МатӀай 25

ЦӀуд рушакай кьиса

1 Цаварин Пачагьлугъ гъиле чирагъар аваз чам кьабулиз фейи цӀуд рушав гекъигиз жеда. 2Абурукай вад акьул авайбур тир, вадни – акьул авачирбур. 3Акьул авачирбуру чпин чирагъар къачунатӀани, абура цадай чӀем къачунач. 4Акьул авайбуру чпин чирагърихъ галаз чӀем авай къапарни къачуна. 5Чам геж жезвай, рушарихъ ахвар агалтна, абур ксана. 6Кьуланфериз гьарай акъатна: «Ингье, чам хквезва! Адан вилик экъечӀ!»

7Гьасятда рушар къарагъна, абуру чпин кузвай чирагъар къайдадик кухтуна.

8Акьул авачирбуру акьул авайбуруз лагьана: «Чи чӀем куьтягь хьана, чирагъар хкахьзава, чаз куь чӀемедикай са тӀимил це». 9«Чавай квез гуз жедач, ам я квезни бес жедач, я чазни, – лагьана акьул авайбуру. – Куьне фена куь чирагъриз цадай чӀем маса къачу».

10Абур чӀем гъиз фена хкведалди чамни хтана акъатна, гьазур хьанвайбур чамрахъ галаз мехъерин деминиз гьахьна. Ракни агал хьана. 11Ахпа амай рушарни аниз атана акъатна.

«Я агъа! Я агъа! – лагьана абуру. – Чаз рак ахъая!» 12Амма ада жаваб яз лагьана: «За квез рикӀивай лугьузва: заз куьн чидайбур туш».

13ГьакӀ хьайила, уях хьухь, За лугьузвай я югъ, я сят садазни чизвач.

Пул хуьз вугуникай кьиса

(ЛукӀа 19:12-27)

14Гьа икӀ, са касди дуьньяда къекъуьн кьетӀна. Рекьиз фидалди а касди вичин вач-хъшаяр кӀватӀна, вичихъ авай эменни абурун хиве вугана. 15Садав ада вад тӀалантӀ вугана, муькуьдав – кьве тӀалантӀ, пуд лагьайдавни – са тӀалантӀ. Ада абурув гьардав чпин гьар садан алакьунриз килигна вуганай ва вич экъечӀна фенай. 16Вад тӀалантӀ къачурда гьа пулар кардик кутуна, абурун кьилел мад вад тӀалантӀ хкана. 17Гьа и саягъда кьве тӀалантӀ гвайдани вичив гвай тӀалантӀар кардик кутуна, мад кьве тӀалантӀ хкана. 18Са тӀалантӀ гвайда тухвана вичин иесидин пул чилик кутуна, чуьнуьхна туна. 19Са кьадар йикъар алатайла, а вач-хъшайрин агъа хтана, абурувай ада гьахъ-гьисаб авун тӀалабна. 20Вад тӀалантӀ къачурда муькуь вад тӀалантӀни хкана лагьана: «Агъа, вуна зав вад тӀалантӀ вуганай, ингье, гьабурун кьилел за мад вад тӀалантӀ хкана». 21«Хъсан хьана, регьим ва вафа авай зи вач-хъша! – лагьана агъади. – ГъвечӀи карда вуна заз вафа къалурна. Гила за ви хиве еке крар твада. Захъ галаз вунани шадвал ая».

22Кьве тӀалантӀ къачурдини атана, лагьана: «Агъа, вуна зав кьве тӀалантӀ вуганай, ингье, гьабурун кьилел за мад кьве тӀалантӀ хкана». 23«Хъсан хьана, регьим ва вафа авай зи вачхъша! – лагьана агъади. – ГъвечӀи карда вуна заз вафа авай къалурна. Гила за ви хиве чӀехи крар твада. Захъ галаз жувани шадвал ая».

