МатӀай 26

Иса рекьиз кӀан хьун

(Марк 14:1-2; ЛукӀа 22:1-2)

1 Исади вири и гафар лагьана куьтягьайдалай кьулухъ Вичин тилмизриз лагьана:

2– Кьве йикъалай Песагь сувар жедай юкъуз, Инсандин Хва маса гана хашуниз ядайди квез чир хьухь.

3Гьа чӀавуз Каяф тӀвар алай кьилин хахамдин кӀвалера чӀехи хахамар ва чувудрин агъсакъалар кӀватӀ хьана, 4ана абуру Иса фендиналди кьуна, кьин меслятна. 5Амма абуру лугьузвай:

– Халкьдик гъулгъула акат тавун патал, Ам сувар юкъуз ваъ, гьакӀан юкъуз кьуна кӀанда.

Иса Бетан хуьре

(Марк 14:3-9; ЛукӀа 7:37-38; Ягь. 12:1-8)

6Иса Бетанда, жузам азарди кьунвай Симунан кӀвале авайла, 7Адан патав багьа атир авай хъенчӀин гичин гвай паб атана. Ада суфрадихъ ацукьнавай Исадин кьилел атир илична. 8И кар акур Адан тилмизриз хъел атана.

– А атирар вучиз гьакӀ серфна вара-зара ийизва? – лагьана абуру. – 9Ам чӀехи пулунихъ маса гана, а пул кесибрин арада пайиз жедай.

10Амма Исади, адан гъавурда гьатна, лагьана:

– Квез и папакай вучиз хъел къвезва? Ада Заз хъсанвал авуна. 11Кесибар датӀана квехъ галаз амукьда, Зун квехъ датӀана галамукьдач. 12Зал атирар илична, ада Зун кьветӀе-сура динж авуниз гьазурна. 13За квез рикӀивай лугьузва: Шад Хабардикай муштулухар гудай кьван чкайра и папа авур хъсан кар раиж жеда, ам инсанрин рикӀелай алатдач.

Ягьудда Иса маса гун

(Марк 14:10-11; ЛукӀа 22:3-6)

14Гьанлай цӀикьвед илчидикай сад, Искарият Ягьуд тӀвар алайди, чӀехи хахамрин патав фена 15ва абуруз лагьана:

– За Иса куь гъиле туртӀа, куьне заз вуч гуда?

Абуру адаз къанницӀуд гимишдин пул хиве кьуна. 16Гьанлай, Иса гьикӀ маса гудатӀа лугьуз, Ягьуд са къулай вахтунихъ къекъвез хьана.

Песагь суварин тӀуьн-хъун

(Марк 14:12-25; ЛукӀа 22:7-23; 1-Кар. 11:23-25)

17ТӀили фарин суварин сад лагьай юкъуз тилмизар Исадин патав атана.

– Чна Ваз Песагь суварин суфра гьина гьазурин? – жузуна абуру.

18– Шегьердиз флан касдин патав алад, – жаваб гана Исади, – ва адаз лагь: «Муаллимди лугьузва: „Зи вахт атанва. Жуван тилмизарни галаз Зун ви кӀвале Песагь суварин суфрадихъ ацукьда“».

19Тилмизрини чпиз лагьайвал авуна. Абуру Песагьдин тӀуьн гьазурна.

20Няни хьайила, Иса Вичин цӀикьвед илчини галаз суфрадихъ ацукьна. 21Абуру фу незвайла, Исади абуруз лагьана:

– За квез рикӀивай лугьузва: квекай сада Зун хаинвилелди маса гуда.

22Дерин хажалатдик акатай абуру са-сада Адаз лугьуз хьана:

– Зун яз тахьуй гьа, Агъа?

23Адани абуруз жаваб яз лагьана:

– Захъ галаз хуьрекдик кягъайда Зун маса гуда. 24Инсандин Хци Вичин уьмуьр Каламда кхьенвайвал тухузва, амма Инсандин Хва маса гудайдан кьилел къведайди ма́са гуж я! А касдиз дуьньядал атаначиртӀа, гена хъсан тир.

25Исади и гафар лагьайла, Ам маса гуз гьазур хьанвай Ягьудани лагьана:

– Зун яз тахьуй, Муаллим?

– Вуна гьакӀ я лугьузва, – жаваб гана Исади.

26Абур тӀуьник квайла, Исади фу къачуна, хийир-дуьа ийиз-ийиз, ам кӀус-кӀус авуна, тилмизриз пайна, лагьана:

– Ма, къачу, неъ, им Зи Беден я!

