Крар 16

ТӀиматӀей гьалтун

1Павел Дербедиз ва ЛуьстӀрадиз атана. Ана ТӀиматӀей тӀвар алай тилмиз авай. ТӀиматӀеян диде Исадихъ иман ийизвай чувуд, бубани юнан тир. 2ЛуьстӀрадани Канида авай иманияр ТӀиматӀеякай хъсан рахазвай. 3Павелаз вичихъ галаз ТӀиматӀейни къачуз кӀан хьана, гьакӀ хьайила ада ам суьннет авуна. И кар ада и чкайра авай чувудриз ТӀиматӀеян буба юнан тирди чир хьуниз килигна авунай. 4Шегьердай шегьердиз физ, Павелани адахъ галайбуру Ярусалимда илчийрини чӀехибуру кьабулай къайдайрикай иманийрал хабар агакьарзавай, абуру маса халкьарикай тир иманийриз и къайдайрал амал ая лугьузвай. 5Гьа икӀ кӀватӀалра авай иманияр имандал мягькем, абурун кьадарни югъ-къандавай артух жезвай.

Павелан ахвар

6Абур Фиригъдайни ГалатӀдай яна физвай, Асия вилаятда Аллагьдин Гафуникай хабар чукӀурдай ихтияр абуруз Пак Руьгьди ганач. 7Муьсидин часпардал атана агакьайла, абуруз Битиндиз физ кӀан хьанай. Амма абур Исадин Руьгьди аниз ахъайнач. 8Абурни Муьсидин патавай яна Туругьасдиз фена. 9Йифиз Павелаз ахварай МакӀедандай тир инсан акуна. Ада кӀвачел акъвазна Павелаз минетзавай:

– Тавакъу ийида, вун гьуьлелай элячӀна, чиниз ша, чаз куьмек ая.

10Павелаз акур и ахвардай чна Аллагьди чаз Шад Хабардикай муштулухар гуз аниз эверзавайди кьатӀана. Чунни гьасятда МакӀедандиз рекье гьатна.

Лидият имандал атун

11Туругьасдай гимида аваз чун дуьз СаматӀракӀдал фена, гьанай пакагьан юкъуз чун Неапулдиз акъатна. 12Неапулдай чун римвийрин гъилик квай, МакӀедандин и паюнин кьилин шегьер тир ФилипӀриз атана. Ана чун са шумуд юкъуз хьана. 13Киш юкъуз шегьердин варарай экъечӀна, вацӀал фена. Чаз ана ибадат ийидай чка авай хьиз тир. Чун ана кӀватӀ хьанвай папарихъ галаз рахана. 14Абурун арада Туьатира шегьердай тир Лидият лугьудай са паб авай, адан пеше багьа парчаяр маса гун тир. Лидият Аллагьдиз ибадат ийизвай кас тир, Павелан гафар а папан рикӀе гьатун патал Реббиди адан рикӀ ахъайна. 15Лидията вичин кӀвале авай виридахъ галаз цик акахьун къачуна. Идалай гуьгъуьниз Лидията чун вичин кӀвализ мугьманвилиз кьетӀивилелди тухвана.

– Куьне зун Реббидихъ иман ийизвай касдай кьазватӀа, атана заз мугьман хьухь, – лагьана ада. Чун рази хьана.

Павелни Силав кьун

16Садра чун ибадат ийидай чкадал фидайла, рекье чал жинжи кьунвай къаравуш руш гьалтна. Жинжи рушан мецелай инлай кьулухъ жедай крарикай лугьудай. Фалбазвал авуналди руша вичин сагьибриз зурба хийирар гъизвай. 17Къаравушди, Павеланни чи гуьгъуьна гьатна, гьарайзавай:

– И инсанар цавараллай Аллагьдин лукӀар я! Абуру квез хилас жедай рехъ къалурзава!

18А руша гзаф йикъара гьакӀ ийиз хьана. Эхирни бизар хьана, Павела чӀуру жинжихъ элкъвена лагьана:

– Иса Месигьдин ТӀварцӀелай за ваз эмирзава, адакай хкат!

