МатӀай 24

Гележегдикай Исадин келимаяр

(Марк 13:1-37; ЛукӀа 21:5-38)

1 Иса Аллагьдин КӀваляй экъечӀна хквезвайла, Адан патав тилмизар атана, Адаз Аллагьдин КӀвалин дараматриз килигун теклифна.

2– Куьн и дараматрал гьейран жезвани? – жаваб гана Ада. – За квез рикӀивай лугьузва: абур вири барбатӀ жеда, къван къванцел аламукьдач.

3Иса Зейтун пелел ацукьнавайла, Адахъ галаз кьилди амукьай тилмизри Адан патав агатна лагьана:

– Чаз лагь: Ам мус жедай кар я? Вун элкъвена хкведайвилин ишара вуч жеда? Эхирзаман хьанвай чӀал чаз гьикӀ чир жеда?

4Исади жаваб яз лагьана:

– Мукъаят хьухь, куьн алцурариз тахьурай! 5Гзафбур, чеб Месигь я лугьуз, чеб Зи ТӀварцӀелай атанвайди я лугьуз, къведа, гьадалди абуру гзаф инсанар алцурарда.

6Мукьваривай ва я яргъарай дяве физвай ванер къвез хьайитӀа, кичӀе жемир, абур жедай крар я, амма чир хьухь хьи, им гьеле эхир туш. 7Халкь халкьдал къарагъда, пачагьлугъни – пачагьлугъдал; чка-чкайра залзалаяр жеда, каш гьатда. 8Вири им азаб-азиятрин эвел я. 9Гьа чӀавуз куьн маса гуда, хурук кутада ва ягъиз рекьида. Зи тилмизар хьуниз килигна, куьн вири халкьариз такӀан жеда. 10Гзафбуру Захъ иман хъийидач, абуру сада сад маса гуда, садаз сад такӀан жеда. 11Тапан пайгъамбарар гзаф пайда жеда, абуру гзаф инсанар алцурарда. 12Писвал артух хьуникди, гзафбурун муьгьуьббат рекьида. 13Эхирдалди эхайди хилас жеда.

14 Цаварин Пачагьлугъдикай тир Шад Хабар дуьнья тирвал вири халкьарин арада чукӀурда, ахпа эхир алукьда. 15Гьа икӀ, Даниял пайгъамбарди лагьайвал, пак чкада гьатнавай чкӀайвилин чиркинвал акурла (кӀелзавайда кьатӀунни авурай), 16Ягьудатда авай кьванбур вири катна фена дагълара чуьнуьх хьурай. 17Вуж къавал алаз хьайитӀа, ам герек шей къачуз кӀвализ гьахь тавурай! 18Вуж чуьлда аваз хьайитӀа, ам винелай алукӀдай вичин пекер къахчуз кӀвализ хъфин тавурай. 19Гьа чӀавуз кӀвачел заланбурузни хурудихъ аялар галайбуруз гуж жеда! 20Куьн катдай йикъар хъуьтӀуьз ва я Киш юкъуз тахьурай лагьана дуьаяр ая. 21Аллагьди дуьнья халкьай йикъалай къенин йикъалди тахьай хьтин ва хьайидалай кьулухъ тежедай хьтин мусибат гьа йикъара инсанрин кьилел къведа. 22Аллагьди виликамаз гьа мусибатдин йикъар тӀимил авуначиртӀа, чан алай са затӀни хилас жедачир. Амма Вичин хкянавайбурун, вичин рикӀ алайбурун хатурдай Ада а мусибатдин вахт куьруь авунва.

23Гьа арада квез сада «Ингье, им Месигь я», я тахьайтӀа «Ангье, Ам Месигь я» лагьайтӀа, куьн чӀалахъ жемир, 24Тапан месигьарни тапан пайгъамбарар гзаф акъатда. Абуру чӀехи аламатар ва керемат-ишараяр къалурда, алакьайтӀа, гьатта Аллагьди хкянавайбурни кваз алцурариз алахъда. 25Килиг гьа, За квез вири виликамаз лагьанва.

