Марк 10

Паб гъуникайни рахкуруникай

(МатӀай 5:32; 19:1-9; ЛукӀа 16:18)

1Гьанай экъечӀна, Исани тилмизар Ярдан вацӀун муькуь патай яна Ягьудатдин чилерал акъатна. Исадал инсанар алтӀуш хьанай. Вичиз адет хьанвайвал, Исади абуруз мад чирвилер гузвай. 2Иса синагъ ийиз кӀанз, фарисейри атана Адавай хабар кьуна:

– Гъуьлуь паб рахкурун дуьз кар яни?

3– Мусадин Къанунда гьихьтин эмир ганва? – жаваб яз лагьана Ада.

4– Мусади «тӀалакьар ганвай чар кхьена чара хьухь»#Киххьей Къанун 24:1, 3., – лагьана ихтияр ганай, – лагьана абуру.

5– Ада а тагьким куь чӀуру рикӀер акурла кхьейди я, – жаваб яз лагьана Исади. – 6Дуьнья халкь ийидайла, Аллагьди итимни паб арадал гъана. 7-8Гьавиляй, вичин бубани диде туна, итимдикайни папакай кьведакай сад жеда. Абур кьве чан ваъ, са чан жеда. 9Гьа икӀ, Аллагьди сад авурбур инсанди чара авун лазим туш.

10КӀвале Адан тилмизри Адавай мадни а кардикай хабар кьуна.

11– Ни вичин папахъ галаз чара хьана, масад гъайитӀа, гьада зинавал ийизва, – лагьана Исади.

12Паб вичин гъуьлуькай чара хьана, масадаз фейитӀа, гьадани зинавал ийизва.

Исади аялриз хийир-дуьа авун

(МатӀай 19:13-15; ЛукӀа 18:15-17)

13Исади кап алтадун патал, Адан патав аялар гъиз хьана, амма тилмизри абуруз туьгьметар ийизвай. 14И кар акур Исади, хъел атана, лагьана:

– Аялар Зи патав атурай, куьне абуруз манийвал гумир, вучиз лагьайтӀа Аллагьдин Пачагьлугъ гьахьтинбурунди я. 15За квез рикӀивай лугьузва: Аллагьдин Пачагьлугъ ни аялди хьиз кьабул тавуртӀа, ам аниз акъатдач.

16Аялар къужахда кьуна, абурал кап алтадна, Ада абуруз хийир-дуьа авуна.

Девлет авай жегьил

(МатӀай 19:16-30; ЛукӀа 18:18-30)

17Иса рекьиз экъечӀдайла, сада, чукурна атана, Адан вилик метӀерал акъвазна, Адавай хабар кьуна:

– Хъсан Муаллим! Эбеди уьмуьрдин иеси хьун патал, за вуч авун лазим я?

18– Вуна Заз хъсанди вучиз лугьузва? – жаваб гана Исади. – Аллагьдилай гъейри садни хъсанди туш.

19Ваз Аллагьдин тагькимар чида: «Ягъна рекьимир, зинавал ийимир, чуьнуьхмир, тапан шагьидвал ийимир, алцурармир, жуван диде-бубадин хатур-гьуьрмет хуьх»#ЭхкъечӀун 20:12-16; Киххьей Къанун 5:16-20..

20– Я Муаллим, за вири а тагькимрал жуван жегьил чӀавалай амал ийизва, – лагьана ада.

21Жегьилдиз килигай Исадин ам рикӀи чӀугуна.

– Ваз кимизвайди са кар я – лагьана Исади, – алад, фена вахъ вуч аватӀа, гьам маса гана, кесибриз пай ая, гьа чӀавуз вахъ цавара хазинаяр жеда. ГьакӀ авурла, Захъ галаз ша.

22И гафар ван хьайила, вич вичивай квахьна, жегьил пашмандаказ хъфена, вучиз лагьайтӀа адахъ зурба девлет авай.

23Элкъвена килигна, Исади Вичин тилмизриз лагьана:

– Девлет авайбуруз Аллагьдин Пачагьлугъдиз гьахьун гьикьван четин я хьи!

24И гафари Адан тилмизар мягьтеларна. Амма Исади мад лагьана:

– Веледар! Аллагьдин Пачагьлугъдиз гьахьун акьван четин я хьи! 25Девлет авайдаз Аллагьдин Пачагьлугъдиз гьахьунилай деведиз рапунин хъуькъуьмдай экъечӀун регьят я.

26Абур мад мягьтел хьана.

– АкӀ хьайила, бес нивай вич хиласиз жеда? – хабар кьуна абуру сад-садавай.

27Абуруз килигна, Исади лагьана:

– И кар инсанрилай ваъ, анжах са Аллагьдилай алакьда, Аллагьдилай алакь тийидай затӀни авайди туш.

28Гьа чӀавуз Петруди Адаз лагьана:

– Ингье, вири туна, чун Ви гуьгъуьна аваз атанва.