Рушакай жин гьасятда хкатна. 19Чпиз хийир къвезвай чешме квахьайди чир хьайила, рушан иесийри Павелни Силав кьуна, абур шегьердин кьилевайбурун патав майдандал галчӀурна. 20Павелни Силав шегьердин гьакимрин патав гъайибуру лагьана:

– И инсанар чувудар я. Абуру вири шегьердик гъулгъула кутазва. 21Абур чал, римвийрал, чавай кьабулиз тежедай хьтин, къанундив кьан тийидай къайдаяр илитӀиз алахънава.

22Халкьди Павелни Силав гъайибурун пад кьуна. Гьакимри абурулай пекер хтӀунна, лашаралди гатун эмирна. 23Хъсандиз гатана абур къазаматдиз вегьена, къаравулдални абур мукъаятдаказ хуьх лугьуз тапшуругъ гана. 24Гьа ихьтин эмир къачур къаравулди абурун кӀвачериз кӀарасдин тӀапӀар яна, абур къене пата авай къазаматдиз чуькьвена.

25Йифен кьулариз Павелани Силава Аллагьдиз дуьаяр ийидайла ва тарифдин манияр лугьудайла, къазаматда авай муькуьбуру абуруз яб гузвай. 26Садлагьана ахьтин кӀеви залзала хьана хьи, къазаматдин бинени кваз юзана. Къазаматдин вири ракӀарар ахъа хьана, къазаматнавай вирибурал алай зунжурар кутӀуннавай хкар цларай акъатна аватна. 27Ахварай аватай къаравулдиз, ахъа хьайи ракӀарар акурла, къазаматда авай вирибур катнавай хьиз хьана. Гьавиляй ада тур акъудна ва вичи вич яна рекьиз кӀан хьана. 28Амма Павела кӀевиз гьарайна:

– Жуван чандиз къаст ийимир! Чун вири ина ама!

29Къаравулди экв куькӀуьрун эмирна ва ам тадиз къазаматнавайбур авай чкадиз гьахьна. Чандик зурзун акатна, ам фена Павеланни Силаван кӀвачерик ярх хьана. 30Ада абур анай акъудна, хабар кьуна:

– Агъаяр, жув хиласун патал за вуч авун лазим я?

31– Ребби Исадихъ иман ая, – лагьана абуру, – гьакӀ авурла, вунни хилас жеда, ви хизанни.

32Абуру адазни адан кӀвале авай вирибуруз Реббидин Гаф лагьана. 33Йифен и геж вахтунда къаравулди абур вичин кӀвализ тухвана, абурун хирер чуьхвена, ахпа ам ва адан кӀвалевайбуруни цик акахьун къачуна. 34Ада Павелни Силав вичин кӀвализ хкана, абуруз хъсан тӀуьн-хъун гана. Чеб Аллагьдихъ ийизвай имандал атанва лугьуз ам ва адан хизан гзаф шад хьанвай.

35Югъ алукьна. Гьакимри къазаматдиз вач-хъшаяр ракъурна. Абуру къаравулдиз Павелни Силав къазаматдай азад ая лагьана эмир гана.

36Къаравулди Павелаз и кардикай хабар гана лагьана:

– Гьакимри куьн къазаматдай ахъая лагьана эмирнава! Квевай хъфейтӀа жеда, квез хъсан рехъ хьурай!

37Амма Павела гьакимрин вач-хъшайриз лагьана:

– Чун Римдин ватанэгьлияр хьунизни килиг тавуна, абуру дуван тавуна чун халкьдин вилик гатана, къазаматдиз вегьена. Гила абуруз, а кардикай садазни чир тежедайвал, чун чпелай элягъиз кӀанзавани? Ваъ! Абур иниз чеб атана, чпи чун инай акъудрай.

38Вач-хъшайри Павеланни Силаван гафар гьакимрал агакьарна. Павелни Силав Римдин ватанэгьлияр тирдакай чир хьайила, гьакимриз кичӀе хьана. 39Абуру атана гъил къахчун тӀалабна. Гьакимри абурувай къазаматдай экъечӀна, шегьердай масаниз хъфин тӀалабна. 40Къазаматдай экъечӀна, Павелни Силав Лидиятан кӀвализ фена. Абуру ана авай иманийрин руьгь кӀубанарна. Адалай гуьгъуьниз абур чпин рекьиз экъечӀна.

Currently Selected:

Крар 16: ЛезПК

Highlight

Copy