27Ахпа Ада сукӀра къачуна, хийир-дуьа авуна, ам абурув вугана, лагьана:

– Инай вирида хъухъ. 28Им Зи Икьрардин иви я. Ам гзафбурун гунагьрилай гъил къахчун патал авахьда. 29За квез лугьузва хьи, къенин йикъалай эгечӀна За мад чехир – ципицӀрин миже, – хъвадач. ЦӀийи чехир За анжах Зи Бубадин Пачагьлугъда квехъ галаз хъвада.

Петруди кьил къакъудуникай

(Марк 14:26-31; ЛукӀа 22:33-34; Ягь. 13:37-38)

30Шукурдин манияр яна, Исани тилмизар Зейтун пелел экъечӀна. 31Ана Исади тилмизриз лагьана:

– Къе йифиз куьн садни Захъ иман ийиз амукьдач. Каламда кхьенвай «За чубан яна кьейила, суьруьда авай лапагар гьар сад санихъ чкӀида»#Зекери 13:7. лугьудай гафар Зи кьилел къведа. 32Зал чан хтайла, Зун квелайни вилик Галилейдиз атана акъатда.

33Амма Петруди жаваб яз лагьана:

– Амайбуру вахъ иман ийиз тамукьайтӀани, зун Вахъ иман ийиз амукьда.

34– За ваз рикӀивай лугьузва: къе йифиз кӀекре гьарайдалди вуна Закай пудра кьил къакъудда, – лагьана Исади.

35– Вахъ галаз санал рекьидай чкадал атайтӀани, Вакай за са чӀавузни кьил къакъуддач, – лагьана Петруди.

Ихьтин гафар амай тилмизрини лагьанай.

Гетсеман багъда Исади дуьа авун

(Марк 14:32-42; ЛукӀа 22:39-46)

36Ахпа Иса абурухъ галаз Гетсеман лугьудай чкадиз атана:

– За дуьаяр ийидалди куьн инал хьухь, – лагьана Ада тилмизриз.

37Вичихъ галаз Петруни Зебедеян кьве хвани къачуна, Ам фена. Гьана Адак гъамни дарихвал акатна. 38Исади абуруз лагьана:

– Зи рикӀ ажалдин тӀалди незва, куьн, инал ксун тавуна, Захъ галаз акъваз.

39Са тӀимил анихъ фена, Исади, чинихъди ярх хьана, дуьаяр авуна:

– Зи Буба! Мумкин кар ятӀа, и гъам пияла Зав хъваз тамир; ятӀани, Заз кӀандайвал ваъ, Ваз кӀандайвал хьурай.

40Элкъвена хтайла, Адаз тилмизар ахварал фенваз акуна.

– Квевай са сятда кьванни уяхдиз Захъ галаз акъвазиз хьаначни? – лагьана Ада Петрудиз. – 41Уях хьухь, куьн темягьра гьат тавурай лугьуз, дуьа ая, руьгьдиз кӀан хьайитӀани, беден зайиф яз амукьда.

42Кьвед лагьай гъилера мад къерех хьана, Ада дуьа авуна:

– Зи Буба, Ваз За и азаб чӀугуна кӀанзавани? Маса рехъ авачтӀа, къуй гьа Ваз кӀандайвал хьурай.

43Ам хтайла, Адаз абур мад ксанваз жагъана. Абурун вилер чеб-чпелай ахвариз физвай. 44Абур анал туна, Ам мад пуд лагьай гъилера къерех хьана, гьа лагьай гафар тикрариз, Ада дуьаяр авуна. 45Ахпа тилмизрин патав хтана, Ада абуруз лагьана:

– Куьн мад ксана амани? – лагьана Ада. – Ял язавани? Вахт атана агакьнава, ингье гьа и декьикьадилай Инсандин Хва гунагькаррин гъиле гьатзава. 46Къарагъ, ша: ангье, Зун маса гудайди мукьва хьанва.

Иса маса гун ва кьун

(Марк 14:43-50; ЛукӀа 22:47-53; Ягь. 18:3-11)

47Гаф мецел аламаз, Адан цӀикьвед илчидикай сад тир Ягьуд атана акъатна. Адахъ чӀехи хахамрини агъсакъалри ракъурнавай гзаф инсанар галай. Абурув турарни вагьрамар гвай. 48Хаинди вичихъ галайбур Иса маса гунин ишарадин гъавурда туна:

– Низ за темен гайитӀа, Ам Гьам жеда. Вегьена Ам яхъ.

49Атанмазни Ягьуда, Исадиз мукьва хьана, «Хийирар хьуй, Муаллим» лагьана, Адаз темен гана.

50– Дуст кас, вун гьа и кар патал атанвани? – лагьана Исади.

Атайбуру гьа инал вегьена Иса кьуна.

51Исадихъ галайбурукай сада вичин тур акъудна, кьилин хахамдин са лукӀ яна, адан яб галудна.

