Хьунухь 28

1Исакьа Якьубаз эверна ва адаз хийир-дуьа авуна, ихьтин насигьат гана: «Къенанвийрикай пабвиле къачумир. 2Падан-Арамдиз, ви дидедин буба Бетуэлан хизандин кьилив алад ва Лабанан, ви дидедин стхадин, рушарикай сад жуваз паб яз къачу. 3Вири алакьдай Аллагьди ваз хийир-дуьа авурай! Ада ви тухум, валай гзаф кьадар халкьар арадал къведайвал, гзаф аладдайди ва гзаф кьадардинди авурай! 4Ада вав ва ви несилрив Ибрагьимаз авур хийир-дуьа ирс яз вахгурай, – и чӀавуз вун масанай атана ацукьнавай чилин, Аллагьди Ибрагьимаз пишкеш авур чилин, иеси жеда!»

5Исакьа хциз сагърай лагьана, амни арамви Бетуэлан хва Лабанан патав Падан-Арамдиз рекье гьатна. Лабан Эсаванни Якьубан диде Рефикъадин стха тир.

6Исакьа Якьубаз хийир-дуьа авунвайди, ва ам Падан-Арамдиз паб жагъурун патал ракъурнавайди, хийир-дуьа авунихъ галаз санал бубади Якьубаз къенанвийрикай паб тагъун тапшуругъ ганвайди, 7ва Якьуб, бубадинни дидедин гафариз муьтӀуьгъ яз, Падан-Арамдиз фенвайди, Эсаваз чир хьана. 8И чӀавуз Эсав къенанвияр тир сусар бубадин рикӀи кьун тавунвайдан гъавурда акьуна, 9ва Исмаилан патав фена, вичиз мад са паб къахчуна – Ибрагьиман хва Исмаилан руш, Небаятан вах, Магьалат.

Якьубаз цаварал фидай гурарикай ахвар акун

10Беэр-Шеба туна, Якьуб Харан галайвал рекье гьатна. 11Ам са мензилдиз фейила, рагъ акӀайла, Якьуб акъваз хьана ва кьилик къванни кутуна ксана.

12Адаз ахвар акуна: ингье чилел са кьил цавук хкӀунвай гурар ала. Аллагьдин малаикар и гурарай акьахиз эвичӀзавай. 13Ангье Ребби гурарин кьилел акъвазнава ва Якьубаз лугьузва: «Зун Ребби я, ви чӀехи буба Ибрагьиман Аллагь ва Исакьан Аллагь. Вун агалтнавай и чил За вазни ви несилриз гуда. 14Ви несилрин кьадар, къум хьиз, гзаф жеда ва абуру гьам рагъакӀидай, гьамни рагъэкъечӀдай, гьам кефер, гьамни кьибле патара бине кутада. Вун ва ви несилар чилел алай вири халкьар патал хийир-дуьа жеда. 15Зун вахъ галаз я: гьиниз вун фейитӀани, За вун хуьда – За вун элкъуьрна иниз, и уьлкведиз хкида. За вун гьакӀа тадач: вуч хиве кьунвайтӀа, вири кьилиз акъудда».

16Якьуб ахварай аватна ва лагьана: «Гьакъикъатдани и чкадал Ребби ала – анжах заз хабар авачир!»

17«Им вуч кичӀе жедай чка тушни! – лагьана ада хаф янаваз. – Им Аллагьдин алай чка ва цаварин варар я эхир!»

18Пакамахъ ада йифиз вичин кьилик квай къван къачуна, ам гуьмбет хьиз къяна ва адалай зейтундин гъери илична. 19И чкадиз ада Бет-Эл тӀвар гана – виликдай халкьди адаз Луз лугьудай. 20Якьубани ихьтин вяд гана: «Зун физвай и рекье зун хуьз, заз недай фуни алукӀдай партал гуз, Аллагь захъ галаз хьайитӀа, 21зун бубадин кӀвализ сагъ-саламатдиз хтайтӀа, Ребби зи Аллагь жеда. 22За гуьмбет хьиз эцигнавай и къванцикай Аллагьдин кӀвал жеда ва Вуна заз гудай вири затӀарин цӀудай са пай за Вав вахкуда».

Currently Selected:

Хьунухь 28: ЛезПК

Highlight

Copy