Крар 15

Ярусалимда хьайи меслятар

1АнтӀиахдиз Ягьудатдай атай са бязи инсанри иманийриз лугьуз хьана:

– Куьн Мусади ганвай къайда тирвал суьннет тавуртӀа, куьн хилас жедач.

2И гафариз килигна, Павелни Барнаба а ксарихъ галаз чӀехи гьуьжетра гьатна. И месэладай кьил акъудун патал, Павелни Барнаба са кьадар иманиярни галаз Ярусалимдиз илчийринни чӀехибурун патав ракъурун кьетӀна. 3Иманийрин кӀватӀалда авайбуруз сагърай лагьана, абур рекье гьатна. Абур Финикидайни Самариятдай тӀуз фена, ана абуру чувудар туширбур Аллагьдин рекьел къвезвайдакай хабар гана. И хабарди вири иманийрик чӀехи шадвал кутуна.

4Ярусалимдиз атайла, абур иманийрин кӀватӀалди, илчийри ва чӀехибуру кьабулна. Павелани Барнабади Аллагьди чпин гъилералди авур вири крарикай ахъайна. 5Фарисейрин патал алай имандал атанвайбуру къарагъна, лагьана:

– Имандал атанвай чувудар туширбур суьннет авун лазим я, гьабурувайни Мусадин Къанун кьилиз акъудун гьаркьна#15:5 Гьаркьун – Са вуч хьайитӀани кӀевелей тӀалабун. кӀанда.

6И месэладин паталай меслятар ийиз илчиярни чӀехибур кӀватӀ хьана. 7Яргъал гьуьжетар хьайидалай кьулухъ Петруди къарагъна, лагьана:

– Стхаяр, квез чизва хьи, куь арадай зун Аллагьди чувудар туширбур имандал гъун патал Шад Хабардикай муштулухар гуз хкяна тӀимил вахт туш. 8РикӀер аквазвай Аллагьди, чаз хьиз чувудар туширбурузни Пак Руьгь гуналди, гьабурни кьабулзавайди къалурна. 9Абуру Иса Месигьдихъ иман авурла, Аллагьди и имандалди абурун рикӀер михьна, абурунни чи арада авай тафават квадарна. 10ГьакӀ хьайила, я чавай, я чи бубайривай кьаз тахьай пар маса халкьарин арадай тилмизвилиз атайбурун хивез вегьиз, вучиз куьне Аллагь синагъ ийизва? 11Гьабуру хьиз, чнани Ребби Исадин берекатдик кваз хилас жедайдахъ иман авунва эхир!

12И чӀавуз вирида кисна Павелазни Барнабадиз яб гузвай. Абуру чпин куьмекдалди Аллагьди маса халкьарин арада гьихьтин аламатар ва керемат-ишараяр къалурнатӀа суьгьбетзавай. 13Абуру куьтягьайла, Якьуба лагьана:

– Стхаяр, захъ яб акала. 14Сифте яз Аллагь чувудар туширбурун къайгъу чӀугваз эгечӀна, абурукай Ада Вичин халкь авуникай чаз Симуна ахъайна. 15Адан гафарихъ галаз пайгъамбарри кхьенвайдини кьазва:

16 «„Ахпа За элкъвена хтана Давудан

ацахьнавай кӀвал туьхкӀуьр хъийида.

А кӀвал За чкадиз хкида,

За ам цӀийи кьилелай гуьнгуьна хутада.

17-18 Амай инсанарни Зи ТӀвар янавай вири халкьар

Реббидихъ къекъвез жедайвал“, –

дегь чӀаварилай инихъ Вичин гафар малумарна

кьилиз акъудай Реббиди икӀ лугьузва» # Амус 9:11-12. .

19ГьакӀ хьайила за гьисабзава хьи, Аллагьдихъ элкъвезвай чувудар туширбурун вилик пад кьуна кӀандач. 20Бутриз къурбанднавай тӀуьн, дуьз тукӀун тавунвай гьайванрин як, иви кумай як немир ва явавиликай яргъаз хьухь лагьана абуруз за чар кхьин теклифзава. 21Мусадин Къанун, лагьайтӀа, дегь чӀаварилай гьар са шегьерда чирзава ва синагугра гьар Киш юкъуз кӀелзава.