29– За квез рикӀивай лугьузва – лагьана Исади. – Зи ва Шад Хабардин хатурдай вичин кӀвалерилай, стхайрилай, вахарилай, дидедилай, бубадилай, аялрилай, мулкарилай гъил къачурбурукай 30и девирда, виш гъилерилайни артух кӀвалерни, стхаярни, вахарни, дидеярни, аяларни, мулкарни, чеб хурук кутурбурукай, гьалт тийидай садни амукьдач. Къведай девирдани абуруз эбеди уьмуьр жеда.

31Исятда вилик квай гзафбур кьулухъ жеда, кьулухъ галайбур – вилик.

Исади Вичин кьиникьикай пуд лагьай гъилера лугьун

(МатӀай 20:17-19; ЛукӀа 18:31-33)

32Исани тилмизар Ярусалимдиз фидай рекье авайла, Иса абурукай хкатна вилик кваз физвай. И карди тилмизар мягьтеларнавай, амайбурукни кичӀевал кутунвай. Ада цӀикьвед илчидиз эверна, Вичин кьилел къведай азаб-азиятрикай абуруз мад ахъайиз хьана:

33– Ингье чун Ярусалимдиз физва, Инсандин Хва хаинвилелди чӀехи хахамринни тавратдаррин гъиле твада, абуруни Ам кьиникьиз акъудна римвийрин гъиле хутада. 34Ам, ягьанатар авуна, гатана, тфуяр гана, рекьида. Пуд лагьай юкъуз Адал чан хкведа.

Якьубанни Ягьядин тӀалабун

(МатӀай 20:20-28; ЛукӀа 22:24-27)

35Гьанал Исадин патав Зебедеян рухваяр Якьубни Ягья атана.

– Муаллим, – лагьана абуру. – Вуна чи тӀалабун кьилиз акъудна кӀанзава чаз.

36– Квез За вуч авуна кӀанзава? – хабар кьуна Ада.

37– Вал баркалла атайла, чакай садаз Ви эрчӀи патавай, муькуьдаз чапла патавай ацукьдай ихтияр це, – лагьана абуру.

38Амма Исади абуруз лагьана:

– Куьне тӀалабзавайдакай квез хабар авач. За хъвазвай гъам-пияла квевай хъваз жедани? За эхай кьван азабар квевай эхиз жедани?

39– Жеда, – жаваб гана абуру.

– За хъвазвай гъам-пияла куьнени хъвада, За эхай кьван азабар куьнени эхда, 40амма Зи эрчӀи ва чапла патаривай ацукьун – им Завай ихтияр гуз жедай кӀвалах туш, – лагьана Исади. – А чкаяр – низ гьазурнаватӀа, гьабурунбур я.

41И гафарин ван хьайила, амай цӀуд илчидиз Якьубакайни Ягьядикай гзаф хъел атана.

42Исади, абур кӀватӀна, лагьана:

– Вири халкьарихъ абурал гуж гъалибна агъавал ийизвай вилик-кьилик квай инсанар авайди, вири халкьарал гьахьтин чӀехи ксари гьакимвал тухузвайди квез чида. 43Амма куь арада акӀ туш: куь арадай низ вилик-кьилик жез кӀанзаватӀа, къуй ам куь кьилел-кӀвачел элкъуьрай. 44Куь арада низ сад лагьай чкадал жез кӀанзаватӀа, гьам виридаз лукӀ хьун лазим я. 45Инсандин Хвани Вичиз масадбуру къуллугъ авун патал ваъ, Вич масадбуруз къуллугъ ийиз атанвайди я эхир. Ам Вичин чан гзафбурун гунагьрилай гъил къахчун патал эцигиз атанвайди я.

Буьркьуь БартӀимай сагъар хъувун

(МатӀай 20:29-34; ЛукӀа 18:35-43)

46Ахпа абур Еригьандиз атана. Еригьандай Ам Вичин тилмизарни са кьадар инсанар галаз экъечӀдайла, абуруз Тимаян буьркьуь хва БартӀимай, це лугьуз, рекьин къерехда ацукьнаваз акуна. 47Назаретви Иса патавай фейиди чир хьайила, къекъверагди гьарайиз эгечӀна:

– Я Иса! Заз регьим ая! Я Давуд пачагьдин Хва! 48Гзафбуру адаз лал хьухь лагьана, амма ада амайдалайни кӀевиз гьарайна:

– Давуд пачагьдин Хва, заз регьим ая! 49Исади, акъваз хьана, адаз Вичин патав эвериз туна.

– Къарагъ, викӀегь акъваз, – лагьана адаз анал алайбуру. – Ада ваз эверзава. 50Вичин аба хтӀунна гадарна, къудгъунна къарагъна, ам Исадин патав атана.

51– Ваз Завай вуч кӀанзава? – хабар кьуна Исади.

– Заз вилериз экв ахкуна кӀанзава, зи Муаллим, – лагьана буьркьуьда.

52– Алад, ви иманди вун сагъарна, – лагьана Исади.

Адан вилериз гьасятда экв хтана, гьамни Исадин гуьгъуьна аваз гьа са рекьяй фена.

Currently Selected:

Марк 10: ЛезПК

Highlight

Copy