Хьунухь 27

Якьубан таб ва адаз хийир-дуьа авун

1Лап кьуьзуь ва буьркьуь хьанвай Исакьа чӀехи хциз вичин патав эверна. «Чан хва!» – лагьана ада Эсаваз. «Гьай, буба!» – жаваб гана ада. 2«Зун кьуьзуь я, – лагьана Исакьа, – ва зун чан алай гьикьван вахтуналди амукьдатӀа заз чидач. 3Къачу яракь – чӀемерук, хьелер – ва зун патал чуьлдиз гъуьрч ийиз алад. 4Гъуьрч хкана, жезмай кьван тӀям кваз, заз кӀандай къайдада гьазура, зани абур тӀуьна жув рекьидалди вилик ваз хийир-дуьа хъийида».

5Амма Рефикъади и суьгьбетдиз яб гана. Эсав гъуьрч ийиз фейила, 6-7ада Якьубаз лагьана: «Заз ви бубади ви стха Эсаваз гъуьрч авуна, абур жезмай кьван тӀям жедайвал гьазура лагьана тапшуругъ ганвайди ван хьана. Бубади неда, ахпани вич рекьидалди Реббидин вилик вичин хийир-дуьа ийида. 8Гьа икӀ, чан хва, вуна вуч авун лазим ятӀа, яб це. 9Суьруьдин патав фена кьве бацӀи хкягъа. За абур тӀям кваз, ви бубадиз кӀандайвал гьазурда, 10вуна абур адаз тухуда, ада тӀуьна куьтягьайдалай кьулухъ, ваз рекьидалди вилик тамамардай хийир-дуьа авун ийидайвал».

11«Зи стха Эсав бегьем чӀарчӀи кьунвайди я, – жаваб гана Якьуба, – амма зи хам цӀалцӀамди я. 12Белки бубади заз гъил-тӀуб ийида? Ам за вич алцурарзавайдан гъавурда акьуртӀа, заз жагъидайди хийир-дуьа ваъ, лянет я». 13Амма дидеди лагьана: «А лянет зал атурай, чан хва. Вуна анжах зи гафариз яб це. Алад, фена гъваш».

14Якьуба бацӀияр гъана, Рефикъадини абур тӀям кваз, Исакьаз кӀандайвал, гьазурна. 15Ахпа ада кӀвале авай вичин чӀехи хва Эсаван виридалайни хъсан парталар къачуна ва абур гъвечӀидал, Якьубал, алукӀна. 16Якьубан гъилерални кьамал ада бацӀийрин хамар алчукна, 17ахпа Якьубав якни фу вугана. 18Ам бубадин кьилив фена ва лагьана: «Буба!» «Гьай, хва!» – жаваб гана Исакьа. – «Вун гьим я?» 19«Зун Эсав я, ви сифте хва, – жаваб гана Якьуба. – Вуна заз лагьайвал, за вири тамамарна. Са тӀимил хкаж хьухь, ацукь ва гъуьчрен якӀун дад аку, заз ви хийир-дуьа ийидайвал».

20«Чан хва, – хабар кьуна Исакьа, – вавай гъуьрч икьван фад ийиз гьикӀ алакьна?» «Реббиди, ви Аллагьди, зи кӀвалах туькӀуьдайвал авуна», – жаваб гана ада. 21«Заз мукьув хьухь, чан хва, – лагьана Исакьа, – ша за вай гъил-тӀуб авуна кьил акъудна чирин, вун якъин Эсав яни-тушни чирун патал».

22Якьуб бубадиз мукьва хьана, адани гъил-тӀуб авуна хьиз лагьана: «Сес – Якьубан, амма гъилер – Эсаван».

23Якьубан гъилерни, Эсаван гъилер хьиз, чӀарчӀи кьун себеб яз, Исакьаз ам чир хьанач ва адаз вичин хийир-дуьа авуна. 24«ИкӀ хьайила, вун зи хва Эсав я ман?» – хабар кьуна ада Якьубавай. Адани тестикьарна: «Эхь».

25Исакьани лагьана: «Чан хва, гице кван а ви гъуьчрен як нен, за ваз хийир-дуьа ийидайвал». Якьуба бубадив якни чехир вугана. ТӀуьна-хъвана, 26Исакьа лагьана: «Ша зи патав, чан хва, заз са темен це».

27Якьуба мукьув хьана бубадиз темен гана, ва адан парталрин ни гьисс авур Исакьа, адаз ихьтин гафаралди хийир-дуьа авуна:

«Зи хцин ни – им чуьллерин ни хьтинди я,

Реббиди хийир-дуьа авунвай.