24Ахпа адан патав са тӀалантӀ къачурди атана. «Агъа, заз вун инсаф авачир кас тирди чида, – лагьана ада; – вуна цун тавур ник гуьда, вуна тум чукӀур тавур чкадай бегьер кӀватӀда. 25Вахъай кичӀе хьана, тухвана за ви тӀалантӀ чилик кутуна. Ингье ви тӀалантӀ, къахчу». 26«Темпел ва кьеркьеш лукӀ! – жаваб гана агъади. – За цун тавур никӀяй гуьдайди ва за тум чукӀур тавур чкадай кӀватӀдайди ваз чир хьайила, 27вучиз вуна зи пул кирида вуганачир? За хтайла, къведай жуван хийир кьил алаз къахчудай».

28Вичин вач-хъшайриз агъади лагьана: «Къахчу адав гвай тӀалантӀ, ам цӀуд тӀалантӀ авайдаз це. 29Гьар нихъ аватӀа, адаз мадни кӀукӀ алаз гуда, авачирдавай авайдини къакъудда.

30И виже текъведай вач-хъша мичӀи къецел гадара, ана жедайди шел-хвал ва сарар регъуьнар я».

Дуьньядин дуван

31 Инсандин Хва баркалла алаз Вичин малаикрин арада аваз атана акъатайла, Ам баркалла алай пачагь яз тахтуна ацукьда. 32Адан вилик вири халкьар кӀватӀ жеда. Ада абур, чубанди хипер кьунарикай чара ийидайвал, сад садавай чара ийида. 33Хипер Ада вичин эрчӀи патавай акъвазарда, кьунарни – чапла патавай. 34Пачагьди Вичин эрчӀи патавай акъвазнавайбуруз лугьуда: «Зи Бубади хийир-дуьа ийизвайбур, куьн иниз ша, дуьнья халкьнавайдалай инихъ квез гьазурнавай Пачагьлугъ кьабула. 35Заз гишин хьайила, куьне Заз фу ганай; Зун цихъ къаних хьайила, куьне Заз яд ганай; Закай къураба хьайила, куьне Зун кьабулнай. 36Зун кьецӀил хьайила, куьне Заз пекер ганай; Зун азарди кьурла, куьне Зал кьил чӀугунай; Зун къазаматда гьатайла, куьн Зи патав атанай». 37Гьа чӀавуз гьахъ-михьи ксари лугьуда: «Я Ребби! Вун гишила аваз акуна чна Ваз фу мус ганай? Вун цихъ къанихзаваз чна Ваз яд мус ганай? 38Вун къураба яз чна Вун мус кьабулнай? Я тахьайтӀа Вун кьецӀила аваз акуна, чна Вал пекер мус алукӀнай? 39Вун азарди кьунваз я тахьайтӀа къазаматда аваз чаз мус акунай? Чна мус Вал кьил чӀугунай?» 40Пачагьдини жаваб гуда: «За квез рикӀивай лугьузва: ахьтин крар куьне Зи стхайрикай садаз авунватӀа, куьне а хъсанвилер Заз авунва».

41Ахпа Ада Вичин чапла патавай акъвазнавайбуруз лугьуда: «Квахь Зи виликай, лянет хьайибур, иблисдизни адан малаикриз гьазурнавай жегьеннемдин цӀуз алад. 42Заз гишинзавайла, куьне Заз фу ганачир. Зун цихъ къаних хьайила, куьне Заз яд ганачир. 43Зун къураба тирла, куьне Зун кьабулначир. Зун кьецӀил авайла, куьне Зал алукӀначир. Зун азарди кьунвайла ва къазаматда гьатайла, куьне Зал кьил чӀугуначир». 44Ахпа абуруни жаваб яз лугьуда: «Я Агъа, чаз Вун я гишила аваз, я цихъ къанихзаваз, я къураба яз, я кьецӀил яз, я азарди кьунваз, я къазаматда аваз акунайни кьван? ГьакӀ хьайила, чун Вахъ гелкъуьн тавур бере мус хьана?» 45Гьанал Ада жаваб яз лугьуда: «За квез рикӀивай лугьузва: ахьтин куьмекар куьне и адетдин гъвечӀи инсанрикай садаз кьванни авунвачтӀа, куьне абур Зазни авунвач».

46ГьакӀ хьайила пис ксар даим жазадик акатда, гьахъ-михьи ксар – эбеди уьмуьрдиз аватда.

Currently Selected:

МатӀай 25: ЛезПК

Highlight

Copy