Крар 6

Ирид шемас хкягъун

1 Тилмизрин кьадар артух жезвай чӀавуз юнан чӀалал рахадай чувудри чкадин чувудрилай шикаятар ийиз хьанай. Юнан чувудри лугьузвай хьи, гьар йикъан фу пайдайла, чкадин чувудри юнан чувудрин хендедаяр кваз кьазвач. 2Иниз килигна цӀикьвед илчиди вири тилмизар санал кӀватӀна лагьана:

– Аллагьдин Гаф чукӀурун туна, тӀуьнин-хъунин месэлаяр гьялун чаз кутугнавач. 3ГьакӀ хьайила, стхаяр, куь арадай ирид кас хкягъа, чнани а везифаяр гьабурун хиве твада. И ксар гьуьрмет авай, Руьгьдив ацӀанвай ва акьул авай ксар хьун лазим я. 4Чна, лагьайтӀа, гзафни-гзаф чи вахт дуьаяр авунизни Аллагьдин Гаф чукӀуруниз серфда.

5И меслят вирибуруз хуш хьана, абуру Истефас (ам имандивни Пак Руьгьдив ацӀанвай), ФилипӀ, Пархар, НикӀанур, Тимун, Парман ва виликдай чувудрин диндал хьайи антӀиахви НикӀалай хкяна. 6Ирид касни илчийриз къалурнай, абуру, дуьа авуна, абурал гъилер эцигна.

7Аллагьдин Гаф гегьеншдиз чкӀизвай, тилмизрин кьадарни Ярусалимда къвердавай артух жезвай, хахамрикайни гзафбур имандал атана.

Истефас къазаматда тун

8Аллагьди къуватни берекат ганвай Истефаса халкьдин арада зурба аламатар ва керемат-ишараяр къалурзавай. 9«Азад хьайибурун» синагугдикай тир чеб Киринейдай ва Искендерандай атанвай чувудри ва Киликатдай ва Асия вилаятдай тир са шумуд чувудди Истефасахъ галаз гьуьжетар ийиз хьана. 10Амма Руьгьди Истефасаз ахьтин акьул гана хьи, абурувай садавайни гьуьжетра адал гъалибвал къачуз хьанач. 11ГьакӀ хьайила, Истефасан рекъибри чинеба меслят хьана са бязи инсанрив Истефасакай икӀ лугьуз туна:

– Ада Мусадизни Аллагьдиз акси яз чӀуру гафар лугьудайла, чаз ван хьана.

12Гьа икӀ а ксари халкь, тавратдарар ва агъсакъалар Истефасаз акси акъвазарна. Истефасакай хъел авайбуру ам кьуна Меслягьат кӀватӀ жезвай чкадиз гъана. 13Абуру жагъурай тапан шагьидри лугьудай:

– Ам датӀана Аллагьдин КӀваликайни Къанундикай чӀурукӀа рахазва. 14«Назаретдай тир а Исади Аллагьдин КӀвал барбатӀда, чаз Мусади тур къайдаяр дегишарда», – лугьуз Истефас рахадайла, чаз ван хьанай.

15Меслягьатда авай кьванбур вири Истефасаз дикъетдалди килигзавай. Адан чин абуруз малаикдин чин хьиз аквазвай.

Currently Selected:

Крар 6: ЛезПК

Highlight

Copy