Крар 5

Гьанани ва Сапфира

1Гьанани тӀвар алай са касдини адан Сапфира лугьудай папа чпин мулк маса гана. 2Амма пулунин са пай ада вичиз туна, и кардикай адан папазни хабар авай. Амукьай пул ада гъана илчийрин ихтиярда туна. 3Петруди адаз лагьана:

– Гьанани, ви рикӀиз гьикӀ хьана иблис гьахьайди я? Чил маса гайи пулунин са пай чинеба жуваз туналди, вуна Пак Руьгьдикай таб авуна эхир! 4Вуна маса гудалди чил види тир, вуна адахъ къачур пулни ви пул тир. Вуна вучиз и кар ви рикӀе туна? Вуна инсанриз ваъ, Аллагьдиз таб авуна.

5Гьананидиз и гафар ван хьун кумазни, ам гьанал ярх хьана, кьена. И кардикай хабар хьайи виридак зурба кичӀ акатна. 6Ахпа жегьилри, атана, Гьанани кафандик кутуна ва тухвана кучукна.

7Гъуьл кьейидакай хабар авачир адан паб пуд сятдилай хьиз атана акъатна. 8Петруди адавай хабар кьуна:

– Лагь кван, гъуьлуьхъ галаз куьне чил гьа икьван пулунихъ маса ганани?

– Эхь, – жаваб гана ада, – гьакьван пулунихъ.

9– Аллагьдин Руьгь синагъ авун патал куьне вучиз гаф-чӀал сад авунва? – лагьана Петруди. – Ингье ви гъуьлуьн мейит сура туна хтанвайбур ракӀарив гва, абуру ви мейитни суруз тухуда.

10Гьа инал и паб, Петрудин кӀвачерик ярх хьана, кьена. Гьахьай жегьилриз ам кьенваз акуна. Абуру паб тухвана гъуьлуьн патав кучукна. 11Иманийрин кӀватӀалдик ва и кардикай ван хьайи амай жемятдик зурба кичӀ акатна.

Аламатар ва керемат-ишараяр

12Халкьдин арада илчийри гзаф аламатар ва керемат-ишараяр къалуриз хьана. Вири иманияр Сулейманан ширасдик кӀватӀ жедай. 13Иманийрин кӀватӀалдик квачир инсанри абурук экечӀдай жуьрэт ийизвачир, ятӀани инсанри имандал атайбуруз гьуьрметзавай. 14Реббидихъ иман ийизвай итимринни папарин кьадар къвердавай артух жезвай. 15Вири и аламатрин нетижа яз, куьчедай физвай Петрудин хъен хьайитӀани алукьрай лугьуз инсанри азар квайбур куьчейриз акъуддай, абур месерал къаткурдай. 16Ярусалимдин мукьув гвай шегьеррайни инсанар кӀеретӀралди къведай. Абуру аниз азарар квай чпинбур ва жинерри гьалдай вегьенвайбур гъидай, вири начагъбур чпин тӀалрикай азад хъжедай.

Илчияр хурук кутун

17Илчийрал пехил хьанвай кьилин хахамди ва адан терефдарар тир сакъайри 18илчияр кьуна ва шегьердин къазаматда туна. 19Амма йифиз Реббидин малаикди варар ахъайна, абур ахкъудна.

20– Аллагьдин КӀвализ алад, – лагьана ада, – фена инсанриз и цӀийи уьмуьрдикай вири лагь.

21Чпиз лагьайвал, экуьнахъ фадамаз Аллагьдин КӀвализ атана, абур халкьдиз чирвилер гуз эгечӀна.

Кьилин хахамди ва адан мукьув гвайбуру экуьнахъ Меслягьатдин векилар ва Исраилдин вири агъсакъалар кӀватӀна, къазаматда авай илчияр гъун патал аниз итимар ракъурна. 22Нуькерар къазаматдиз атайла, илчияр ана авачиз хьана. Элкъвена хтана, абуру чеб ракъурнавайбуруз лагьана:

23– Къазаматдин варар мягькемдиз агалнавай, варарални къаравулар алай, амма чун къазаматдин къенез гьахьайла, чаз анай садни жагъанач.

