Хьунухь 29

Якьуб Лабанан кьилив атун

1Якьуба вичин рехъ давамарна. РагъэкъечӀдай патан рухвайрин чилерив агакьайла, 2адаз чуьлда са къуй, адан патавни лапагрин пуд суьруь акуна. Анал адет яз лапагриз яд гудай. Къуйдин сивел са чӀехи къван алай: 3вири суьруьяр кӀватӀ хьайила, чубанри и къван алуддай, лапагриз яд гудай, ахпа къуй мад агал хъийидай.

4«Куьн гьинай я, стхаяр?» – хабар кьуна Якьуба чубанривай. «Харандай я», – жаваб гана абуру. 5«Квез Нахаран хва Лабан чидани?» – жузуна ада. Абуруни жаваб гана: «Чида». 6«Адан гьал-агьвал хъсан яни?» – хабар кьуна Якьуба. «Хъсан я, – жаваб ганай адаз. – Ингье адан руш Рахилни лапагар гваз инал къвезва». 7«Зегьем гьеле алатнавач, – лагьана Якъуба чубанриз, – гьайванар кӀватдай вахт алукьнавач. Лапагриз яд гана, абур чуьлдиз гьала». 8Амма абуру жаваб ганай: «Вири суьруьяр кӀватӀ тахьанмаз чавай и кӀвалах жедач. А чӀавуз къуйдин сивелай къван алудда, ва чна лапагриз яд гуда».

9Абур гьеле рахазмаз, вичин бубадин суьруь вилик кутуна, Рахилни агакьна – ам чубан руш тир. 10Вичин халу Лабанан руш тир ам суьруьни галаз акурла, Якьуба къуйдин сивел алай къван алудна ва лапагриз яд гана. 11Ахпа ада Рахилаз темен гана ва ван хкажна шехьна, 12адаз вич Рефикъадин хва, адан бубадин мукьва-кьили тирди малумарна.

Рахила кӀвализ чукурна, вичин бубадиз хабар гана. 13Чпин патав вичин хтул Якьуб атанвайди ван хьайила, Лабан тадиз адан вилик экъечӀна, адан гардан кьуна, темен гана ва вичин кӀвализ хкана. Якьуба адаз вичикай ахъайна, 14ва Лабана лагьана: «Якъин вун зи мукьва-кьили я, зи иви я!»

Якьуба Лияни Рахил папар яз къачун

Якьуба Лабанан кӀвале уьмуьр тухуз ацукьайдалай кьулухъ са варз алатна, 15ва Лабана адаз лагьана: «Зи мукьвади я лагьана, вуна заз гьавая кӀвалахдани кьван? Лагь, ваз гьихьтин гьакъи кӀанда?»

16Лабаназни кьве руш авай: чӀехидан тӀвар Лия тир, гъвечӀидан – Рахил. 17Лиядин вилер цӀарцӀар гудайбур тушир, амма Рахил гьам чинал, гьамни буй-бухахдал атайла, гзаф гуьрчегди тир. 18Якьуб Рахилал ашукь хьана ва Лабаназ икӀ лагьана: «Ви гъвечӀи руш Рахил патал за ваз ирид йисуз къуллугъ ийида». 19«Хъсан я, – жаваб гана Лабана, – чарадаз гъуьлуьз фидалди, ваз фирай. Зи патав акъваз».

20Рахил патал Якьуба ирид йисуз адаз кӀвалахна, амма и ирид йис ам патал ирид югъ хьиз акъатна – гьакьван адаз Рахил кӀандай. 21Ингье, эхирни, ада Лабаназ лагьана: «Зи паб гьина ава? Вахт алукьнава, ам зиди жедай вяде хьанва».

22Лабана вичин вири хуьруьнвийриз эверна, дем туькӀуьрна. 23МичӀи хьайила, ада Якьубан патав вичин руш Лия гъана, ва Якъуб гьадахъ галаз къаткана. 24Лиядин къаравушвиле Лабана вичин лукӀ Зилпа тайинарнай.

25Пакама алукьна – Якьубан вилик Лия ква!

«Вуна заз вуч авуна? – лагьана Якьуба Лабаназ. – За ваз къуллугъ Рахилахъ авурди туширни кьван? Вуна вучиз заз таб авуна?» 26«Чи патара, – лагьана Лабана, – чӀехи вах амаз, гъвечӀиди гъуьлуьз гун адет хьанвай кар туш. 27Ингье идан мехъерин гьафте куьтягь жеда, чна гъвечӀидини ваз гуда, амма и кардай вуна заз мадни ирид йисуз къуллугъ ийида».

28Якьуб рази хьана. Мехъерин гьафте куьтягь хьайила, Лабана адаз вичин руш Рахилни пабвиле гана, 29адаз къаравуш яз вичин лукӀ Билгьа тайинарнай. 30Якьуб Рахилахъ галазни хьана. Адаз ам Лиядилай гзаф кӀандай ва ам къачун патал Лабаназ мад ирид йисуз къуллугъна.

Якьубан аялар

31Реббидиз акуна хьи, Лия гъуьлуьн рикӀиз хуш туш, ва гьавиляй адан руфун хаз жедайди авуна, Рахил аялар тежедайди хьана. 32Лия руфунал залан хьана, хва хана ва адаз Рувен#29:32 Рувен – чувуд чӀала «Килиг, хва» я тушни «зи четинвилер акуна» манаяр аваз гъавурда акьазва. тӀвар гана.

«Реббидиз зи гъам акуна, – лагьана ада, – гила, гьелбетда, гъуьлуьз зун кӀан жеда».

33Ахпа мад руфунал залан хьана – ва мад хва хана. «Зун гъуьлуьз кӀан тийизвайди Реббидиз ван хьана, – лагьана ада, – ва заз мад са хва багъишна». Гададал ада Шимун#29:33 Шимун – чувуд чӀалалди «ван атун» гафуниз мукьва я. тӀвар эцигна.

34Ахпа мад руфунал залан хьана – ва мад хва хана. «Гила кьванни гъуьлуьн рикӀ зал жеда, – лагьана ада, – за адаз пуд хва ханва эхир!» Гьавиляй гададал Леви#29:34 Леви – чувуд чӀалалди «кутӀунун» гафуниз мукьва я. тӀвар эцигна.

35Мад гъилера руфунал залан хьана ва мад хва хана. «Гила Реббидиз шукур ийида!» – лагьана ада ва хциз Ягьуд#29:35 Ягьуд – чувуд чӀалалди «шукур авун» гафуниз мукьва я. тӀвар гана.

Идалай кьулухъ адаз вахтуналди мад аялар хъхьанач.

Currently Selected:

Хьунухь 29: ЛезПК

Highlight

Copy