52– Жуван тур къакъара хтур, – лагьана Исади, – ни тур хкажайтӀа, гьам турунив рекьида.

53Заз кӀан хьайитӀа, Зи Бубадивай, малаикрин цӀикьвед кьушун Завай къачуз жедай; абур Ада Заз гудачир лагьана фикирзавани вуна? 54За тӀалабнайтӀа, и жезвай крар Каламда кхьенвайвал кьилиз акъатдайни кьван?

55И чӀавуз Исади атанвайбуруз лагьана:

– Зун кьун патал, куьн къачагъ кьаз фидайвал, турарни вагьрамар гваз атанва хьи? Зун гьар юкъуз чирвилер гуз Аллагьдин КӀвале жедай, амма ана куьне Зак кязавачир. 56Ибур, пайгъамбарри кхьенвай гафар кьилиз акъатун патал, жезвай крар я.

Гьа вахтунда вири тилмизар, Ам гьанал туна, катна.

Исадик тахсирар кутун

(Марк 14:53-65; ЛукӀа 22:54-55, 63-71; Ягь. 18:12-13, 19-24)

57Иса кьурбуру Ам кьилин хахам Каяфан патав тухвана. Ана тавратдарарни агъсакъалар кӀватӀ хьанвай.

58Петру яргъалай хьиз Адан гуьгъуьна аваз, кьилин хахамдин гьаятдиз кьван атана. Ам гьаятдиз гьахьна, кар квелди куьтягь жедатӀа лугьуз, нуькеррин арада ацукьна.

59-60ЧӀехи хахамрини Меслягьатди Иса кьиникьиз акъудун патал, Адаз акси тапан шагьидар жагъурзавай, ахьтинбур гзаф хьунни авунай, амма садан шагьидвални кардик кутаз жедайди хьаначир. Эхирни кьве кас атана. 61Абуру лагьана:

– И инсанди лугьузвай: «Завай Аллагьдин КӀвал чӀурна, пуд йикъалай эхцигиз хъжеда»#Ягья 2:19..

62Къарагъна кьилин хахамди Исадиз лагьана:

– Вун чуькьни тавуна вучиз акъвазнава? Ваз лугьудай гаф авачни? Абур Ваз акси яз экъечӀзава эхир!

63Амма Ада сивяй са гафни акъуднач. Кьилин хахамди мад Исадивай хабар кьуна:

– За чан алай Аллагьдин вилик Вун Аллагьдин Хва Месигь яни лагьана хабар кьазва.

64– Вуна гьа икӀ я лугьузва, – лагьана Исади, – Инсандин Хва цавал алай циферилай физваз ва шукур хьайи Къудрат Авайдан эрчӀи патавай ацукьнаваз квез аквада.

65Инал кьилин хахамди вичел алай пекер къазунна:

– Ада аси ихтилатар ийизва! – лагьана ада. – Мад чаз шагьидвилер герек яни кьван? Адан аси ихтилатар квез ван хьана! 66Куь фикир гьихьтинди я?

Абуру Ам кьиникьиз акъуддай чкадал атанва лагьана.

67Гьанлай Адан чиниз тфуяр вегьиз, гъутар эцягъиз хьана, бязибуру Адан чинин патар ягъиз, 68лугьузвай:

– Вун ни янатӀа, лагь кван чаз, Месигь?

Петруди Исадикай кьил къакъудун

(Марк 14:66-72; ЛукӀа 22:54-62; Ягь. 18:16-18, 25-27)

69Петру лагьайтӀа, къецел, гьаятда ацукьнамай. Адан патав са къаравуш атана, лагьана:

– Галилейви Исадихъ галаз вунни авай.

70Амма Петруди вири алай чкадал Исадикай кьил къакъудна лагьана:

– Вун куькай рахазватӀа заз чидач.

71Ам варарив агатдайла, муькуь къаравушдиз акуна ва анал алайбуруз ада лагьана:

– Имни Назаретви Исадихъ галаз санал авайди тир.

72Петруди мад кьил къакъудна кьин кьуна:

– Ам заз чидай Кас туш.

73Са герендилай анал алай инсанар Петрудив агатна, лагьана:

– Якъин вунни гьабурукай я, ви рахунрин жуьреди вун гьабурукай тирди къалурзава.

74Гьанлай Петруди кьинер кьаз, Аллагьдиз дад ийиз хьана:

– Ам заз чидай Кас туш.

Гьа рахунрик кваз садлагьана кӀекре гьарайна. 75Петрудин рикӀел Исади лагьай гафар хтана: «КӀекре гьарайдалди вуна Закай пудра кьил къакъудда». Варарай экъечӀна, ам къагьардалди шехьна.

Currently Selected:

МатӀай 26: ЛезПК

Highlight

Copy