Мажусийриз чар

22Илчийрини иманийрин кӀватӀалдин чӀехибуру амай вири иманийрихъ галаз санал, чпин арадай са шумуд кас хкяна, абур Павелахъни Барнабадихъ галаз санал АнтӀиахдиз ракъурун къетӀна. Абуру хкягъайбур Барсаба-Ягьудни Силав тир. И кьве кас иманийрин кьиле авайбур тир. 23Иманийри абурув вугана ракъурай чарче икӀ кхьенвай:

«Илчийрин ва иманийрин кӀватӀалдин чӀехибурун патай АнтӀиахдин, Суьриядин ва Киликатдин имандаллай маса халкьарикай тир стхайриз-вахариз саламар ракъурзава! 24Куь кьилив чи патавай са бязи ксар атайди ва абуру чпин ихтилатралди куь арада гъулгъула тунва ва куь руьгьер теспача авунва лугьуз чаз ван хьана. Амма чна абуруз са эмирни авунвачир. 25Иниз килигна чна чун вири кӀватӀ хьанвай чкадал са шумуд кас хкяна, абур играми Барнабадихъни Павелахъ галаз куь патав ракъурун кьетӀна. 26Барнабани Павел чи Ребби Иса Месигьдин ТӀвар патал чпин чан эцигнавайбур я. 27И чар гваз чна ракъурзавай Ягьудани Силава чпини и чарче авай гафар квез тестикь хъийида. 28Пак Руьгьдизни чаз квел, са бязи къайдайрал куьне амал авунилай гъейри, са парни эцигна кӀанзавач: 29бутриз къурбанднавай тӀуьн, дуьз тукӀун тавунвай гьайвандин як, иви кумай як немир, явавиликай яргъаз хьухь. И тагькимар куьне кьилиз акъудиз хьайитӀа, хъсан я. Куьн сагърай».

30Ракъурнавайбур атана АнтӀиахдиз агакьна. Ана иманияр кӀватӀна, чпив гвай чар абурув вугана. 31Чарче авай руьгь кутадай гафар кӀелайла, абуруз хвеши хьана. 32Ягьудни Силав чебни пайгъамбарар тир, абуру иманийриз кӀубанардай ва руьгь мягькемардай гзаф гафар лагьана. 33-34Абур ана са кьадар вахтунда амукьна, ахпа иманийри абуруз хийир-дуьа авуна, абур иниз ракъурай ксарин патав рекье хтуна. 35Павелни Барнаба АнтӀиахда амукьна. Ана абуру ва абурухъ галай гзаф масабуру Реббидин Гафуникай муштуллухар гузвай.

Павелан кьвед лагьай сиягьат

Павеланни Барнабадин араяр къун

36Арадай са кьадар вахт фейила, Павела Барнабадиз лагьана:

– Ша, чна Реббидин Гафуникай хабар ганвай кьван шегьерриз фена, чи стхайрал-вахарал са кьил чӀугван, абур гьикӀ аватӀа килигин.

37Барнабадиз вичихъ галаз Ягья-Маркни тухуз кӀанзавай. 38Амма Павелаз Памфилда чеб гадарна чпин крарикай кьил къакъудай Марк чпихъ галаз тухуз кӀан хьанач. 39Павеланни Барнабадин арада хци наразивилер гьатна, абур чара хьана. Барнаба, Маркни къачуна, Куьпридиз фена. 40Павела вичиз Силав хкяна. Стхайри-вахари Павел Аллагьдин берекатдал аманатна, ам рекьиз экъечӀна. 41Павела Суьриядайни Киликатдай тӀуз фидай рекье иманийрик руьгь кутаз хьана.

Currently Selected:

Крар 15: ЛезПК

Highlight

Copy