагьан юкъуз Адаз гишин хьана. 13Яргъалай Исадиз пешери кьунвай инжилдин тар акуна. Адалай затӀ жагъидатӀа лугьуз фена. Атана килигайла, пешерилай гъейри Адаз затӀни гьатнач, вучиз лагьайтӀа инжилар кӀватӀдай вахт хьанвачир.
14Исади тарциз лагьана:
– Ви майваяр садрани мад садани туьхтӀуьрай!
И гафарин ван Адан тилмизризни хьанай.
Гуз-къачузвайбур чукурун
(МатӀай 21:12-16; ЛукӀа 19:45-47; Ягь. 2:13-16)
15Исани тилмизар Ярусалимдиз атана. Аллагьдин КӀвалин гьаятдиз гьахьайла, Иса ана авай алверзавайбурни муьштерияр чукуриз эгечӀна. Ада пул дегишарзавайбурунни лифер маса гузвайбурун экӀягъанар ярхарна. 16Аллагьдин КӀвалин гьаятдай тӀуз шейэр тухудай ихтияр Ада садазни гузвачир. 17Ада абуруз несигьат кваз лагьана:
– «Зи кӀвализ вири халкьар патал дуьаяр ийидай кӀвал лугьуда»#Яшай 56:7. лагьана Каламда кхьенвачни? Амма куьне ам къучийрин макандиз элкъуьрнава!
18И гафарин ван тавратдарризни чӀехи хахамриз атана. Абур Ам тергдай са рекьихъ къекъвез хьана. Абуруз Адахъай кичӀезвай, вучиз лагьайтӀа халкьдиз Исадин чирвилери зурба таъсир ийизвай.
19Няни хьайила, Ам тилмизрихъ галаз шегьердай экъечӀна хъфена.
Инжилдин кьурай тар. Имандин къуват
(МатӀай 21:20-22)
20Экуьнахъ инжил таран патавай фидайла, абуруз ам михьиз кьуранваз жагъана. 21Исадин лянет рикӀел хтана, Петруди Исадиз лагьана:
– Муаллим! Килиг, Вуна агь авур инжилдин тар кьурана.
22– Аллагьдихъ иман ийиз хьухь, – жаваб гана Исади. – 23За квез рикӀивай лугьузва: ни и пелез, рикӀе шак тун тавуна, агъунваз «Къарагъ, жува жув вириз вегь» лагьайтӀа, ада лагьай гафар кьилиз акъатда.
24ГьакӀ хьайила За квез лугьузва: дуьаяр ийидай чӀавуз куьне са затӀ тӀалабиз хьайитӀа, гьам квез гудайвилин чӀалахъ хьухь, квез гунни ийида.
25-26Квез са никай ятӀани хъел аваз хьайитӀа, дуьаяр ийизвай чӀавуз а касдилай гъил къахчу, цавараллай куь Бубадини куь тахсиррилай гъил къахчуда.
Исадин ихтияр
(МатӀай 21:23-27; ЛукӀа 20:1-8)
27Исани тилмизар мад Ярусалимдиз хтана. Иса Аллагьдин КӀвале къекъведайла, Адан патав чӀехи хахамар, тавратдарар, агъсакъалар атана.
28– Вуна а крар гьикӀ лагьана ийизва? – жузуна абуру Адавай. – Абур ийидай ихтияр Ваз ни гана?
29– За квевайни са кардикай хабар кьада, куьнени Заз жаваб це; ахпа Зани квез Заз ни ихтияр ганватӀа, лугьуда, – жаваб гана Исади. – 30Ягьяди инсанрив чпиз кӀан хьана цик акахьун къачуз тазвайни, я тахьайтӀа, Аллагьдин къастуналди? Жаваб це Заз.
31Абуру веревирдер авуна:
– Чна «Аллагьдин къастуналди» лагьайтӀа, Ада хабар кьада: «Бес куьн Ягьядихъ вучиз агъунач?»
32«Инсанриз кӀан хьана» лугьуз жезвачир – халкьдихъай кичӀе тир, вучиз лагьайтӀа вири халкьди Ягья гьакъикъи пайгъамбар яз гьисабзавай.
33Гьавиляй абуру Исадиз жаваб гана:
– Чаз чидач.
– Зани квез а крар, За ни ихтияр гана ийизватӀа, лугьудач, – лагьана Исади.
Currently Selected:
Марк 11: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