24И ван хьайила, чӀехи хахамри ва Аллагьдин КӀвалин къаравулрин кьиле авайда, им вуч лагьай чӀал я лугьуз, фикирар ийиз хьана. 25Гьа чӀавуз са ни ятӀани атана ихьтин хабар гана:

– Ингье, куьне къазаматда турбуру Аллагьдин КӀвале акъвазна жемятдиз чирвилер гузва.

26Аллагьдин КӀвалин къаравулрин кьилевайди вичин итимарни галаз фена илчияр гваз хтана. Халкьди къван гунихъай кичӀезвай абуру илчияр гужуналди хканачир.

27Силис кьун патал илчияр кьилин хахамдин патав Меслягьатдиз гъана.

28– Чна квез Исадин ТӀвар кьун кӀевелай къадагъа авуначирни? – лагьана кьилин хахамди, – амма куьне куь чирвилерив Ярусалим ацӀурзава. Гьадалайни гъейри, квез Иса кьинин тахсирни чи хиве тваз кӀанзава.

29– Инсанрилай гзаф Аллагьдиз табийвал авун лазим я! – жаваб гана Петрудини муькуь илчийри. – 30Чи бубайрин Аллагьди куьне кӀарасдин хашуниз яна кьейи Исадал чан хкана. 31Исраилдиз Аллагьдин рекьел къведай ва гунагьрилай гъил къахчудай мумкинвал гун патал, гьа и Иса Аллагьди Вичин эрчӀи гъилихъай ацукьарна ва Адакай ЧӀехиди ва Хиласкар авуна. 32И кардин шагьидар тек са чун туш, гьакӀни Аллагьди Вичиз табийбуруз гузвай Пак Руьгьни я.

33И гафар ван хьайибурук хъилен цӀай акатна. Абуруз илчияр рекьиз кӀанзавай. 34И чӀавуз Меслягьатдин вилик фарисейрикай тир Гамалил экъечӀна. Ам Къанундин муаллим тир, вири халкьди адаз гьуьрметзавай. Гьамалила илчияр са кьадар вахтунда къецел акъудун эмирна 35ва дуванханада авайбуруз лагьана:

– Исраилвияр! Куьне квез и инсанриз вуч ийиз кӀанзаватӀа хъсандиз фагьум ая. 36Са тӀимил идалай вилик вич чӀехи кас хьиз къалурзавай Тавдас лугьудай сад хьанай. Кьуд виш кьван касди адан пад кьунай, амма ам яна кьейила, адан вири терефдарар гьарнихъ чкӀана, адан крарни тахьайдай хьана. 37Адалай кьулухъ, агьалияр сиягьдиз къачудай чӀавуз, Галилейдай тир Ягьуд пайда хьана. Адани инсанрин са кӀватӀал вичин патаз гъана. Гьамни яна кьена, гьадан терефдарарни гьар сад санихъ чкӀана. 38ГьакӀ хьайила за квез лугьузва: и инсанрик хкуьрмир. Абур ахъая. Абурун мурадарни крар абуруз чпиз кӀан хьана ийизвайбур ятӀа, а кӀвалахар вири терг жеда. 39Абурун крар Аллагьдиз кӀан хьана ийизвайбур ятӀа, квелай абур тергиз алакьдач, куьнни Аллагьдиз акси жедайвал ийимир.

Ада кӀватӀ хьанвай инсанар чӀалал гъана. 40Абуру илчийриз эверна ва абур къамчидалди гатаз туна. Ахпа илчийриз мад Исадин ТӀвар хкьун къадагъа авуна, абур ахъайна. 41Исадин ТӀварцӀин хатурдай ихьтин русвагьвилиз лайих авунал, шад яз илчияр Меслягьат кӀватӀ хьанвай чкадай экъечӀна. 42Гьар юкъуз Аллагьдин КӀвалени чпин кӀвалера абуру акъваз тавуна чирвилер гузвай ва, Шад Хабар яз, Иса – Месигь тирди лугьузвай.

Currently Selected:

Крар 5: ЛезПК

Highlight

Copy