28Ваз Аллагьди багъишрай

цавун чигедикай, бегьер квай чиликай,

фан ва чехирдин булвал.

29Халкьари ваз къуллугъ авурай,

тайифайри ваз икрам авурай.

Ви стхайрин кьилел вун агъа жеда:

ви дидедин рухвайри ваз икрам ийида.

Ваз лянет ийизвайдаз – лянет,

Ваз хийир-дуьа ийизвайдаз – хийир-дуьа».

30Исакьа Якьубаз хийир-дуьа авунмазни, Якьуб Исакьан кьиливай хъфенмазни, Эсав гъуьрчяй хтана. 31Ада жезмай кьван тӀям квай тӀуьнар гьазурна, бубадиз гъана ва лагьана: «Буба! Са тӀимил хкаж хьухь, за ваз гъанвай гъуьчрен як неъ, заз ви хийир-дуьа ийидайвал!» 32«Вун вуж я?» – жузуна Исакьа. «Зун ви хва, ви сифте хва, Эсав я», – жаваб гана ада. 33Исакьани, кичӀевилин зурзун акатна, лагьана: «Бес гьеле вун хкведалди гъуьрч жагъурна, зун тух авурди вуж тир? За зи хийир-дуьа гьадаз авуна эхир, гьадахъ галаз гила ам амукьни ийида».

34И гафарин ван хьайила, Эсава кӀевиз ва гзаф гъам кваз гьарайна ва бубадивай тӀалаб ийиз хьана: «Зазни хийир-дуьа ая, буба!» 35«Ви стха зи патав атана, – лагьана Исакьа, – ва таб авуналди, ваз тайинарнавай хийир-дуьа къакъудна».

36Эсава лагьана: «Адаз Якьуб гьавайда лугьузвайди туш – ада зун алцур ийиз ингье им кьвед лагьай сефер я. Сифте ада завай сад лагьай аял хьунин ихтиярар къакъудна, гила лагьайтӀа – зун патал тайинарнавай хийир-дуьа!»

– Бес ваз зун патал са хийир-дуьани амачни кьван? – жузуна Эсава бубадивай.

37Исакьани жаваб гана: «Вучин, за адакай ви агъа авуна, вири мукьва-кьилияр адан лукӀар авуна, адав гьам фу, гьам чехир вахгана. Бес завай гила вун патал вуч жеда кьван, чан хва?» 38«Бес ваз авайди, – жузуна Эсава, – зи буба, анжах са хийир-дуьа тирни кьван? Зазни хийир-дуьа ая, буба!»

Эсав ван хкажна рикӀ хъутӀкьуниз кӀевиз шехьна, 39Исакьани адахъ элкъвена лагьана:

«Ви хуьрер мублагь чилерикай яргъа жеда,

гьакӀни цаварин чигедикай.

40Вуна уьмуьр тухуда ви туруни гъилиз гъайидал,

ва стхадиз къуллугъда.

Амма са вахт алукьда – вун и гьалдиз акси къарагъда

ва кьамал алай вик алудна гадарда».

Якьуб Лабанан кьилив Харандиз катун

41Эсава, ада бубадивай хийир-дуьа къачуна лагьана, Якьубакай атанвай хъел рикӀе чуьнуьхна. «Бубадихъ яс чӀугвадай йикъар алатайла, – фикирна Эсава, – зи стха Якьуб яна рекьида!» 42Амма Рефикъадик адан чӀехи хци вуч кьетӀнаватӀа хабар агакьнай. Ада Якьубаз, гъвечӀи хциз, вичин патав эверна ва адаз лагьана: «Ви чӀехи стха Эсаваз кьисас вахчуналди вун яна рекьиз кӀанзава. 43Яб це, чан хва, за вуч лугьудатӀа: зи стха Лабанан патав Харандиз кат. 44-45Вун ана ви стхадин хъел элекьдалди, адакай хъел хкатдалди, ва вуна адаз вуч кар кьунатӀа адан рикӀелай фидалди, амукьда, – и чӀавуз за ви гуьгъуьниз ксар ракъурда ва вун анай хкида. Завай куьн кьведни санал вучиз са юкъуз къакъатрай?»

46Рефикъади Исакьаз лагьана: «И хетар тир сусар себеб яз гьатта уьмуьрдихъни вил галамач. Якьубани гьа ибуру хьиз чкадин хет-руш къачуртӀа, заз гьич чан алаз амукьнани жез кӀандач!»

Currently Selected:

Хьунухь 27: ЛезПК

Highlight

Copy