26Квез «Килиг, кьурумда Месигь ава!» лагьайтӀа, куьн аниз фимир, я тахьайтӀа «И кӀвалерикай сада Ам чуьнуьх хьанва» лагьайтӀа, куьн абурун чӀалахъ жемир. 27РагъэкъечӀдай патай ягъай цӀайлапан рагъ акӀидай пата гьикӀ аквадатӀа, Инсандин Хвани гьакӀ атана акъатда. 28Леш гьинал хьайитӀа, къузгъунарни гьанал кӀватӀ жеда.

29Ахпа а йикъара авай къада-балаяр акатайдалай кьулухъ рагъ мичӀи жеда, вацрани экв хгудач, гъетер аватда, цавун къуватар юзада. 30Гьа чӀавуз цавал Инсандин Хва хкведайвилин ишара акьалтда. Инсандин Хва къудратда ва зурба баркалла алаз цавун циферал алаз хквез акур инсанар, чеб чпивай квахьна, шехьиз жеда. 31Ада и дуьньядиз Вичин малаикар ракъурда. Абуру чӀехи къаргъуяр ягъиз, дуьньядин кьуд пипӀяй, яни цавун и кьиляй а кьилел къведалди авай кьван чкайрай Ада хкянавайбур кӀватӀда. 32Инжилдин тар квез чешне хьурай: адан хилери тӀурар гъана пеш ахъайиз хьайитӀа, квез мукьвара гад алукьдайди чир жеда. 33За лугьузвайди кьилел къвезвайди акурла, Инсандин Хвани куь ракӀарив агакьнавайди квез чир хьухь. 34За квез рикӀивай лугьузва: гилан несил алатна фидалди и крар вири кьилиз акъатда. 35Цавни чил дегиш жеда, амма Зи Гафар дегиш жедач.

36Ам къведай я югъ, я сят садазни чидач, я цавараллай малаикриз, я Хциз. Ам анжах Бубадиз чида. 37Нуьгьан девирда гьикӀ хьанатӀа, Инсандин Хва элкъвена хтай девирдани гьакӀ жеда. 38-39Нуьгьан девирда яд акьалт тавунмаз ва ам гимидиз гьахь тавунмаз вирибуру незвай, хъвазвай, папар гъизвай, гъуьлуьз физвай, амма дуьньядал яд акьалтна – вири терг хьана. Акьван чӀавалди садазни са затӀни чизвачир. Инсандин Хвани гьа саягъда элкъвена хкведа. 40Гьа чӀавуз кьве кас чуьлда кӀвалахиз жеда, абурукай сад къахчуда, сад тада. 41Кьве папа са регъве техил регъведа: абурукай сад къахчуда, сад тада. 42ГьакӀ хьайила уях хьухь, квез куь Ребби хкведай югъ чизвач. 43Квез чидани, кӀвалин иесидиз угъри къведай чӀав чир хьанайтӀа, ам уях жедай ва вичин кӀвал атӀуз тадачир. 44ГьакӀ хьайила куьнни гьазур яз хьухь: гьич квез хабарни авачиз Инсандин Хва хтана акъатда.

45Лугьун хьи, агъади вичин кӀвалихъ гелкъвезвайбурун кьилел, абуруз вахтунда фу-яд гун патал, са кас эцигна. А кас вафа гвайди ва кьил авайди хьайитӀа, ада вуч ийида? 46Агъа кӀвализ хтайла, ам вичин хиве авай крарал машгъул яз жеда. Ахьтин кас бахтавар я. 47За квез рикӀивай лугьузва хьи, адан агъади вичин вири мал-мулкунин кьиле а кас акъвазарда.

48-51А касди намус авачиз вичи вичик «Зи агъа мукьвара ахкъатдач» лагьана, кӀвалел алай вич хьтинбур гатаз, вични хъвадайбурухъ галаз нез-хъваз хьайитӀа, а касдин агъади гьич виливни техуьзвай са юкъуз, гьич фикирдизни гъиз тежедай чӀавуз хтана, адаз лашунин хура туна векъи жаза гуда ва гьадазни, кьве чин алайбуруз хьиз, кар кьада. Ана лагьайтӀа, шел-хвал ва сарар регъуьн амукьда.

Currently Selected:

МатӀай 24: ЛезПК

Highlight

Copy